ກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດ ແຫ່ງຊາດໄດ້ແຈ້ງໃນວັນທີ12/09/2019 ໃຫ້ຮູ້ວ່າ ຍົນກອງທັບມາເລ ເຊຍທີ່ຂົນເຄື່ອງຊ່ວຍເຫຼືອຈາກອາຊຽນເພື່ອມາຊ່ວຍຜູ້ປະສົບໄພນໍ້າ ຖ້ວມຢູ່ບັນດາແຂວງພາກກາງ ແລະ ພາກໃຕ້ຂອງ ສປປ ລາວ ຈະມາລົງຈອດທີ່ສະໜາມບີນສາກົນວັດໄຕໃນຕອນບ່າຍມື້ນີ້.
ທ່ານ ວິໄລພົງ ສີສັມຫວັງ ວ່າການຫົວໜ້າກົມສັງຄົມສົງເຄາະ ທັງເປັນຫົວໜ້າກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດໄດ້ກ່າວວ່າ: ຕອນບ່າຍມື້ນີ້ ຍົນລໍາດັ່ງກ່າວຈະຂົນເຄື່ອງໃຊ້ຄົວເຮືອນ, ເຄື່ອງໃຊ້ສ່ວນຕົວ, ຕຸກໃສ່ນໍ້າດື່ມ, ເຄື່ອງສຸຂະອະນາໄມ ແລະ ອື່ນໆ.
ເຄື່ອງບໍລິຈາກດັ່ງກ່າວໄດ້ຮັບມາຈາກປະເທດສະມາຊິກອາຊຽນ ເຊິ່ງ ໄດ້ເກັບມ້ຽນໄວ້ທີ່ສາງມ້ຽນເຄື່ອງທີ່ປະເທດມາເລເຊຍ ແລະ ກອງທັບມາເລເຊຍເປັນຜູ້ຊ່ວຍເຫຼືອທາງດ້ານການຂົນສົ່ງ.
ທ່ານວິໄລພົງ ໄດ້ກ່າວຕື່ມອີກວ່າ ຫຼັງຈາກເຄື່ອງມາຮອດ ສະໜາມບີນສາກົນວັດໄຕ ຄະນະຮັບຜິດຊອບໄພນ້ຳຖ້ວມຈະໄດ້ນຳ ເອົາ ໄປມອບໃຫ້ຜູ້ປະສົບໄພ ຢູ່ 6 ແຂວງພາກກາງ ແລະ ພາກໃຕ້ ໂດຍນໍາໃຊ້ລົດກອງທັບປະຊາຊົນລາວຈຳນວນ 8 ຄັນຂົນເຄື່ອງເຫຼົ່ານີ້.
ຂ່າວ: ສົມພາວັນ
ພາບ: ວຽງສະຫວັນ
