Vientiane Times Lao
ກອງປະຊຸມຄົບຄະນະ ຄັ້ງທີ 11 ສະໄໝທີ X ຂອງຄະນະບໍລິຫານງານສູນກາງພັກ ໄດ້ພ້ອມກັນປຶກສາຫາລື ແລະ ລົງເລິກຄົ້ນຄວ້າ ເອກະສານທີ່ມີຄວາມສຳຄັນຍຸດທະສາດ

ກອງປະຊຸມຄົບຄະນະ ຄັ້ງທີ 11 ສະໄໝທີ X ຂອງຄະນະບໍລິຫານງານສູນກາງພັກ ໄດ້ພ້ອມກັນປຶກສາຫາລື ແລະ ລົງເລິກຄົ້ນຄວ້າ ເອກະສານທີ່ມີຄວາມສຳຄັນຍຸດທະສາດ

ຕະຫຼອດ 5 ວັນຂອງການດໍາເນີນກອງປະຊຸມ ຄົບຄະນະ ຄັ້ງທີ 11 ສະໄໝທີ X ຂອງຄະນະບໍລິຫານງານສູນກາງພັກ ຢູ່ສຳນັກງານສູນກາງພັກ ນັບແຕ່ວັນທີ 12-16 ຕຸລາ ທີ່ຜ່ານມາ, ພາຍໃຕ້ການເປັນປະທານຂອງ ສະ ຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ຊຶ່ງບັນດາຄະນະພັກໄດ້ປຶກສາຫາລື ແລະ ລົງເລິກຄົ້ນຄວ້າ ເອກະສານທີ່ມີຄວາມສຳຄັນຍຸດທະສາດ ຈໍານວນໜຶ່ງ ຊຶ່ງປະກອບມີຜົນການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກ ສະໄໝທີ X ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາປະຈຳປີ 2020 ແລະ ທິດທາງແຜນການວຽກງານປະຈໍາປີ 2021.
ນອກນັ້ນ ຄະນະພັກຍັງເປັນເອກະພາບຕໍ່ບັນດາທິດທາງມາດຕະການກະຕຸ້ນ ແລະ ຍູ້ແຮງການເຕີບໂຕຂອງເສດຖະກິດ-ສັງຄົມ ໂດຍສະເພາະໃນໄລຍະທີ່ເສດຖະກິດຖືກຜົນກະທົບຈາກພະຍາດ ໂຄວິດ-19 ໄດ້ພະຍາຍາມປັບປຸງສະພາບແວດລ້ອມຂອງການລົງທຶນໃຫ້ມີຄວາມສອດຄ່ອງ ແລະ ສືບຕໍ່ຍູ້ແຮງການຜະລິດເປັນສິນຄ້າຕາມທ່າແຮງຂອງແຕ່ລະຂະແໜງການ ແລະ ແຕ່ລະທ້ອງຖິ່ນ, ມີການປັບປຸງການຄຸ້ມຄອງ ແລະ ສົ່ງເສີມການຜະລິດສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ເພື່ອສ້າງລາຍຮັບແຫ່ງຊາດໃຫ້ເພີ່ມຂຶ້ນ, ເອົາໃຈໃສ່ແກ້ໄຂການເຄື່ອນໄຫວທຸລະກິດ, ການບໍລິການ, ການແບ່ງຂັ້ນຄຸ້ມຄອງ ແລະ ການປະສານງານ ລະຫວ່າງ ສູນກາງພັກທ້ອງຖິ່ນໃຫ້ມີຄວາມກົມກຽວຫລາຍຂຶ້ນ, ກົນໄກການບໍລິຫານທີ່ມີຫລາຍຂອດຫລາຍຂັ້ນ ເລີ່ມມີການປັບປຸງແກ້ໄຂ, ສຸມໃສ່ແກ້ໄຂໜີ້ສິນສາທາລະນະ, ເລັ່ງປັບປຸງລັດວິສາຫະກິດຈຳນວນໜຶ່ງເຮັດໃຫ້ການດໍາເນີນທຸລະກິດມີປະສິດທິຜົນດີຂຶ້ນ, ລວມທັງເອົາໃຈໃສ່ສະກັດກັ້ນ ແລະ ແກ້ໄຂການຮົ່ວໄຫລຂອງງົບປະມານຢ່າງເຂັ້ມງວດ, ຄຸ້ມຄອງການປະຕິບັດລະບຽບລາຍຈ່າຍບໍລິຫານ ກໍຄືການລົງທຶນຂອງລັດຢ່າງມີຈຸດສຸມ ແນໃສ່ສ້າງການຫັນປ່ຽນທີ່ແທ້ຈິງໃນຊຸມປີຕໍ່ໜ້າ.
ແຜນການທີ່ວາງໄວ້ ແຕ່ກໍ່ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ; ບັນດາໂຄງການລົງທຶນໃຫຍ່ໆ ເຊັ່ນ: ໂຄງການສ້າງເສັ້ນທາງລົດໄຟ ລາວ-ຈີນ, ໂຄງການທາງດ່ວນ, ໂຄງການພັດທະນາ ແລະ ຂຸດຄົ້ນພະລັງງານ-ບໍ່ແຮ່, ໂຄງການກໍ່ສ້າງເຂດເສດຖະກິດພິເສດ ຕິດພັນກັບການຈັດສັນຕົວເມືອງຊົນນະບົດ, ໂຄງການສົ່ງເສີມດ້ານການທ່ອງທ່ຽວ ແລະ ໂຄງການສຳຄັນອື່ນໆ ກໍໄດ້ສືບຕໍ່ຈັດຕັ້ງປະຕິບັດໄປຕາມແຜນທີ່ກໍານົດໄວ້.

ຂໍ້ມູນ: ສູນກາງພັກ

 

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ