ໝາກຜົນຂອງກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42 (42nd AMEM) ທີ່ໄດ້ດຳເນີນໃນໄລຍະວັນທີ 26-27 ກັນຍານີ້ ມີຂໍ້ພົ້ນເດັ່ນ ເປັນຕົ້ນຄືການທີ່ຈະສອດແຊກ ຍຸດທະສາດການຫຼຸດຜ່ອນທາດອາຍກາກບອນ ເຂົ້າໃນການຜັນຂະຫຍາຍແຜນການປະຕິບັດການຮ່ວມມືດ້ານພະລັງງານຂອງອາຊຽນ (APAEC) ໄລຍະທີ 2: 2021-2025 ແລະ ການພັດທະນາຈັດຕັ້ງປະຕິບັດ APAEC ພາຍຫຼັງປີ 2025.
ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະ ບໍ່ແຮ່ (ພບ) ປະທານກອງປະຊຸມ 42nd AMEM ໄດ້ຖະແຫຼງຜົນສຳເລັດຂອງກອງປະຊຸມ 42nd AMEM ຕໍ່ບັນດາສື່ມວນຊົນລາວ ແລະ ຕ່າງປະເທດ ໃນຕອນແລງວັນທີ 27 ກັນຍານີ້ ທີ່ຫໍປະຊຸມແຫ່ງຊາດ ວ່າ: ກອງປະຊຸມ 42nd AMEM ໂດຍການເປັນເຈົ້າພາບຂອງກະຊວງພະລັງງານ ແລະ ບໍ່ແຮ່ ສປປ ລາວ ຊຶ່ງເຂົ້າຮ່ວມໂດຍບັນດາປະເທດສະມາຊິກອາຊຽນ (AMS), ປະເທດຄູ່ຮ່ວມຍຸດທະສາດ ແລະ ອົງການຈັດຕັ້ງສາກົນ. ຄຽງຄູ່ກັບກອງປະຊຸມດັ່ງກ່າວ, ພວກເຮົາຍັງໄດ້ເປັນປະທານກອງປະຊຸມທີ່ກ່ຽວຂ້ອງຄື: ກອງປະຊຸມຮ່ວມກັບອົງການພະລັງງານສາກົນ (IEA) ແລະ ອົງການພະລັງງານທົດແທນສາກົນ (IRENA), ກອງປະຊຸມ AMEM +3 ຄັ້ງທີ 21 ແລະ ກອງປະຊຸມສຸດຍອດລັດຖະມົນຕີພະລັງງານອາຊີຕາເວັນອອກຄັ້ງທີ 18. ໂດຍກອງປະຊຸມຂັ້ນລັດຖະ ມົນຕີທີ່ກ່າວມານັ້ນ, ໄດ້ມີການກະກຽມຄວາມພ້ອມຮ່ວມກັບພາກສ່ວນທີ່ກ່ຽວຂ້ອງ ຜ່ານກອງປະຊຸມເຈົ້າໜ້າທີ່ອາວຸໂສພະລັງງານອາຊຽນ ໃນວັນທີ 24 ແລະ 25 ກັນຍາ 2024 ທີ່ຜ່ານມາ.
ກອງປະຊຸມ 42nd AMEM ແມ່ນດໍາເນີນໄປດ້ວຍຄວາມສ້າງສັນ ແລະ ປະສົບຜົນສໍາເລັດຕາມຄາດໝາຍ ໂດຍ ກອງປະຊຸມໄດ້ເປັນເອກະພາບຮັບຮອງເອົາຖະແຫຼງການຮ່ວມກັນ (JMS), ທ່ານ ໂພໄຊ ໄຊຍະສອນ ໄດ້ລາຍງານບາງ ຂໍ້ພົ້ນເດັ່ນດັ່ງນີ້:
ໃນຂະນະທີ່ອາຊຽນ ກໍາລັງເຮັດວຽກເພື່ອກ້າວໄປສູ່ຄວາມຍືນຍົງ ຜ່ານຂອບໜ້າວຽກທີ່ໄດ້ກໍານົດ ແລະ ຂໍ້ລິເລີ່ມຕ່າງໆເຊັ່ນ: ການກໍານົດຍຸດທະສາດການຫຼຸດຜ່ອນທາດອາຍກາກບອນ, ພວກເຮົາເຫັນວ່າ ເປັນແຜນວຽກໜຶ່ງທີ່ສຳຄັນ ແລະ ຕ້ອງຈັດຕັ້ງປະຕິບັັດໃຫ້ສອດຄ່ອງກັບໜ້າວຽກໃນຂະແໜງພະລັງງານ, ເພື່ອສົ່ງເສີມຄວາມເປັນເອກະພາບໃຫ້ການຈັດຕັ້ງປະຕິບັດ ແລະ ມຸ່ງເນັ້ນໄປເຖິງການພັດທະນາພາກພື້ນໃນອະນາຄົດ. ໂດຍທີ່ ພວກເຮົາຈະສອດແຊກແຜນຍຸດທະສາດດັ່ງກ່າວ ເຂົ້າໃນການຜັນຂະຫຍາຍແຜນການປະຕິບັດການຮ່ວມມືດ້ານພະລັງງານຂອງອາຊຽນ (APAEC) ໄລຍະທີ 2: 2021-2025 ແລະ ການພັດທະນາຈັດຕັ້ງປະຕິບັດ APAEC ພາຍຫຼັງປີ 2025. ຜົນສໍາເລັດທີ່ ພວກເຮົາສາມາດບັນລຸໄດ້ໃນປີນີ້ ຜ່ານການຈັດຕັ້ງປະຕິບັດໂຄງການ ພາຍໃຕ້ແຜນ APAEC ໄລຍະ II, ກວມເອົາການພັດທະນາປະສິດທິພາບດ້ານພະລັງງານ, ດ້ານພະລັງງານທົດແທນ, ດ້ານນະໂຍບາຍ ແລະ ແຜນການພະລັງງານ, ເຕັກໂນໂລຊີຖ່ານຫີນສະອາດ, ທໍ່ສົ່ງອາຍແກັສຂ້າມອາຊຽນ ແລະ ພະລັງງານນິວເຄຼຍ.
ໝາກຜົນ ຂອງກອງປະຊຸມ AMEM ຄັ້ງທີ 42 ພາຍໃຕ້ການເປັນປະທານຂອງ ສປປ ລາວ ໃນປີ 2024 ໃນຫົວຂໍ້ “ອາຊຽນ: ເພີ່ມທະວີການເຊື່ອມໂຍງ, ການເຊື່ອມຈອດ ແລະ ສ້າງຄວາມເຂັ້ມແຂງ”, ໂດຍສະເພາະ ວຽກ APG ທີ່ໄດ້ປັບປຸງບົດບັນທຶກຄວາມເຂົ້າໃຈ (MoU) ແລະ ເນື້ອໃນຂອບໜ້າວຽກ (ToR) ຂອງອົງການຕ່າງໆ ທີ່ກ່ຽວຂ້ອງຂອງວຽກຕາຂ່າຍໄຟຟ້າອາຊຽນ (APG). ບົດບັນທຶກຄວາມເຂົ້າໃຈສະບັບປັບປຸງ ແມ່ນຈະເປັນເຄື່ອງມືອັນສຳຄັນ ໃນການຊຸກຍູ້ຂັບເຄື່ອນການຄ້າພະລັງງານໄຟຟ້າຫຼາຍຝ່າຍ, ເພື່ອປັບປຸງຂອດການປະສານງານລະຫວ່າງບັນດາພາກສ່ວນກ່ຽວຂ້ອງ ແລະ ເພື່ອປັບປຸງການສະໜອງໄຟຟ້າໃຫ້ຍືນຍົງ, ຮັບປະກັນໄດ້ໃນທົ່ວບັນດາປະເທດສະມາຊິກອາຊຽນ; ເພື່ອໃຫ້ວຽກງານການເຊື່ອມໂຍງລະ ຫວ່າງພາກພື້ນມີຄວາມກ້າວໜ້າ, ພວກເຮົາເປັນເອກະພາບຖືເອົາວຽກ APG ເປັນຈຸດໃຈກາງເພື່ອສ້າງອະນາຄົດດ້ານພະລັງງານທີ່ເຂັ້ມແຂງ ແລະ ຍືນຍົງຂອງອາຊຽນ, ທັງເພື່ອອໍານວຍຄວາມສະດວກໃຫ້ແກ່ການຊື້-ຂາຍພະລັງງານໄຟຟ້າຂ້າມຊາຍແດນ ແລະ ເພື່ອສະໜັບສະໜູນວິໄສທັດດ້ານພະລັງງານໄລຍະຍາວຂອງພາກພື້ນ; ເພື່ອເຮັດໃຫ້ການສົ່ງໄຟຟ້າ ແລະ ປະຕິບັດວິໄສທັດ ວຽກຕາຂ່າຍໄຟຟ້າອາຊຽນ, ພວກເຮົາໄດ້ຖືສຳຄັນການຍົກລະດັບປັບປຸງລະບົບສາຍສົ່ງຂ້າມຊາຍແດນ ແລະ ການນຳໃຊ້ເຕັກໂນໂລຊີທີ່ກ່ຽວຂ້ອງ ເຊັ່ນ: ການພັດທະນາລະບົບສາຍສົ່ງໃຕ້ທະເລ.
ນອກຈາກນັ້ນ, ເພື່ອເຮັດໃຫ້ການພັດທະນາບັນດາໂຄງການສາຍສົ່ງເຊື່ອມຕໍ່ລະຫວ່າງພາກພື້ນ ທີ່ກ່າວມານັ້ນ ເກີດຜົນ, ພວກເຮົາເຫັນໄດ້ຄວາມສຳຄັນ ເຖິງຄວາມຕ້ອງການດ້ານທຶນຮອນໃນການລົງທຶນຢ່າງມະຫາສານ ເພື່ອໃຫ້ວຽກ APG ມີຄວາມກ້າວໜ້າ. ຕິດພັນກັນນັ້ນ, ພວກເຮົາໄດ້ຮັບຊາບການລາຍງານກ່ຽວກັບບັນດາຂໍ້ລິເລີ່ມໃນການສະໜັບສະໜູນໂຄງການຫັນປ່ຽນດ້ານພະລັງງານລະດັບປະເທດ ແລະ ພາກພື້ນ ແລະ ການອຳນວຍຄວາມສະດວກໃຫ້ແກ່ການເຊື່ອມໂຍງດ້ານພະລັງງານອາຊຽນ, ລວມທັງການຈັດສັນທຶນສະເພາະໃຫ້ແກ່ວຽກງານ APG ຂອງທະນາຄານພັດທະນາອາຊີ (ADB) ແລະ ທະນາຄານໂລກ.
ນອກນີ້, ທ່ານ ໂພໄຊ ໄຊຍະສອນ ຍັງໄດ້ຖະແຫຼງໃຫ້ຮູ້ວ່າ: ກອງປະຊຸມ ກໍໄດ້ຮັບຮອງເອົາບົດລາຍງານການຄາດຄະເນດ້ານພະລັງງານຂອງອາຊຽນ ສະບັບທີ 8 (AEO8) ແລະ ຍັງໄດ້ສໍາເລັດ ຂໍ້ລິເລີ່ມໃນການຂະຫຍາຍໃຈຄວາມສຳຄັນສຳລັບແຜນວຽກ APAEC ຫຼັງປີ 2025 ເພື່ອໃຫ້ສອດຄ່ອງກັບວິໄສທັດປີ 2045 ຂອງປະຊາຄົມອາຊຽນ. ພ້ອມທັງເນັ້ນຢໍ້າໃຫ້ຮູ້ວ່າ: ກອງປະຊຸມ 42nd AMEM ແມ່ນເປັນວາລະວຽກອັນ ທີ່ຢັ້ງຢືນເຖິງການເຮັດວຽກຮ່ວມກັນເພື່ອຂັບເຄື່ອນວຽກ APG ໃນພາກພື້ນໃຫ້ປະກົດຜົນເປັນຈິງ, ພ້ອມທັງສ້າງຕົ້ນແບບແຜນພະລັງງານຂອງອາຊຽນ ທີ່ຈະສາມາດຮັບມືກັບບັນດາສິ່ງທ້າທາຍດ້ານພະລັງງານຂອງພາກພື້ນ ແລະ ທ່າອ່ຽງສຳຄັນຂອງໂລກ.
ຂ່າວ: ສຸກສະຫວັນ, ພາບ: ບຸນອູ້ມ
