Vientiane Times Lao
ກອງພົນທະຫານຮາບທີ 1 ສະເຫລີມສະຫລອງຄົບຮອບ 35 ປີ

ກອງພົນທະຫານຮາບທີ 1 ສະເຫລີມສະຫລອງຄົບຮອບ 35 ປີ

ກອງພົນທະຫານຮາບທີ 1 ໄດ້ຈັດງານສະເຫຼີມສະຫຼອງວັນສ້າງຕັ້ງກອງພົນ ຄົບຮອບ 35 ປີ (12 ກຸມພາ 1985-12 ກຸມພາ 2020) ຂຶ້ນໃນວັນທີ 12 ກຸມພາ ທີ່ເມືອງວັງວຽງ 2020 ໂດຍການເປັນກຽດເຂົ້າຮ່ວມຂອງ ສະຫາຍ ປອ.ບຸນທອງ ຈິດມະນີ ຮອງນາຍົກລັດຖະມົນຕີ ສປປ ລາວ ພ້ອມດ້ວຍບັນດາສະຫາຍ ລັດຖະມົນຕີ, ຮອງລັດຖະມົນຕີ, ຄະນະພັກ-ຄະນະບັນຊາກອງພົນທີ 1, ນາຍ ແລະ ພົນທະຫານທົ່ວກອງພົນທີ 1, ອົງການຈັດຕັ້ງມະຫາຊົນ ແລະ ນ້ອງນັກຮຽນ ແລະ ພໍ່ແມ່ປະຊາຊົນຊາວເມືອງວັງວຽງເຂົ້າຮ່ວມ.

ໃນພິທີ ທ່ານ ຈັດຕະວາ ສາຍໃຈ ກົມມະສິດ ຫົວໜ້າການທະຫານກອງພົນທີ 1 ໄດ້ກ່າວບົດປາໄສ ຕໍ່ທີ່ຊຸມນຸມ ໂດຍທ່ານໄດ້ຍົກໃຫ້ເຫັນປະຫວັດຄວາມເປັນມາ ວ່າ:  ຜົນງານຂອງກອງພົນທະຫານຮາບທີ່ 1 ນັບຕັ້ງແຕ່ມື້ສ້າງຕັ້ງເປັນຕົ້ນມາ ກອງພົນທະຫານຮາບທີ 1 ໄດ້ຮັບການສ້າງຕັ້ງຂຶ້ນ ໃນວັນທີ 12 ກຸມພາ 1985 ໂດຍແມ່ນປະທານໄກສອນ ພົມວິຫານ ເປັນຜູ້ອານຸມັດສ້າງຕັ້ງ ຢູ່ນະຄອນຫຼວງວຽງຈັນ ມາຮອດປີ 1993 ມີຄໍາສັ່ງຈາກຂັ້ນເທິງໃຫ້ຍົກຍ້າຍໄປຕັ້ງຢູ່ ເມືອງວັງວຽງແຂວງວຽງຈັນ.

ນັບແຕ່ມື້ໄດ້ຮັບການສ້າງຕັ້ງມາ ກອງພົນໄດ້ເອົາໃຈໃສ່ປັບປຸງກໍາລັງໃຫ້ເຂັ້ມແຂງທາງດ້ານກໍາລັງພົນ, ຍຸດໂທປະກອນ ແລະ ຍຸດທະວິທີໃນການສູ້ຮົບ; ໃນໄລຍະຜ່ານມາມີຜົນງານໃນການປະກອບສ່ວນເຂົ້າໃນການປົກປັກຮັກສາເຂດນໍ້າແດນດິນອະທິປະໄຕ ຂອງ ຊາດ ໄວ້ຢ່າງໝັ້ນຄົງ ອັນພົ້ນເດັ່ນແມ່ນເຂົ້າຮ່ວມສູ້ຮົບປົກຮັກຮັກສານາບ້ານບໍ່ນ້ອຍ, ເມືອງບໍ່ແຕນ ແຂວງໄຊຍະບູລີ ໄວ້ຢ່າງມີໄຊ, ສົບທົບກັບອໍານາດການປົກຄອງທ້ອງຖິ່ນລົງກໍ່ສ້າງຮາກຖານຢູ່ບັນດາບ້ານຈຸດສຸມທີ່ກອງພົນຮັບຜິດຊອບ ແກ້ໄຂບັນດາສະພາບການບໍ່ສະຫງົບ ແລະ ກວາດລ້າງສັດຕູທີ່ເລື່ອນລອຍຢູ່ປ່າ, ຂົນຂວາຍເອົາປະຊາຊົນ ທີ່ຖືກສັດຕູຕົວະຍົວະເຂົ້າໄປລີ້ຊ້ອນຢູ່ປ່າເຂົ້າມາຢູ່ບ້ານ ແລະ ຜົນງານອື່ນໆອີກຫລາຍດ້ານ.

ໃນພິທີ ຍັງໄດ້ຊົມການສະແດງສິລະປະວັນນະຄະດີ, ກ້ອນກໍາລັງສວນສະໜາມເປັນຕົ້ນ ກ້ອນທຸງໄຊ, ກ້ອນນາຍພັນ, ກ້ອນນັກຮຽນນາຍສິບ, ກ້ອນກຳລັງຕີພິເສດ, ກ້ອນກໍາລັງວິຊາສະເພາະສື່ສານ, ກ້ອນກໍາລັງລົບຊ່າງແສງ, ກ້ອນກໍາລັງເຫຼົ່າລົບປືນໃຫຍ່ໜ້າດິນ, ກ້ອນກໍາລັງທະຫານຮາບ ກອງພັນ 13, ກ້ອນກໍາລັງວິຊາສະເພາະແພດເສນາຮັກ, ກ້ອນກໍາລັງເຫຼົ່າຮົບອາກາດ, ກ້ອນກໍາລັງທະຫານຮາບ ກອງພັນ 15, ກ້ອນເຫຼົ່າຮົບປະສົມ (ເຫຼົ່າຮົບເຄມີ: ສືບຂ່າວ ແລະ ເຫຼົ່າຮົບຫຸ້ມເກາະ), ກ້ອນກໍາລັງປ້ອງກັນຕົວ ໂຮງງານຊີມັວັງວຽງ, ກ້ອນນ້ອງນ້ອຍນັກຮຽນ, ກ້ອນພໍ່ແມ່ປະຊາຊົນ ກຸ່ມບ້ານນາມອນ, ການສະແດງຝຶກແອບຫັດກາຍ, ສິລະປະການຕໍ່ສູ້ ຂອງເຫຼົ່າຮົບຕີພິເສດ ແລະ ການໂດດຈ້ອງຂອງເຫຼົ່າຮົບທະຫານອາກາດ.

ຂ່າວ: ວຽງຈັນທາຍ

Related Articles

Leave a Reply