ກະຊວງກະສິກໍາ ອາເມຣິກາໄດ້ມອບເຄື່ອງບໍລິໂພກປະກອບມີເຂົ້າສານທີ່ເສີມວິຕາມິນ ແລະ ທາດບໍາລຸງ ຈໍານວນ 1.300 ໂຕນ, ຖົ່ວເລນເທວ 230 ໂຕນ, ປາກະປ໋ອງຈໍານວນ 130 ໂຕນ ແລະ ນໍ້າມັນທີ່ມີທາດບໍາລຸງ ສໍາລັບປຸງແຕ່ງອາຫານ 110 ໂຕນ ເພື່ອປຸງແຕ່ງອາຫານທ່ຽງໃນໂຮງຮຽນ ສໍາລັບນັກຮຽນໂຮງຮຽນຊັ້ນປະຖົມ 718 ແຫ່ງ ໃນ 18 ເມືອງບູລີມະສິດ ທີ່ໄດ້ຮັບການຄັດເລືອກ ຈາກກະຊວງສຶກສາທິການ ແລະ ກິລາໂດຍຈະມີນັກຮຽນ 63.000 ຄົນ ໃນທົ່ວປະເທດໄດ້ເຂົ້າເຖິງເຄື່ອງຊ່ວຍເຫຼືອດັ່ງກ່າວ.
ພິທີມອບ-ຮັບ ເຄື່ອງຊ່ວຍ ເຫຼືອດັ່ງກ່າວໄດ້ຈັດຂຶ້ນເມື່ອວັນທີ 30 ພະຈິກ 2021 ທີ່ຜ່ານມາໂດຍມີ ທ່ານ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ ຕາງໜ້າລັດຖະບານລາວກ່າວຮັບ ແລະ ກ່າວມອບໂດຍທ່ານ ປີເຕີ ເຮມອນ ເອກອັກຄະລັດຖະທູດສະຫະລັດອາເມຣິກາ ປະຈໍາ ສປປ ລາວ.
ນັບແຕ່ປີ 2008 ໂຄງການແມັກກາວັນດໍ ອາຫານເພື່ອການສຶກສາ ແລະ ໂພຊະນາການຂອງເດັກນ້ອຍຂອງລັດຖະບານອາເມຣິກາ ທີ່ໄດ້ຮັບການບໍລິຫານ ໂດຍ ກະຊວງກະສິກໍາແຫ່ງປະເທດອາເມຣິກາ ໄດ້ໃຫ້ການຊ່ວຍເຫລືອແກ່ໂຄງການອາຫານໃນໂຮງຮຽນ ຂອງອົງການອາຫານໂລກ ໃນປະເທດລາວ ຕະຫຼອດມາ, ໂດຍການປະກອບສ່ວນທັງໝົດ ປະມານ 85 ລ້ານໂດລາສະຫະລັດ.
ການຊ່ວຍເຫລືອບັນດາໂຮງຮຽນເຫຼົ່ານີ້, ແມ່ນການເຮັດວຽກຮ່ວມກັນ ລະຫວ່າງ ກະຊວງສຶກສາທິການ ແລະ ກິລາ, ອົງການບັນເທົາທຸກກາໂຕລິກ (CRS), ອົງການອາຫານໂລກ ເພື່ອຊ່ວຍ ເຫຼືອທາງດ້ານສຸຂະພາບ ແລະ ໂພຊະນາການ, ເຊິ່ງລວມມີບັນດາຄາບອາຫານໃນໂຮງຮຽນ, ການຕິດຕັ້ງລະບົບນໍ້າສະອາດໃນໂຮງຮຽນ, ສິ່ງອໍານວຍຄວາມສະດວກດ້ານສຸຂະພິບານ ແລະ ອະນາໄມ, ການໃຫ້ການຊ່ວຍເຫຼືອບັນດາຊຸມຊົນ ໃນການສ້າງຫ້ອງກິນເຂົ້າ, ສະຖານທີ່ເກັບມ້ຽນເຄື່ອງ ແລະ ຫ້ອງແຕ່ງກິນ, ການສ້າງສວນຄົວໃນໂຮງຮຽນ, ເຮືອນປູກຜັກ ແລະ ບັນດາໜອງປາຂອງຊຸມຊົນ, ລວມທັງບັນດາກິດຈະກໍາຕ່າງໆ ທີ່ສົ່ງເສີມການຮຽນໜັງສື.
ອົງການອາຫານໂລກ ຍັງໄດ້ມອບການຊ່ວຍເຫຼືອທາງດ້ານກະສີກໍາ ແລະ ນະໂຍບາຍໃຫ້ແກ່ບັນດາຊຸມຊົນ ແລະ ເປັນຄັ້ງທໍາອິດ ທີ່ອົງການອາຫານໂລກໄດ້ເພີ່ມວີຕາມີນ ແລະ ແຮ່ທາດໃສ່ໃນເຂົ້າ ເພື່ອເປັນການເສີມທາດດັ່ງກ່າວ ໃຫ້ແກ່ເດັກນ້ອຍນັກຮຽນທີ່ຂາດສານອາຫານ ຊ່ວຍໃຫ້ເດັກນ້ອຍນັກຮຽນມີສຸຂະພາບ ແລະ ການສຶກສາ ຢູ່ໃນລະຫວ່າງໄວເດັກຈົນເຖິງໄວໜຸ່ມ ຊ່ວຍໃຫ້ເດັກເຫຼົ່ານີ້ເຂົ້າເຖິງໂອກາດຂອງພວກເຂົາ ກາຍເປັນຜູ້ໃຫຍ່ທີ່ມີຄຸນນະພາບ.
