Vientiane Times Lao
ກະຊວງການຕ່າງປະເທດ ຈັດງານສະເຫຼີມສະຫຼອງວັນຟຣັງໂກໂຟນີສາກົນ ພາຍໃຕ້ຫົວຂໍ້: “ແມ່ຍິງຟຣັງໂກໂຟນີ ແມ່ຍິງທີ່ມີຄວາມເຂັ້ມແຂງ”

ກະຊວງການຕ່າງປະເທດ ຈັດງານສະເຫຼີມສະຫຼອງວັນຟຣັງໂກໂຟນີສາກົນ ພາຍໃຕ້ຫົວຂໍ້: “ແມ່ຍິງຟຣັງໂກໂຟນີ ແມ່ຍິງທີ່ມີຄວາມເຂັ້ມແຂງ”

ກະຊວງການຕ່າງປະເທດ ແລະ ກະຊວງສຶກສາທິການ ແລະ ກິລາ ຮ່ວມມືກັບພາກສ່ວນຕ່າງໆທີ່ກ່ຽວຂ້ອງໄດ້ຈັດງານສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ທີ່ມະຫາວິທະຍາໄລສະຫວັນນະເຂດ ເມື່ອບໍ່ດົນມານີ້ ​ໂດຍ​ພາຍ​ໃຕ້​ຫົວ​ຂໍ້: “ແມ່ຍິງຟຣັງໂກໂຟນີ ແມ່ຍິງທີ່ມີຄວາມເຂັ້ມແຂງ”, ຊຶ່ງການສະເຫຼີມສະຫຼອງໃນປີນີ້ແມ່ນເປັນປີຄົບຮອບ 51 ປີ ຂອງການສ້າງຕັ້ງອົງການຟຣັງໂກໂຟນີສາກົນ ແລະ ເປັນປີຄົບຮອບ 30 ປີ ແຫ່ງການເຂົ້າເປັນສະມາຊິກອົງການຟຣັງໂກໂຟນີສາກົນ ຂອງ ສປປ ລາວ.

ໂດຍເຂົ້າຮ່ວມ​ເປັນ​ປະທານ​ຂອງ ທ່ານ ຮສ. ປອ. ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ແລະ ທ່ານ ນາງ ຫຼິງທອງ ແສງຕາວັນ, ຮອງເຈົ້າ​ແຂວງ ​ແຂວງ​ສະຫວັນນະເຂດ ພ້ອມດ້ວຍບັນດາທູຕານຸທູດປະເທດທີ່​ນຳໃຊ້​ພາສາ​ຝຣັ່ງ ປະຈຳ ສປປ ລາວ, ຕາງໜ້າມະຫາວິທະຍາໄລຟຣັງໂກໂຟນີ (AUF) ປະຈໍາ ສປປ ລາວ, ບັນດາຄູອາຈານ ແລະ ນັກຮຽນ-ນັກສຶກສາທີ່ຮຽນພາສາຝຣັ່ງ ພາຍໃນແຂວງສະຫວັນນະເຂດ  ເຂົ້າຮ່ວມ 200 ກ່ວາທ່ານ.

ໃນໂອກາດພິທີສະເຫຼີມສະຫຼອງຄັ້ງນີ້ ທ່ານ ຮສ. ປອ. ພຸດ ສິມມາລາວົງ ໄດ້​ກ່າວ​ຄຳ​ເຫັນ ​ໂດຍ​ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນຂອງວັນຟຣັງ​ໂກ​ໂຟນີສາກົນ ແລະ ການຍົກສູງບົດບາດຂອງແມ່ຍິງຟຣັງໂກໂຟນີ ກໍຄືແມ່ຍິງລາວ ໃນການປະກອບສ່ວນເຂົ້າໃນວຽງານຕ່າງໆ ໂດຍສະເພາະໃນຂົງເຂດເສດຖະກິດ-ສັງຄົມ ແລະ ການສຶກສາ ແນໃສ່ເພື່ອສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ຮັບປະກັນຄວາມສະເໝີພາບ ຍິງ-ຊາຍ ຢູ່ໃນສັງຄົມ, ຊຶ່ງເປັນໜຶ່ງໃນວຽກງານບູລິມະສິດຂອງອົງການຟຣັງໂກໂຟນີສາກົນ ໃນໄລຍະປັດຈຸບັນ.

ນອກຈາກນັ້ນ, ທ່ານ ຍັງໄດ້ຍົກໃຫ້ເຫັນເຖິງຄວາມພະຍາຍາມ ແລະ ຄວາມເອົາໃຈໃສ່ ຂອງ ສປປ ລາວ ໃນການປະກອບສ່ວນສົ່ງເສີມການນຳໃຊ້ພາສາຝຣັ່ງ ກໍຄືການສົ່ງເສີມການສຶກສາຫຼັກສູດຫ້ອງຮຽນສອງພາສາລາວ-ຝຣັ່ງ ທີ່ມີຢູ່ໃນ 04 ແຂວງ ຂອງ ສປປ ລາວ ຄື: ນະຄອນຫຼວງວຽງຈັນ, ແຂວງຫຼວງພະບາງ, ແຂວງສະຫວັນນະເຂດ ແລະ ແຂວງຈຳປາສັກ.

ສໍາລັບ ງານສະເຫຼີມສະຫຼອງຄັ້ງນີ້ ບັນດາຜູ້ເຂົ້າຮ່ວມ ໄດ້ຊົມການສະແດງສິລະປະວັນນະຄະດີຂອງນ້ອງນັກຮຽນ-ນັກສຶກສາພາສາຝຣັ່ງ, ເຖິງໄດ້ຢ້ຽມຊົມການວາງສະແດງຮູບພາບ ແລະ ຂໍ້ມູນຂ່າວສານກ່ຽວກັບການເຄື່ອນໄຫວກິດຈະກຳຕ່າງໆຂອງຄູອາຈານ ແລະ ນັກຮຽນ-ນັກສຶກສາພາສາຝຣັ່ງ ຂອງ​ແຂວງ​ສະຫວັນນະເຂດ ໃນຂອບວຽກງານຟຣັງໂກໂຟນີ.

ຂໍ້ມູນ: ກະຊວງການຕ່າງປະເທດ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ