Vientiane Times Lao
ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມອບຮັບຕຳແໜ່ງລັດຖະມົນຕີຜູ້ໃໝ່

ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມອບຮັບຕຳແໜ່ງລັດຖະມົນຕີຜູ້ໃໝ່

ເລຂາທິການກົມການເມືອງສູນກາງພັກປະຊາຊົນປະຕິວັດລາວ ທ່ານ ບຸນຍັງ ວໍລະຈິດ ແລະ ນາຍົກລັດຖະມົນຕີ ທ່ານ ທອງລຸນ ສີສຸລິດ ໄດ້ຕົກລົງເຫັນດີ ແຕ່ງຕັ້ງ ທ່ານ ສຈ. ປອ ກິແກ້ວ ໄຂຄໍາພິທູນ ເປັນເລຂາຄະນະພັກ ແລະ ວ່າການລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແທນ ທ່ານ ສຈ. ດຣ ບໍ່ແສງຄຳ ວົງດາລາ ທີ່ໄດ້ອອກພັກການຮັບອູນໜູນບໍານານ.

ພິທີມອບ-ຮັບໜ້າທີ່ ເລຂາຄະນະພັກ, ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ລະຫວ່າງຜູ້ເກົ່າ ແລະ ວ່າການລັດຖະມົນຕີຜູ້ໃໝ່ ໄດ້ຈັດຂຶ້ນຢ່າງເປັນທາງການໃນຕອນເຊົ້າຂອງມື້ນີ້ 30/10/2019 ທີ່ຫໍວັດ ທະນະທຳແຫ່ງຊາດ, ນະຄອນຫຼວງວຽງຈັນ ໂດຍການເປັນປະທານ ຂອງທ່ານ ພັນຄຳ ວິພາວັນ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ແລະ ບັນດາການນຳຈາກກະຊວງພາຍໃນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຄະນະໂຄສະນາອົບຮົມສູນກາງພັກ ແລະ ອົງການອື່ນໆທີ່ກ່ຽວຂ້ອງເຂົ້າຮ່ວມ.

ກ່ອນທີ່ຈະມາຮັບໜ້າທີ່ໃໝ່ ທ່ານ ສຈ. ປອ ກິແກ້ວ ໄຂຄໍາພິທູນ ເປັນ ຄະນະເລຂາທິການສູນກາງພັກ, ເລຂາຄະນະພັກ ຫົວໜ້າຄະນະໂຄສະນາ ອົບຮົມສູນກາງພັກ ເນື່ອງຈາກວ່າຄວາມຮຽກຮ້ອງຕ້ອງການຂອງວຽກງານ ສະນັ້ນ ເລຂາທິການກົມການເມືອງສູນກາງພັກ ແລະ ນາຍົກລັດຖະມົນຕີ ໄດ້ແຕ່ງຕັ້ງໃຫ້ທ່ານ ກິແກ້ວ ໄຂຄໍາພິທູນ ມາຮັບໜ້າທີ່ໃໝ່ ແລະ ທ່ານ ກໍ່ໃຫ້ຄຳໜັ້ນສັນຍາວ່າຈະພະຍາຍາມສຸດຄວາມສາມາດໃນການນຳພາຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ປະສົບຜົນສຳເລັດໃນທຸກດ້ານ, ພ້ອມທັງຮຽກຮ້ອງມາຍັງພະນັກງານທຸກຄົນ ເພີ່ມທະວີການຮ່ວມ ມືໃນການພັດທະນາວຽກຕ່າງໆຂອງກະຊວງໃຫ້ກ້າວໜ້າໄປເລື້ອຍໆ.

ຂ່າວ: ວຽງຈັນທາຍ

ພາບ: ສັງຄົມໄຊ

Related Articles

Leave a Reply