Vientiane Times Lao
<strong>ກະຊວງປ້ອງກັນຄວາມສະຫງົບ ຍັງພົບບັນຫາການສອບສວນຄະດີອາຍາ ຊັກຊ້າແກ່ຍາວ</strong>

ກະຊວງປ້ອງກັນຄວາມສະຫງົບ ຍັງພົບບັນຫາການສອບສວນຄະດີອາຍາ ຊັກຊ້າແກ່ຍາວ

ກະຊວງປ້ອງກັນຄວາມສະຫງົບ ຍັງພົບຫຼາຍບັນຫາຫຍຸ້ງຍາກໃນການສືບສວນ-ສອບສວນຄະດີອາຍາຈຳນວນໜຶ່ງ ຍັງຊັກຊ້າແກ່ຍາວ, ບາງລາຍຄະດີ ການນຳໃຊ້ມາດຕະການສະກັດກັ້ນຍັງບໍ່ທັນຖືກຕາມກົດໝາຍ ກຳນົດໄວ້ ເຊັ່ນ: ການພາຕົວ, ການຈັບຕົວຜູ້ຕ້ອງຫາຖືກກັກຂັງເກີນກໍານົດ ແລະ ບັນຫາອື່ນໆ.

ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ໄດ້ກ່າວໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 22 ມິຖຸນາ 2022 ນີ້ວ່າ:

ສາເຫດທີ່ເຮັດໃຫ້ການດໍາເນີນຄະດີຊັກຊ້າ ເປັນຕົ້ນ: ການນຳໃຊ້ມາດຕະການສະກັດກັ້ນ ຕາມກົດໝາຍວ່າດ້ວຍການດຳເນີນຄະດີອາຍາ ໄລຍະປີ 2021 ຫາ 6 ເດືອນຕົ້ນປີ 2022 ພົບຄວາມຫຍຸ້ງຍາກຫຼາຍ ເພາະຕ້ອງໄດ້ປະຕິບັດມາດຕະການສະກັດກັ້ນຕາມກົດໝາຍ ໃຫ້ສອດຄ່ອງກັບມາດຕະການຕ້ານໂຄວິດ-19 ເຮັດໃຫ້ບາງຄະດີກໍຊັກຊ້າແກ່ຍາວ ເຊັ່ນ: ຄະດີພວກອາຊະຍາກອນ ແລະ ກຸ່ມຄົນບໍ່ດີໄດ້ເຄື່ອນໄຫວກໍ່ການກະທຳຜິດ ດ້ວຍຫຼາຍເລ່ຫຼ່ຽມ, ຫຼາຍວິທີການ ທີ່ມີລະດັບຮ້າຍແຮງແຕກຕ່າງກັນ ຊຶ່ງອັນທີ່ພົ້ນເດັ່ນ ແມ່ນຄະດີຢາເສບຕິດ, ສິ່ງຕິດພັນກັບການຄ້າອາວຸດເສິກ ແລະ ຟອກເງິນ ສ່ວນຫຼາຍມີການເຄື່ອນ ໄຫວເປັນກຸ່ມແກ້ງ, ມີເຄືອຂ່າຍເຊື່ອມໂຍງທັງພາຍໃນ ແລະ ຕ່າງປະເທດ. ນອກນັ້ນ ຄະດີຄາດຕະກຳ, ປຸ້ນຈີ້ຊີງຊັບ, ນຳໃຊ້ອາວຸດເສິກຕອບໂຕ້ກັບເຈົ້າໜ້າທີ່, ສວຍໃຊ້ຊ່ອງວ່າງທາງກົດໝາຍເພື່ອເຄື່ອນໄຫວ ໂດຍສະເພາະການກະທຳຜິດທາງເສດຖະກິດ, ການສໍ້ໂກງຊັບຂອງພົນລະເມືອງລາວ ເເລະ ຄົນຕ່າງປະເທດ ໂດຍຕິດພັນກັບຫວຍອອນລາຍ-ຫວຍເຖື່ອນ-ຕູ້ເກມ  ເເລະ ອື່ນໆ ເຮັດໃຫ້ການນໍາໃຊ້ບັນດາມາດຕະການສະກັດກັ້ນ ພົບຄວາມຫຍຸ້ງຍາກ ແລະ ຕ້ອງໄດ້ໃຊ້ເວລາໃນການຊອກຈັບກຸມ ເພື່ອນຳເອົາຜູ້ຕ້ອງຫາມາສູ່ຂະບວນຍຸຕິທຳ.

ທ່ານ ພົນຕີ ຄໍາກິ່ງ ຜຸຍຫຼ້າມະນີວົງ ຍັງໄດ້ກ່າວອີກວ່າ: ການປະຕິບັດບັນ ດາມາດຕະການສະກັດກັ້ນ ໄລຍະຜ່ານມາ ເປັນຕົ້ນ: ການພາຕົວ, ການກັກຕົວ, ການຈັບຕົວ ແລະ ອື່ນໆ ຊຶ່ງ ຜ່ານການຈັດຕັ້ງປະຕິບັດຕົວຈິງ ເຈົ້າໜ້າທີ່ຕຳຫຼວດສືບສວນ-ສອບສວນ ໄດ້ປະຕິບັດຖືກຕ້ອງຕາມຂັ້ນຕອນຂອງກົດໝາຍ, ໃນນັ້ນ ການກັກຕົວ ແລະ ຈັບຕົວ ແມ່ນມີຫຼັກຖານຢັ້ງຢືນໜັກແໜ້ນວ່າເປັນຜູ້ລົງມືກໍ່ການກະທໍາຜິດ ເຊັ່ນແມ່ນຄະດີຢາເສບຕິດ ແລະ ການກະທໍາຜິດອາຍາອື່ນໆ.

ກະຊວງປ້ອງກັນຄວາມສະຫງົບ ໄດ້ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ເດືອນ ກໍລະກົດ 2021 ຫາ ເດືອນ ພຶດສະພາ 2022 ສາມາດແກ້ໄຂ, ມ້າງຄະດີຢາເສບຕິດໃນຂອບເຂດທົ່ວປະເທດໄດ້ເຖິງ 4.094 ເລື່ອງ, ຈັບຜູ້ຕ້ອງຫາໄດ້ 5.818 ຄົນ, ຍິງ 618 ຄົນ, ຍຶດຢາເສບຕິດປະເພດຢາບ້າໄດ້ 177 ລ້ານກວ່າເມັດ, ນໍ້າໜັກລວມ 17.887,29 ກິໂລກຣາມ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ