ກະຊວງໂຍທາທິການ ແລະ ຂົນສົ່ງ ຈະຈັດງານສັບປະດາແຫ່ງຊາດ ດ້ານຄວາມປອດໄພທາງຫຼວງ ຫຼື Road Safety Week ຄັ້ງທີ VI ຂຶ້ນໃນວັນທີ 3 ເມສາ 2021 ທີ່ຈະມາເຖິງນີ້ຢູ່ເດີ່ນທາດຫຼວງ ນະຄອນຫຼວງວຽງຈັນ ພາຍໃຕ້ຫົວຂໍ້ “ຂັບຂີ່ປອດໄພ ຕ້ອງໃສ່ສາຍຮັດນິລະໄພ”
ທ່ານ ບຸນຕາ ອ່ອນນາວົງ ຫົວໜ້າກົມຂົ່ນສົ່ງ ທັງເປັນຫົວໜ້າກອງເລຂາ ຄະນະກຳມະການແຫ່ງຊາດ ດ້ານຄວາມປອດໄພທາງຫຼວງ ໄດ້ຖະແຫຼງຂ່າວກ່ຽວກັບການຈັດງານດັ່ງກ່າວ ເມື່ອບໍ່ດົນມານີ້ວ່າ: ພາຍໃນງານຈະມີກິດຈະກຳທີ່ຫຼາກຫຼາຍ ເປັນຕົ້ນແມ່ນກິດຈະກໍາການສາທິດການໃຊ້ສາຍຮັດນິລະໄພ, ກິດຈະກໍາການຖາມ-ຕອບ ກ່ຽວກັບບັນຫາການຂັບຂີ່ພາຫະນະທີ່ກໍ່ໃຫ້ເກີດອຸບັດຕິເຫດຕາມທາງຫຼວງ ແລະ ກິດຈະກຳອື່ນໆ ຄາດວ່າຈະມີຜູ້ຄົນເຂົ້າຮ່ວມ 1.000 ກວ່າ ຄົນ.
ປະຈຸບັນ ບັນຫາການເກີດອຸບັດເຫດທາງຫຼວງ ແມ່ນໄດ້ສ້າງຄວາມສູນເສຍຕໍ່ຊີວິດ ແລະ ຊັບສິນ ລວມທັງຄວາມເສຍຫາຍດ້ານເສດຖະກິດ ແລະ ການພັດທະນາຂອງຫຼາຍປະເທດໃນທົ່ວໂລກ. ອີງຕາມການລາຍງານຂອງອົງການອະນາໄມໂລກ ແຈ້ງໃຫ້ຮູ້ວ່າ: ໃນແຕ່ລະປີທົ່ວໂລກ ມີຜູ້ເສຍຊີວິດຈາກການເກີດອຸບັດເຫດທາງຖະໜົນ ສະເລ່ຍ 1,3 ລ້ານຄົນ ແລະ ບາດເຈັບຫລາຍກວ່າ 23 ລ້ານຄົນ, ລວມມູນຄ່າຄວາມເສຍຫາຍກວມເອົາ 3% ຂອງ GDP ໃນທົ່ວໂລກ ຫຼື ປະມານ 2,5 ພັນຕື້ໂດລາ.
ສໍາລັບ ຢູ່ສປປ ລາວ, ໃນປິ 2020 ຜ່ານມານີ້ ມີອຸບັດເຫດເກີດຂຶ້ນທັງໝົດ 6.774 ຄັ້ງ ໃນທົ່ວປະເທດ ແລະ ມີຜູ້ເສຍຊີວິດເຖິງ 1.031 ຄົນ ລວມມູນຄ່າເສຍຫາຍ 103 ຕື້ກວ່າກີບ.
ຂໍ້ມູນ: ຂ່າວສານປະເທດລາວ
ຮູບ: ໜ່ວຍກູ້ໄພ
