Vientiane Times Lao
ກະຊວງ ຮສສ ມີບົດບາດສໍາຄັນໃນການປົກປ້ອງສິດຜູ້ອອກແຮງງານ, ຜູ້ທີ່ມີຄຸນງາມຄວາມດີໃນການຕໍ່ສູ້ກູ້ຊາດ ແລະ ອື່ນໆ

ກະຊວງ ຮສສ ມີບົດບາດສໍາຄັນໃນການປົກປ້ອງສິດຜູ້ອອກແຮງງານ, ຜູ້ທີ່ມີຄຸນງາມຄວາມດີໃນການຕໍ່ສູ້ກູ້ຊາດ ແລະ ອື່ນໆ

ຕະຫລອດໄລຍະ 45 ປີ, ກະຊວງ ແຮງງານ ແລະ ສະຫວັດດີການສັງຄົມ (ຮສສ) ໄດ້ສຸມໃສ່ວຽກງານກ່ຽວຂ້ອງກ່ຽວກັບຂະແໜງຂອງຕົນຢ່າງຕັ້ງໜ້າ ໂດຍສະເພາະກ່ຽວກັບການພັດທະນາສີມືແຮງງານລາວທີ່ມີຄວາມຮູ້-ຄວາມສາມາດ, ໄດ້ປົກປ້ອງສິດຜົນປະໂຫຍດຂອງ ພະນັກງານ-ອ້າຍນ້ອງກໍາມະກອນລາວ ແລະ ຜູ້ທີ່ມີຄຸນງາມຄວາມດີໃນການຕໍ່ສູ້ກູ້ຊາດ ແລະ ອື່ນໆ.

 ລັດຖະມົນຕີ ກະຊວງ ຮສສ ທ່ານ ຄຳແພງ ໄຊສົມແພງ ໄດ້ໃຫ້ສໍາພາດຕໍ່ສື່ມວນຊົນລາເມື່ອບໍ່ດົນມານີ້ກ່ຽວກັບ 45 ປີຂອງກະຊວງ ຮສສ ພາຍໃຕ້ການນໍາພາຂອງພັກວ່າ: ນັບແຕ່ ປະເທດຊາດໄດ້ຮັບການປົດປ່ອຍໃນວັນທີ 2 ທັນວາ 1975, ຕະຫຼອດໄລຍະ 45 ປີຜ່ານມາ, ກະຊວງ ຮສສ ໄດ້ມີການພັດທະນາ ແລະ ມີບົດບາດສໍາຄັນໃນການຊ່ວຍເຫຼືອສັງຄົມໃນການລະດົມທຶນ, ເຄື່ອງອຸປະໂພກ ແລະ ບໍລິໂພກຊ່ວຍຜູ້ປະສົບໄພທໍາມະຊາດ ລວມທັງການປົກປ້ອງສິດຜົນປະໂຫຍດ ຂອງພະນັກງານບໍານານຜູ້ເສຍອົງຄະ, ວິລະຊົນແຫ່ງຊາດ, ນັກຮົບແຂ່ງຂັນ, ຜູ້ເສຍສະຫຼະຊີວິດ ໃນພາລະກິດປະຕິວັດ ຕໍ່ສູ້ປົດປ່ອຍຊາດ ໄດ້ຮັບການຕອບບຸນແທນຄຸນຕາມເງື່ອນໄຂ, ຜູ້ພິການ ແລະ ຜູ້ສູງອາຍຸໄດ້ຮັບການພັດທະນາດີຂຶ້ນເທື່ອລະກ້າວ; ພະນັກງານ-ລັດຖະກອນ, ທະຫານ, ຕໍາຫຼວດ ແລະ ຜູ້ອອກແຮງງານໃນຂົງເຂດວິສາຫະກິດ ມີຫຼັກຄໍ້າປະກັນສິດຜົນປະໂຫຍດທາງດ້ານປະກັນສັງຄົມ ນັບມື້ເພີ່ມຂຶ້ນ, ປະຊາຊົນລາວບັນດາເຜົ່າ ຜູ້ປະສົບໄພພິບັດທາງທຳມະຊາດ, ຜູ້ດ້ອຍໂອກາດ ແລະ ຜູ້ຍົກຍ້າຍຖິ່ນຖານ ກໍໄດ້ຮັບການຊ່ວຍເຫຼືອສົງເຄາະຈາກພາກລັດ ແລະ ສັງຄົມຢ່າງເໝາະສົມ. ຄຽງຄູ່ກັນນັ້ນ, ກໍໄດ້ສ້າງ ແລະ ປັບປຸງນິຕິກຳຕ່າງໆ ທີ່ເປັນເຄື່ອງມືໃນການຄຸ້ມຄອງລັດ ດ້ານແຮງງານ ແລະ ສະຫວັດດີການສັງ ຄົມ ໃຫ້ມີປະສິດທິຜົນດີຂຶ້ນ, ພ້ອມທັງໄດ້ເອົາໃຈໃສ່ພັດທະນາສີມືແຮງງານ ແລະ ສົ່ງເສີມການຈັດຫາວຽກເຮັງານທຳ ຕາມຄວາມຕ້ອງການຂອງຕະຫຼາດແຮງງານ ໄດ້ໂດຍພື້ນຖານ, ລະບົບປະກັນສັງຄົມທົ່ວປະເທດ ໄດ້ຮັບການພັດທະນາ ແລະ ຂະຫຍາຍການປົກຄຸມຫຼາຍຂຶ້ນ.

ທ່ານ ຄຳແພງ ໄຊສົມແພງ ຍັງໃຫ້ຮູ້ອີກວ່າ: ປັດຈຸບັນ, ມາດຕະຖານສີມືແຮງງານແຫ່ງຊາດ ຖືກສ້າງຕັ້ງຂຶ້ນບົນພື້ນຖານຄວາມຈຳເປັນ ແລະ ຄວາມຕ້ອງການຂອງຕະຫຼາດແຮງງານ ທັງໝົດ 32 ສາ ຂາອາຊີບ, ໃນນັ້ນ ປະກອບມີ ຂະແໜງກໍ່ສ້າງ, ຂະແໜງເຕັກໂນໂລຊີຂໍ້ມູນຂ່າວສານ ແລະ ສື່ສານ, ຂະແໜງໂຮງແຮມ ແລະ ທ່ອງທ່ຽວ, ຂະແໜງລົດຍົນ, ຂະແໜງປູກຝັງ ແລະ ລ້ຽງສັດ; ທົ່ວປະເທດມີຫົວໜ່ວຍວິສາຫະກິດ ເຂົ້າເປັນສະມາຊິກ ກອງທຶນປະກັນສັງຄົມທັງໝົດ 2.448 ຫົວໜ່ວຍ, ມີຜູ້ປະກັນຕົນທັງພາກລັດ ແລະ ເອກະຊົນ ເຂົ້າເປັນສະມາຊິກ 312.000 ກວ່າຄົນ ແລະ ໄດ້ຂະຫຍາຍຕາໜ່າງຂໍ້ມູນຂ່າວສານຕະຫຼາດແຮງງານ ໄດ້ 18 ແຂວງ ແລະ ອື່ນໆ.

ຂໍ້ມູນ: ຂປລ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ