Vientiane Times Lao
ກັກຕົວໄດ້ແລ້ວຜູ້ຖືກຫາຕົວະເດັກນ້ອຍຂຶ້ນລົດໄປເອົາເງິນນໍາ, ເຫດເກີດຢູ່ບ້ານເມືອງນ້ອຍ

ກັກຕົວໄດ້ແລ້ວຜູ້ຖືກຫາຕົວະເດັກນ້ອຍຂຶ້ນລົດໄປເອົາເງິນນໍາ, ເຫດເກີດຢູ່ບ້ານເມືອງນ້ອຍ

ພະແນກຕໍາຫຼວດສືບຂ່າວອາຍາ ປກສ ນະຄອນຫຼວງວຽງຈັນແຈ້ງໃຫ້ຮູ້ວ່າ: ເຈົ້າໜ້າທີ່ສະເພາະກິດ ປກສ ເມືອງໄຊເສດຖາ ສາມາດກັກຕົວໄດ້ແລ້ວເມື່ອບໍ່ດົນມານີ້, ຜູ້ຖືກຫາຕົວະເດັກນ້ອຍຂຶ້ນລົດໄປເອົາເງິນນໍາຫຼັງຈາກທີ່ຊື້ເຂົ້າສານຈໍານວນ 4 ເປົາ ແລະ ໄຂ່ 4 ແຕະໂດຍໃຊ້ລົດເກງສີດໍາ ບໍ່ຕິດປ້າຍທະບຽນໃນການກໍ່ເຫດ. ເຫດເກີດເມື່ອວັນທີ 23 ກໍລະກົດ 2020 ຢູ່ບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ, ຜູ້ຖືກຫາຊື່ນາງຄໍາຫຼ້າ ອາຍຸ 32 ປີ, ອາຊີບວ່າງງານ ຢູ່ບ້ານນາດີ ເມືອງສິງ ແຂວງຫຼວງນໍ້າທາ ຊຶ່ງປັດຈຸບັນ ພັກເຊົາຢູ່ເຮືອນພັກ ບ້ານໜອງໜ້ຽວ ເມືອງສີໂຄດຕະບອງ ນະຄອນຫຼວງວຽງຈັນ.

ຜູ້ຖືກຕົວະ ຊື່ທ້າວ ວົງພະຈັນ ຫຼື ຕິກຕຸກ ອາຍຸ 13 ປີ ນັກຮຽນ ຢູ່ບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ ລາວໄດ້ກ່າວວ່າ: ຕົນໄດ້ຂຶ້ນລົດໄປນໍາຜູ້ຍິງຄົນດັ່ງກ່າວເພື່ອໄປເອົາເງິນ, ແຕ່ພໍໄປຮອດທາງຮ່ອມຂ້າງສູນກາງຊາວໜຸ່ມ ບ້ານໂພນທັນ ເມືອງໄຊເສດຖາ, ຍິງຄົນດັ່ງກ່າວໄດ້ບອກໃຫ້ລາວລົງຈາກລົດເພື່ອລໍຖ້າແລ້ວຈະມາຮັບ. ແຕ່ເວລາຜ່ານໄປໄດ້ປະມານ 1 ຊົ່ວໂມງ ກໍ່ບໍ່ເຫັນຜູ້ກ່ຽວມາຮັບຕາມທີ່ເວົ້າ, ຕົນຈຶ່ງໄດ້ຍ່າງກັບຄືນ ແລະ ໃນລະຫວ່າງທາງ ກໍ່ພົບເຫັນໝູ່ຄົນບ້ານດຽວກັນຂີ່ລົດຈັກກາຍມາພໍດີ, ຈຶ່ງຂໍຊ້ອນທ້າຍກັບເຮືອນນໍາ.

ນາງຄໍາຫຼ້າ ໄດ້ຍອມຮັບສາລະພາບວ່າ: ຕົນໄດ້ຕົວະເດັກນ້ອຍຂີ່ລົດມາເອົາເງິນນໍາແທ້ຫຼັງຈາກທີ່ຊື້ເຂົ້າສານຈໍານວນ 4 ເປົາ, ເມື່ອຂີ່ໄປຮອດທາງຮ່ອມຂ້າງສູນກາງຊາວໜຸ່ມກໍ່ໄດ້ຈອດລົດໃຫ້ເດັກນ້ອຍລົງຖ້າຢູ່ບ່ອນນັ້ນ ແລ້ວຕົນກໍ່ຂັບລົດໜີໄປທາງສີໄຄ ພໍຮອດເຂດບ້ານໜອງໜ້ຽວ ຈຶ່ງໄດ້ໂທລະສັບໃຫ້ຊາຍຄົນໜື່ງມາຮັບເອົາເຂົ້າສານນໍາຕົນ ເພື່ອໄປຂາຍໃຫ້ກໍາມະກອນຢູ່ສວນກ້ວຍ ເມືອງຫິນເຫີບ ແຂວງວຽງຈັນ ແລະກໍ່ກັບເຂົ້າມາບ່ອນພັກ ພໍຮອດເວລາ 20:00 ໂມງ ຈຶ່ງຖືກເຈົ້າໜ້າທີ່ກັກຕົວ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ