ໂຄງການກໍ່ສ້າງ ຂົວຂ້າມນ້ຳຂອງ ກ້ອນຕື່ນ – ຫ້ວຍແກ້ວ ເມືອງປາກທາ ແຂວງບໍ່ແກ້ວເປັນໂຄງການທີ່ນຳໃຊ້ງົບປະມານການລົງທຶນຂອງລັດຖະບານ ສປປ ລາວເຊິ່ງແມ່ນ ກົມຂົວທາງ ກະຊວງໂຍທາທິການ ແລະ ຂົນສົ່ງ ( MPWT) ເປັນເຈົ້າຂອງໂຄງການ ແລະ ລັດວິສະຫາກິດ ວິສາວະກຳ ຄົມມະນາຄົມ ( LTEC) ເປັນວິສະວະກອນທີ່ປືກສາຕິດຕາມກໍ່ສ້າງ ແລະ ບໍລິສັດ ລັດວິສາຫະກິດ ກໍ່ສ້າງ ຄົມມະນາຄົມ (SECC) ເປັນຜູ້ຮັບເໝົາກໍ່ສ້າງ ຮອດປັນຈຸບັນນີ້ສໍາເລັດແລ້ວຫຼາຍກວ່າ 79%.
ທ່ານ ໄມເທບ ວົງວິໄລ ຮອງຫົວໜ້າໂຄງການກໍ່ສ້າງຂົວດັ່ງກ່າວໄດ້ລາຍງານກ່ຽວກັບການກໍ່ສ້າງຂົວດັ່ງກ່າວເມື່ອມໍ່ໆມານີ້ວ່າ: ຂົວດັ່ງກ່າວເປັນຂົວແບບປະສົມ, ພາກສ່ວນເທິງເປັນຂົວໂຄງສ້າງເຫຼັກ, ພາກສ່ວນລຸ່ມເປັນເສົາເບຕົງເສີມເຫຼັກ, ໂຄງສ້າງພາກສ່ວນເທິງ ເປັນຂົວເສີມເຫຼັກ, ລວງຍາວ 505 ແມັດ, ມີທັງໝົດ 7 ຊ່ວງ, ຄວາມກ້ວາງທັງໝົດຂອງຂົວ 12,12 ແມັດ, ຄວາມກວ້າງໜ້າຂົວ 7,90 ແມັດ, ມີ 2 ເລັນລົດແລ່ນ, ມີທາງຄົນຍ່າງ 2 ເບື້ອງ, ເບື້ອງລະ 1,825 ເເມັດ, ແຜ່ນພື້ນໜ້າຂົວປູດ້ວບເບຕົງເສີມເຫຼັກ ຄວາມໜາສະເລ່ຍ 25 ຊມ.
ທ່ານ ໄມເທບ ຍັງໃຫ້ຮູ້ຕື່ມວ່າ: ຕໍ່ກັບການກໍ່ສ້າງຂົວຂ້າມນ້ຳຂອງກ້ອນຕື່ນ-ຫ້ວຍແກ້ວຄັ້ງນີ້ ຍັງພົບບັນຫາຂໍ້ຫຍຸ້ງຍາກຫຼາຍສົມຄວນເປັນຕົ້ນກໍ່ແມ່ນ: ຍ້ອນໂຄງການຕັ້ງຢູ່ເຂດພູດອຍ ຫ່າງໄກຈາກຕົວເມືອງ ເຮັດໃຫ້ການຂົນສົ່ງວັດສະດຸເຂົ້າມາກໍ່ສ້າງມີຄວາມຫຍຸ້ງຍາກ, ຍ້ອນການແຜ່ລະບາດຂອງພະຍາດໂຄວິດ 19 ເຮັດໃຫ້ການສັນຈອນໄປມາຂອງພະນັກງານພົບຄວາມຫຍຸ້ງຍາກ, ລະດັບນ້ຳຂອງຂື້ນລົງບໍ່ປົກກະຕິ ເຮັດໃຫ້ການກໍ່ສ້າງຂົວພົບຄວາມຫຍຸ້ງຍາກສົມຄວນ.
ພາບ-ຂ່າວ: ວັນນະເດດ ວິໄລຄຸນ
ການກໍ່ສ້າງຂົວ ຂ້າມນ້ຳຂອງ ກ້ອນຕື່ນ – ຫ້ວຍແກ້ວ ສໍາເລັດແລ້ວຫຼາຍກ່ວາ 79%" />
