Vientiane Times Lao
ການຈອດລົດຂາຍເຄື່ອງຊະຊາຍຢູ່ຕາມແຄມທາງ ພາໃຫ້ການສັນຈອນແອອັດ ຜິດຕໍ່ລະບຽບກົດໝາຍການສັນຈອນ

ການຈອດລົດຂາຍເຄື່ອງຊະຊາຍຢູ່ຕາມແຄມທາງ ພາໃຫ້ການສັນຈອນແອອັດ ຜິດຕໍ່ລະບຽບກົດໝາຍການສັນຈອນ

ປະຈຸບັນ,  ເຈົ້າໜ້າທີ່ເມືອງໄຊເສດຖານະຄອນຫຼວງວຽງຈັນພວມເລັ່ງແກ້ໄຂບັນຫາການຈອດລົດຂາຍເຄື່ອງຊະຊາຍຕາມແຄມທາງ ທີ່ເຮັດໃຫ້ກີດຂວາງການຈະລາຈອນທາງບົກ, ພາໃຫ້ຫຍຸ້ງຍາກໃນການສັນຈອນ ແລະ ອາດນໍາໄປສູ່ການເກີດອຸບັດຕິເຫດຕາມທ້ອງຖະໜົນ.
ເຈົ້າໜ້າທີ່ ປກສ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ປະຈຸບັໄດ້ມີການນໍາໃຊ້ພະຫານະ ນໍາເອົາເຄື່ອງມາຂາຍຊະຊາຍຕາມແຄມທາງ, ຊຶ່ງພາໃຫ້ຫຍຸ້ງຍາກສັບສົນໃນການສັນຈອນທາງບົກ ແລະ ຜິດຕໍ່ລະບຽບກົດໝາຍຈະລາຈອນທາງບົກ, ໃນນັ້ນເຈົ້າໜ້າທີ່ຕໍາຫຼວດ ກໍ່ໄດ້ມີການກ່າວເຕືອ,ກັກຕົວໄປສຶກສາອົບຮົມ ແລະປັບໃໝຕາມລະບຽບກົດໝາຍ ຜູ້ທີ່ຂາຍເຄື່ອງຊະຊາຍຕາມແຄມທາງ.
ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ອິກວ່າ: ໄລຍະຜ່ານມາ, ໄດ້ນຳຕົວ ທ້າວ ພູຂັນ ອາຍຸ 41 ປີ ບ້ານທາດຫຼວງເໜືອ ໄປສຶກສາອົບຮົມ ພາຍຫຼັງຜູ້ກ່ຽວໄດ້ຈອດລົດຂາຍເຄື່ອງຊະຊາຍຕາມແຄມທາງ ໜ້າໂຮງໝໍເມືອງໄຊເສດຖາ ເຂດບ້ານຫົວຂົວ, ເຊິ່ງຜູ້ກ່ຽວໄດ້ໃຊ້ລົດກະບະຮຸນໄດບັນທຸກໝາກໄມ້ຕາມລະດູການ.
ຜ່ານການສອບສວນ ທ້າວ ພູຂັນ ສາລະພາບວ່າ: ໄດ້ມາຂາຍໝາກໄມ້ຕາມລະດູຢູ່ແຄມທາງເຂດບ້ານຫົວຂົວແທ້ ໂດຍສະເພາະ ຢູ່ໜ້າໂຮງໝໍເມືອງໄຊເສດຖາ ແລະ ໜ້າວັດຫົວຂົວ, ເຊິ່ງເລີ່ມຂາຍແຕ່ປີ 2015 ເປັນຕົ້ນມາ, ໂດຍໃຊ້ຮູບການໄປຊື້ໝາກໄມ້ຕາມລະດູ ເຊັ່ນ: ໝາກກ້ຽງ, ໝາກໂມ ແລະ ໝາກແຕງ ໃສ່ລົດກະບະຮຸນໄດ ແລ້ວມາຈອດຂາຍຕາມແຄມທາງ; ໃນການຈອດລົດນັ້ນ ໄດ້ເອົາຕີນລົດດ້ານໜຶ່ງຂຶ້ນຟຸດບາດ ແລະ ອີກດ້ານໜຶ່ງແມ່ນຢຽບເສັ້ນທາງກວມເອົາໜ້າທາງປະມານ 60 ຊັງຕີແມັດ ຫາ 1 ແມັດ ໂດຍການຈອດບາງຄັ້ງ ແມ່ນຈອດລົດຢູ່ທາງເຂົ້າໜ້າໂຮງໝໍເລີຍ ແລະ ຂາຍໃນເວລາປະມານ 7-8 ໂມງເຊົ້າ ຫາ 20:00 ໂມງ.
ການກະທໍາຂອງຜູ້ກ່ຽວມີເຈດ ຕະນາຈອດລົດຂາຍໝາກໄມ້ ຢູ່ໃນບໍລິເວນໜ້າໂຮງໝໍເມືອງໄຊເສດຖາແທ້ ໂດຍຂາຍມາໄດ້ຫຼາຍປີ ແລະ ຖືກສຶກສາອົບ ຮົມມາແລ້ວຫຼາຍຄັ້ງ, ເຊິ່ງຂັດຕໍ່ຄໍາສັ່ງຂອງເຈົ້າເມືອງໄຊເສດຖາ ສະບັບເລກທີ 003, ລົງວັນທີ 15 ກັນຍາ 2020, ແຕ່ຜູ້ກ່ຽວ ກໍບໍ່ປະຕິບັດ, ຍັງດື້ດ້ານກັບຄືນມາຈອດລົດຂາຍໝາກໄມ້ຢູ່ບໍລິເວນດັ່ງກ່າວຄືເກົ່າ.
ນອກນັ້ນ, ການກະທໍາດັ່ງກ່າວໄດ້ເຮັດໃຫ້ກີດຂວາງການສັນຈອນ ອັນເປັນເຫດທີ່ພາໃຫ້ການສັນຈອນແອອັດ(ລົດຕິດ) ເຮັດໃຫ້ມີຄວາມສັບສົນ ແລະ ສັງຄົມ ບໍ່ມີຄວາມສະຫງົບ, ເຫັນວ່າ: ຜູ້ກ່ຽວຜິດໃນສະຖານການກີດ ຂວາງການຈະລາຈອນທາງບົກ ໃນມາດຕາ 144 ຂອງປະມວນກົດໝາຍອາຍາ ແຫ່ງ ສປປ ລາວ ຈຶ່ງໄດ້ເຮັດບົດບັນ ທຶກກ່າວເຕືອນ ແລະປັບໃໝຕາມລະບຽບກົດໝາຍ ຖ້າກໍລະນີກັບໄປລະເມີດອີກ ແມ່ນຈະດຳເນີນຄະດີຕາມກົດໝາຍ.

ຂ່າວ-ພາບ: ປກສ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ