Vientiane Times Lao
ການພົວພັນລາວ-ຈີນໄດ້ຮັບການເສີມຂະຫຍາຍຢ່າງຕັ້ງໜ້າ

ການພົວພັນລາວ-ຈີນໄດ້ຮັບການເສີມຂະຫຍາຍຢ່າງຕັ້ງໜ້າ

ປະທານສະພາແຫ່ງຊາດຂອງລາວໄດ້ກ່າວໃນ ງານສະເຫຼີມສະຫຼອງວັນຊາດ ສປ ຈີນ ຄົບຮອບ 70 ປີ ໃນທີ 27/09/2019 ວ່າ ການພົວພັນສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ໄດ້ຮັບການເສີມຂະຫຍາຍຢ່າງຕັ້ງໜ້າໂດຍໄດ້ມີການແລກປ່ຽນ ການໄປມາຫາສູ່ກັນຂອງຜູ້ນໍາຂັ້ນສູງຂອງສອງປະເທດ ລາວ ແລະ ຈີນ.
ທ່ານ ນາງ ປານີ ຢາທໍ່ຕູ້ ກໍາມະການ ກົມ ການເມືອງສູນກາງພັກ, ປະທານ ສະພາແຫ່ງຊາດ ລາວໄດ້ກ່າວວ່າ “ຕະຫຼອດ ໄລຍະຜ່ານມາການພົວພັນຂອງສອງຊາດ ລາວ-ຈີນ ໄດ້ຮັບການເສີມຂະຫຍາຍ ໂດຍການໄປມາຫາສູ່ ຂອງການນຳທັງສອງປະເທດ ເພື່ອສົ່ງເສີມການຮ່ວມມື ດ້ານການເມືອງ, ເສດຖະກິດ, ການປ້ອງກັນຊາດ, ປ້ອງກັນ ຄວາມສະຫງົບ, ວັດທະນະທໍາ-ສັງຄົມ ແລະ ສິ່ງແວດລ້ອມ”
ວຽກງານດັ່ງກ່າວຍັງໄດ້ຮັບການເສີມ ຂະຫຍາຍຢ່າງຕັ້ງໜ້າ ຕາມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາລາວ-ຈີນ, ຈີນ-ລາວທີ່ໄດ້ຮັບການລົງນາມ ໂດຍ ເລຂາທິການໃຫຍ່ຂອງສອງປະເທດ ລາວ-ຈີນ ທີ່ເປັນພື້ນຖານໃຫ້ແກ່ ການພົວພັນລາວ-ຈີນ ໃນໄລຍະໃໝ່.

ສະຖານທູດຈີນປະຈໍາລາວ ໄດ້ຈັດ ງານລ້ຽງສະເຫຼີມສະຫຼອງວັນຊາດຈີນ ຄົບຮອບ 70 ປີ ໃນອາທິດທີ່ ຜ່ານມາ ຢູ່ ນະຄອນຫຼວງວຽງຈັນ.
ທ່ານ ຈ່ຽງ ຈາຍດົ່ງ ເອກອັກຄະລັດ ຖະທູດຈີນ ປະຈໍາລາວໄດ້ກ່າວ ບາງຕອນວ່າ: ຕະຫຼອດໄລຍະ 70 ປີທີ່ຜ່ານມາ, ພາຍໃຕ້ການຊີ້ນໍາ ນຳພາທີ່ເຂັ້ມແຂງຂອງພັກກອມມູນິດຈີນ ໂດຍມີທ່ານ ສີ ຈິ້ນຜິງ ເປັນແກນນຳ ໄດ້ສາມັກຄີ ແລະ ນໍາພາປະຊາຊົນ ຈີນບັນດາເຜົ່າໃນທົ່ວປະເທດ, ຜ່ານຜ່າຄວາມຫຍຸ້ງຍາກ ຊຸກຍູ້ສົ່ງເສີມ ພາລະກິດພັກ ແລະ ປະເທດໄດ້ຮັບ ຜົນສຳເລັດ ກາຍເປັນການປະຕິຮູບ ແຫ່ງປະຫວັດສາດ ເຮັດໃຫ້ເສດຖະກິດຈີນໃຫຍ່ອັນດັບ 2 ຂອງໂລກ, ການເຕີບໂຕຂອງເສດຖະກິດໂລກຫຼາຍກ່ວາ 30 ເປີເຊັນ ແລະ ໄດ້ນຳພາປະ ຊາຊົນຈີນຫຼາຍກວ່າ 700 ລ້ານຄົນ ຫຼຸດພົ້ນອອກຈາກຄວາມທຸກຍາກ ແລະ ປະກອບ ສ່ວນຫຼາຍກ່ວາ 70 ເປີເຊັນໃນການຫຼຸດຜ່ອນຄວາມທຸກຍາກທົ່ວ ໂລກ.
ຕົວເລກດັ່ງກ່າວ ສະແດງໃຫ້ເຫັນຕົ້ນກໍາເນີດ ແລະ ພາລະກໍາຂອງພັກ ກອມມູນິດຈີນ, ກໍຄືເພື່ອ ສະແຫວງ ຫາຄວາມຜາສຸກຂອງປະຊາຊົນຈີນ, ຟື້ນຟູຄວາມຈະເລີນຮຸ່ງເຮືອງຂອງປະຊາຊົນຈີນ ແລະ ຄວາມປອງດອງກົມກຽວຂອງຊາວໂລກ.
ທ່ານທູດຍັງກ່າວຕື່ມອີກວ່າ, ຕໍ່ຜົນສໍາເລັດດັ່ງກ່າວ, ຝ່າຍຈີນຍັງໄດ້ຮ່ວມ ກັບຝ່າຍລາວ ສົ່ງເສີມຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ”, ກໍ່ສ້າງ ເສັ້ນທາງລົດໄຟລາວ-ຈີນ ແລະ ແລວເສດຖະກິດລາວ-ຈີນ.
ທ່ານ ນາງປານີ ໄດ້ສະແດງ ຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດອັນໃຫຍ່ຫຼວງຮອບດ້ານຂອງ ສປ ຈີນຕະຫຼອດໄລຍະ 70 ປີ.
ເຂົ້າຮ່ວມງານດັ່ງກ່າວຍັງມີບັນດາທ່ານລັດຖະມົນຕີ, ຮອງລັດຖະມົນຕີ, ທູຕານຸທູດ, ຊາວຈີນທີ່ດຳລົງຊີວິດໃນ ສປປ ລາວ ແລະ ແຂກທີ່ຖືກເຊີນຈາກຂະແໜງການຕ່າງໆ.

Related Articles

Leave a Reply