Vientiane Times Lao
ການລະບາດຂອງພະຍາດໂຄວິດ-19 ຢູ່ຫຼາຍແຂວງຈະກ້າວເຂົ້າສູ່ລະດັບສູງສຸດ

ການລະບາດຂອງພະຍາດໂຄວິດ-19 ຢູ່ຫຼາຍແຂວງຈະກ້າວເຂົ້າສູ່ລະດັບສູງສຸດ

ປັດຈຸບັນນີ້ຫຼາຍແຂວງຂອງປະເທດລາວໄດ້ມີຜູ້ຕິດເຊື້ອໃນຊຸມຊົນເປັນຈໍານວນຫຼາຍໂດຍສະເພາະຢູ່ແຂວງຄໍາມ່ວນ, ສະຫວັນນະເຂດ, ຈໍາປາສັກ, ສາລະວັນ ແລະ ບໍ່ແກ້ວ ຊຶ່ງຖືກຈັດຢູ່ໃນລະດັບສອງຂອງການແຜ່ເຊື້ອ ແລະ ອາດຈະກ້າວເຂົ້າສູ່ລະດັບສາມ ໃນໄວໆນີ້ ຊຶ່ງເປັນລະດັບສູງສຸດ ຫຼື ຮ້າຍແຮງສຸດ.

ທ່ານ ດຣ. ລັດສະໝີ ວົງຄໍາຊາວ ຮອງຫົວໜ້າກົມພະຍາດຕິດຕໍ່ກະຊວງສາທາລະນະສຸກ ໄດ້ລາຍງານເມື່ອວັນທີ 14 ກັນຍາ 2021  ຜ່ານມາ ກ່ຽວກັບສະພາບການແຜ່ລະບາດຂອງພະຍາດໂຄວິດ-19 ຢູ່ ສປປ ລາວວ່າ: ສະພາບການແຜ່ລະບາດຂອງພະຍາດດັ່ງກ່າວຢູ່ລາວ ລວມທັງທົ່ວໂລກຍັງບໍ່ມີຄວາມໄວ້ວາງໃຈ ແລະ ຍັງບໍ່ຮູ້ວ່າພະຍາດດັ່ງກ່າວຈະສິ້ນສຸດມື້ໃດ ເພາະຫຼາຍແຂວງຂອງປະເທດລາວຖືກຈັດຢູ່ໃນລະດັບສອງຂອງການລະບາດ ພ້ອມທັງຈະກ້າວເຂົ້າສູ່ລະດັບສາມ ຊຶ່ງທາງຄະນະສະເພາະກິດໄດ້ຈັດລະດັບການລະບາດຂອງພະຍາດໂຄວິດ-19 ຢູ່ 4 ລະດັບ ຄື: ສູນ ຫາສາມ : ລະດັບສູນ ແມ່ນບໍ່ພົບການລະບາດຂອງພະຍາດດັ່ງກ່າວ, ລະດັບໜຶ່ງແມ່ນພົບຜູ້ຕິດເຊື້ອຈາກກໍລະນີນໍາເຂົ້າ, ລະດັບສອງແມ່ນພົບຜູ້ຕິດເຊື້ອໃນຊຸມຊົນ ແລະ ລະດັບສາມແມ່ນ ການແຜ່ລະບາດໃນຊຸມຊົນອອກເປັນວົງກ້ວາງ ຊຶ່ງຫຼາຍແຂວງກໍາລັງມີການລະບາດຂອງພະຍາດດັ່ງກ່າວນີ້ຢູ່ໃນລະດັບສອງ ແລະ ຫຼາຍແຂວງມີທ່າອ່ຽງຈະກ້າວໄປສູ່ລະດັບສາມ.

ທ່ານ ດຣ. ລັດສະໝີໃຫ້ຮູ້ຕື່ມວ່າ: ສະເພາະປະເທດທີ່ມີຜູ້ຕິດເຊື້ອພະຍາດດັ່ງກ່າວຫຼາຍກວ່າໝູ່ໃນໂລກຍັງແມ່ນປະເທດສະຫະລັດ ອາເມຣິກາ, ຮອງລົງມາແມ່ນປະເທດອິນເດຍ ແລະ ປະເທດບຣາຊິນ ຕາມລໍາດັບ. ປັດຈຸບັນນີ້ປະເທດທີ່ມີຊາຍແດນຕິດກັບປະເທດລາວນັ້ນ ຍັງແມ່ນປະເທດໄທທີ່ມີຜູ້ຕິດເຊື້ອເປັນອັນດັບໜຶ່ງ, ຮອງລົງມາແມ່ນ ສສ ຫວຽດນາມ.

ຂ່າວ: ວຽງຈັນທາຍ  

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ