Vientiane Times Lao
ການລະບາດຂອງພະຍາດໂຄວິດ 19 ຢູ່ແຂວງຫຼວງພະບາງ ສ່ວນໃຫຍ່ແມ່ນເກີດຈາກງານໃນສັງຄົມ

ການລະບາດຂອງພະຍາດໂຄວິດ 19 ຢູ່ແຂວງຫຼວງພະບາງ ສ່ວນໃຫຍ່ແມ່ນເກີດຈາກງານໃນສັງຄົມ

ພະແນກສາທາລະນະສຸກແຂວງຫຼວງພະບາງແຈ້ງໃຫ້ຮູ້ວ່າ: ຮອດວັນທີ 18 ຕຸລາ 2021 ນີ້, ແຂວງຫຼວງພະບາງ ມີຜູ້ຕິດເຊື້ອສະສົມຈາກພະຍາດໂຄວິດ-19 ທັງໝົດແລ້ວ 1.873 ຄົນ, ໃນນີ້ ແມ່ນຕິດເຊື້ອພາຍໃນ 1.819 ຄົນ, ນໍາເຂົ້າ 54 ຄົນ, ເສຍຊີວິດສະສົມ 1 ຄົນ, ປິ່ນປົວຫາຍດີອອກໂຮງໝໍແລ້ວ 347 ຄົນ ຊຶ່ງຜູ້ຕິດເຊື້ອສ່ວນ ໃຫຍ່ໃນຊຸມຊົນພາຍໃນຢູ່ແຂວງຫຼວງພະບາງເກີດຈາກງານໃນ ສັງຄົມທີ່ລະບຸ ໃນຂໍ້ຫ້າມຂອງຄະນະສະເພາະກິດ ເປັນຕົ້ນ ງານຊາປະນະກິດສົບ ຫຼື ງານສົ່ງສະການ ແລະ ການຊຸມແຊວ ຮູບແບບຕ່າງໆ.

 ພະແນກສາທາລະນະສຸກແຂວງຫຼວງພະບາງແຈ້ງໃຫ້ຮູ້ຕື່ມວ່າ: ພາຍໃນແຂວງມີສູນຈໍາກັດບໍລິເວນທີ່ເປີດນຳໃຊ້ຢູ່ ມີທັງໝົດ 24 ສູນ ຢູ່ 11 ເມືອງ ແລະ ນະຄອນ ຫຼວງພະບາງ, ສະຖານທີ່ປິ່ນປົວຂັ້ນແຂວງ 2 ແຫ່ງ ແລະ ຢູ່ເມືອງ 5 ເມືອງ, ທັງພວມກະກຽມໄວ້ແຕ່ລະເມືອງຕື່ມ. ສະພາບການລະບາດຂອງພະຍາດດັ່ງກ່າວຢູ່ແຂວງຫຼວງພະບາງ ເຫັນວ່າມີການຕິດເຊື້ອເພີ່ມຂື້ນຢ່າງໄວວາ, ຕໍ່ເນື່ອງ, ທັງແຜ່ລາມເປັນວົງກ້ວາງຖ້າທຽບໃສ່ໄລຍະຜ່ານມາ ໂດຍມີການແຜ່ລາມອອກໄປຫຼາຍເມືອງ, ຫຼາຍບ້ານ, ລວມໄປຫາທຸກສາຂາອາຊິບ ນັບມື້ຫຼາຍຂື້ນ, ເຮັດໃຫ້ພື້ນທີ່ເຂດສ່ຽງ ທີ່ມີການລະບາດຂອງພະຍາດ ຫຼື ບ້ານແດງ ລວມມີ 77 ບ້ານ ໃນນັ້ນ ຢູ່ນະຄອນ ຫຼວງພະບາງ 36 ບ້ານ, ເມືອງນໍ້າບາກ 14 ບ້ານ, ເມືອງງອຍ 13 ບ້ານ, ເມືອງຊຽງເງີນ 6 ບ້ານ, ເມືອງຈອມເພັດ 2 ບ້ານ, ເມືອງປາກອູ 3 ບ້ານ, ເມືອງນານ 1 ບ້ານ ແລະ ເມືອງວຽງຄໍາ 1 ບ້ານ. ສະເພາະ ເມືອງປາກອູ ແລະ ນະຄອນ ຫຼວງພະບາງ, ມາຮອດປະຈຸບັນ ສະຖານທີ່ຮອງຮັບໃນການຈຳກັດບໍລິເວນຜູ້ສຳຜັດໃກ້ຊິດ, ລວມທັງສະຖານທີ່ປິ່ນປົວຜູ້ຕິດເຊື້ອເລີ່ມແອອັດ, ຈຶ່ງຈຳເປັນຕ້ອງໄດ້ຂະຫຍາຍສູນຕື່ມ ທັງຈຳເປັນຕ້ອງໄດ້ເພີ່ມເຈົ້າໜ້າທີ່ປະຈຳສູນ ລວມທັງແພດໝໍ ແລະ ງົບປະມານເພື່ອແກ້ໄຂການລະບາດຂອງພະຍາດໃຫ້ທັນການ.

ຂ່າວ: ອາພຸດເດດ ບຸບຜາ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ