Vientiane Times Lao
ການລະບາດຂອງພະຍາດໂຄວິດ-19 ຢູ່ທົ່ວໂລກຍັງສືບຕໍ່ເພີ່ມຂຶ້ນ

ການລະບາດຂອງພະຍາດໂຄວິດ-19 ຢູ່ທົ່ວໂລກຍັງສືບຕໍ່ເພີ່ມຂຶ້ນ

ຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຍັງຄຸມເຂັ້ມກ່ຽວກັບການປ້ອງກັນພະຍາດໂຄວິດ-19 ຢູ່ແຕ່ລະຈຸດຂອງປະເທດລາວໂດຍສະເພາະການ ກວດກາຄົນເຂົ້າ-ອອກ ຢູ່ດ່ານຕ່າງໆທີ່ຍັງອະນຸຍາດໃຫ້ເປີດຢູ່ ໂດຍສະເພາະຢູ່ດ່ານສາກົນຕ່າງໆ ໂດຍມີການແທກອຸນຫະພູມຮ່າງກາຍ ທຸກໆຄົນທີ່ເຂົ້າ-ອອກ ແລະ ໄດ້ເກັບຕົວຢ່າງມາກວດ ແລ້ວນຳສົ່ງໄປຫາສະຖານທີ່ຈຳກັດບໍລິເວນທີ່ກຳນົດໄວ້ຈົນກ່ວາຈະຄົບກຳນົດ 14 ວັນ.

ສະເພາະການແຜ່ລະບາດຂອງພະຍາດໂຄວິດ-19 ໃນໂລກ ຍັງໝ້າເປັນຫ່ວງ, ອິງຕາມແຈ້ງການຂອງ ຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເມື່ອວັນທີ 15 ກັນຍາທີ່ຜ່ານມາພົບວ່າ: ພະຍາດດັ່ງກ່າວ ຍັງແຜ່ລະບາດເປັນວົງກວ້າງຢູ່ທົ່ວໂລກ ຊຶ່ງເພີ່ມຂຶ້ນຢ່າງຕໍ່ເນື່ອງ, ບໍ່ມີທ່າອ່ຽງຈະຫຼຸດລົງ ແລະ ມີຜູ້ຕິດເຊື້ອທັງໝົດແລ້ວ ຫຼາຍກວ່າ 29 ລ້ານຄົນ, ສະເພາະວັນທີ 14 ກັນຍາ ພຽງວັນດຽວ ມີຜູ້ຕິດເຊື້ອເພີ່ມຂຶ້ນເຖິງ 237.754 ຄົນ, ໃນນັ້ນອາເມຣິກາ ມີຜູ້ຕິດເຊື້ອຫລາຍເປັນດັບໜຶ່ງຂອງໂລກ ຄືມີທັງໝົດ 6.685.975ຄົນ, ເພີ່ມຂຶ້ນໃນມື້ດຽວເຖິງ 33.463ຄົນ, ອິນເດຍ ມີຜູ້ຕິດເຊື້ອທັງໝົດ 4.926.914ຄົນ, ເພີ່ມຂຶ້ນ 80.487ຄົນ, ເບຼຊິນ ມີຜູ້ຕິດເຊື້ອ 4.349.544ຄົນ, ເພີ່ມຂຶ້ນ 19.089ຄົນ.

ສ່ວນກຸ່ມປະເທດສະມາຊິກອາຊຽນ ຟິລິບປິນ ມີຜູ້ຕິດເຊື້ອ 265.888ຄົນ, ເພີ່ມຂຶ້ນ 4.672ຄົນ, ອິນໂດເນເຊຍ ມີຜູ້ຕິດເຊື້ອ 221.523ຄົນ, ເພີ່ມຂຶ້ນ 3.141ຄົນ, ສິງກະໂປ ຕິດເຊື້ອ 57.454ຄົນ.

ສະເພາະ ສປປ ລາວ ນັບແຕ່ມີການແຜ່ລະບາດຂອງພະຍາດດັ່ງກ່າວພົບຜູ້ຕິດເຊື້ອພະຍາດດັ່ງກ່າວ 23 ຄົນ ຊຶ່ງ 22 ຄົນແມ່ນປິ່ນປົວຫາຍດີແລ້ວ ຍັງມີແຕ່ຜູ້ ທີ 23 ທີ່ຍັງສືບຕໍ່ຮັກສາປິ່ນປົວຢູ່ ໂຮງໝໍມິດຕະພາບຫຼັງພົບເຊື້ອໃນວັນທີ 10 ກັນຍາທີ່ຜ່ານມາ. ສັງລວມແລ້ວ ຜູ້ຕິດເຊື້ອຢູ່ລາວ ແມ່ນຜູ້ເດີນທາງມາແຕ່ຕ່າງປະເທດ ບໍ່ພົບພະຍາດດັ່ງກ່າວທີ່ແຜ່ເຊື້ອໂດຍກົງຢູ່ພາຍໃນປະເທດ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ