ການແຂ່ງຂັນກິລາບານສົ່ງໃນຮົ່ມ ຊາຍ-ຍິງ ເບຍລາວ ບານສົ່ງ ລາວລີກ 2024 ຫຼື Laos Volleyball League 2024 ຈະແຂ່ງຂັນໃຫ້ສໍາເລັດ ໃນວັນທີ 10 ພະຈິກ 2024 ພາຍຫຼັງການແຂ່ງຂັນເປີດສາກຂຶ້ນຢ່າງເປັນທາງການໃນ ວັນທີ 28 ກັນຍາ 2024 ທີ່ສະໂມສອນກິລາໃນຮົ່ມກອງທັບ (ຫຼັກ5) ເມືອງໄຊເຊດຖາ ນະຄອນຫຼວງວຽງຈັນ.
ການແຂ່ງຂັນ ທັງຍິງ ແລະ ຊາຍ ແມ່ນແຂ່ງຂັນຮອບດຽວໃນຮອບຂາໄປ ທຸກທີມ ຈະໄດ້ພົບກັນໝົດຄັດເລືອກເອົາທີມທີ່ມີຄະແນນດີທີ່ສຸດເປັນແຊ້ມ ແລະ ແຂ່ງຂັນສະເພາະແຕ່ວັນເສົາ-ອາທິດ, ໂດຍມີ 15 ສະໂມສອນເຂົ້າຮ່ວມແຂ່ງຂັນລາຍການນີ້ ໃນນັ້ນ ມີທີມຊາຍ 10 ສະໂມສອນ ແລະ ທີມຍິງ 5 ສະໂມສອນ ຄື:
ທີມຊາຍ ປະກອບມີ: ສະໂມສອນກະຊວງປ້ອງກັນປະເທດ ຫຼື ກອງທັບ, ສະໂມສອນລາວສະກາຍເວ, ສະໂມສອນ ໂກຣ-ອັບ (Grow-UP), ສະໂມສອນອິນເທັນເຊີນ, ສະໂມສອນ ວຽງຈັນ ວີຊີ, ສະໂມສອນ ສັນນິວາດ ວີຊີ,ສະໂມສອນ ແບັກບຸດເຕີຟາຍ Black Butterfly, ສະໂມສອນ ຈັນທິລາດ ວີຊີ, ສະໂມສອນ ນະຄອນຫຼວງ-Inthasone VC ແຊ໋ມເກົ່າ ແລະ ສະໂມສອນ ເອັມພີຊີ ບລູ ຮາວາຍ. ສ່ວນທີມຍິງປະກອບມີ: ສະໂມສອນ ກອງທັບ, ສະໂມສອນ ກົມໃຫຍ່ການເມືອງກອງທັບ, ສະໂມສອນ ວຽງຈັນ ວີຊີ, ສະໂມສອນ ເອດສເອັນເຄ ໄຊເສດຖາ ວີຊີ ແລະ ສະໂມສອນເອັດອີຊີ ວີຊີ.
ການແຂ່ງຂັນຄັ້ງນີ້ ແມ່ນເນັ້ນໃສ່ພັດທະນາກິລາບານສົ່ງຂອງລາວ ພ້ອມທັງເປັນການຄັດເລືອກນັກກິລາບານສົ່ງ ຊາຍ-ຍິງ ຜູ້ທີ່ໄດ້ມາດຖານຄົບຖ້ວນຂອງກິລາບານສົ່ງ ເພື່ອເຂົ້າຝຶກຊ້ອມ ແລະ ບັນຈຸເປັນນັກກິລາທີມຊາດ ກະກຽມເຂົ້າຮ່ວມການແຂ່ງຂັນຊີເກມຄັ້ງທີ 33 ທີ່ປະເທດໄທ ເປັນເຈົ້າພາບ ແລະ ລາຍການແຂ່ງຂັນຕ່າງໆໃນລະດັບພາກພື້ນ ແລະ ສາກົນ.
ສ່ວນລາງວັນການແຂ່ງຂັນປະເພດຊາຍ: ຊະນະເລີດ ຈະໄດ້ຮັບຂັນ 1 ໜ່ວຍ, ຫຼຽນຄຳ ແລະ ເງິນສົດ 30 ລ້ານກີບ, ຮອງຊະນະເລີດ ໄດ້ຫຼຽນເງິນ ແລະ ເງິນສົດ 20 ລ້ານກີບ ແລະ ອັນດັບທີ 3 ໄດ້ຫຼຽນທອງ ແລະ ເງິນສົດ 17 ລ້ານກີບ. ສ່ວນປະເພດຍິງ: ຊະນະເລີດ ຈະໄດ້ຮັບຂັນ 1 ໜ່ວຍ, ຫຼຽນຄໍາ ແລະ ເງິນສົດ 20 ລ້ານກີບ, ຮອງຊະນະເລີດ ໄດ້ຫຼຽນເງິນ ແລະ ເງິນສົດ 15 ລ້ານກີບ ແລະ ອັນດັບທີ 3 ໄດ້ຫຼຽນທອງ ແລະ ເງິນສົດ 12 ລ້ານກີບ, ນອກນັ້ນ ຍັງມີລາງວັນອື່ນໆ ລວມເງິນລາງວັນຫຼາຍກວ່າ 290 ລ້ານກີບ.
ພິທີເປີດການແຂ່ງຂັນຄັ້ງນີ້ ມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ Paul BARTMAN National Sale and Channel Dirtector ຜູ້ອຳນວຍການຝ່າຍຂາຍ ແລະ ຊ່ອງທາງການຈັດຈຳໜ່າຍ ບໍລິສັດ ເບຍລາວ ຈໍາກັດ, ທ່ານ ຈັນສະໝອນ ພ່ອງຈັນທາ ປະທານສະຫະພັນບານສົ່ງແຫ່ງຊາດລາວ ພ້ອມດ້ວຍພາຍສ່ວນກ່ຽວຂ້ອງເຂົ້າຮ່ວມ, ຊຶ່ງໃນພິທີ ຍັງໄດ້ມີການມອບການສະໜັບສະໜູນການແຂ່ງຂັນຈາກ 2 ບໍລິສັດ ຄື: ບໍລິສັດ ເບຍລາວ ຈໍາກັດ ມອບ 400 ລ້ານກວ່າກິບ ແລະ ກຸ່ມບໍລິສັດ ບຸນນໍາພາ ຈໍາກັດ ມອບເງິນ 50 ລ້ານກີບ.
