ການແຂ່ງຂັນ ລາວ ຟຸດຊໍ ລີກ ປະຈຳປີ 2025 LAO FUTSAL LEAGUE 2025 ຈະເລີ່ມເປີດສາກຢ່າງເປັນທາງການໃນວັນເສົາວັນທີ 26 ເມສາ 2025 ນີ້ ແລະ ຈະປິດລົງໃນວັນທີ 26 ກໍລະກົດ 2025 ຊຶ່ງການແຂ່ງຂັນແຕ່ລະນັດ ຈະໃຊ້ສະໜາມກິລາໃນຮົ່ມ ສູນຝຶກຫ້ວຍຫົງ ສະຫະພັນບານເຕະແຫ່ງຊາດລາວ (ສຕລ).
ອີງຕາມຂໍ້ມູນສະຫະພັນບານເຕະແຫ່ງຊາດລາວ, ການແຂ່ງຂັນລາຍການນີ້ ມີ12 ທີມ ປະກອບມີ: ທີມ ເບ ສະຫວັນ (ແຊ້ມເກົ່າ), ຄິງດ້ອມ & ເອັສທີທີ ເອັຟຊີ, ເໜືອ-ໃຕ້, ຊີທີເອ ພາວເວີ້, ນະຄອນຫຼວງ, ວີເຊີນ ຢູໄນເຕັດ,ອາສາ ພາວເວີ້, ເຄເອັມທີ ເອັຟຊີ, ຈັນສີ, ລະຊະຕະ, ວີພີຊີ ເອັຟຊີ ແລະ ມະຫາວິທະຍາໄລວິທະຍາສາດສຸຂະພາບ.
ຮູບແບບການແຂ່ງຂັນຄັ້ງນີ້ແມ່ນແຂ່ງຂັນແບບລີກພົບກັນໝົດ1 ຮອບ ສະສົມຄະແນນ ແລ້ວຄັດເລືອກເອົາສະໂມສອນ ອັນດັບ 1 ແລະ 2 ເຂົ້າຮອບ 4 ທີມໂດຍອັດຕະໂນມັດ, ສ່ວນອັນດັບ 3-6 ແມ່ນປະຄົບຄູ່ແຂ່ງຂັນຮອບຕົກແລ້ວຄັດອອກ( Play-off) ນັດດຽວ, ສ່ວນທີມ ທີ່ຊະນະຈະໄດ້ຜ່ານເຂົ້າສູ່ຮອບ 4 ທີມ ໂດຍຈະພົບກັບທີມອັນດັບ 1 ແລະ ອັນດັບ 2 ທີ່ເປັນທີມຢືນ, ຮອບ 4 ທີມ ແລະ ຮອບຊີງຊະນະເລີດ ຕາມລຳດັບ.
ສ່ວນເງິນລາງວັນຊະນະເລີດ ແມ່ນຈະໄດ້ຮັບເງິນ 50 ລ້ານກີບ, ຮອງຊະນະເລີດ ອັນດັບ 1 ໄດ້ຮັບເງິນ 25 ລ້ານກີບ ແລະ ຮອງຊະນະເລີດອັນດັບ 2 ໄດ້ຮັບເງິນ 10 ລ້ານກີບ ແລະ ລາງວັນອື່ນໆ ອີກ.
ສຳລັບ ສະໂມສອນ ທີ່ຊະນະເລີດຈະຄວ້າສິດເປັນຕົວແທນສະໂມສອນ ຈາກ ສປປ ລາວ ເຂົ້າຮ່ວມລາຍການພາກພື້ນ ແລະ ສາກົນ.
ທີ່ມາ: ສຕລ
