ກຸ່ມບໍລິສັດ ດວງດີ ຈໍາກັດ ມອບລົດຈັກ ຈໍານວນ 10 ຄັນ ມູນຄ່າ 300 ລ້ານກີບ ພ້ອມດ້ວຍເງິນສົດ 100 ລ້ານກີບ ໃຫ້ແກ່ແຂວງຈຳປາສັກ ເພື່ອປະກອບສ່ວນໃນການເຄື່ອນໄຫວວຽກງານສະກັດກັ້ນ, ກັນການລະບາດ ແລະ ຄວບຄຸມພະຍາດ ໂຄວິດ-19.
ພິທີມອບ-ຮັບ ການຊ່ວຍເຫຼືອດັ່ງກ່າວ ຈັດຂຶ້ນໃນວັນທີ 30 ເມສາ 2020 ຢູ່ຫ້ອງວ່າການປົກຄອງແຂວງຈໍາປາສັກ ເຊີ່ງມອບໂດຍ ທ່ານ ອຸດອນ ແກ້ວດວງດີ ປະທານກຸ່ມບໍລິສັດ ດວງດີ ຈໍາກັດ, ແລະ ໃຫ້ກຽດຮັບໂດຍ ທ່ານ ປອ ວິໄລວົງ ບຸດດາຄໍາ ເຈົ້າແຂວງຈໍາປາສັກ.
ມາເຖິງປະຈຸບັນ ມີຫຼາຍພາກສ່ວນໄດ້ປະກອບສ່ວນທັງເປັນວັດຖຸ ແລະ ເງິນສົດ ໃຫ້ແກ່ວຽກງານຕ້ານພະຍາດໂຄວິດ-19 ຢູ່ແຂວງຈໍາປາສັກ.
ສໍາລັບຢູ່ ສປປ ລາວ ນັບມາຮອດ ວັນທີ 30 ເມສາ 2020 ຈໍານວນຜູ້ຕິດເຊື້ອພະຍາດ ໂຄວິດ-19 ສະສົມ ຍັງເປັນ 19 ຄົນເທົ່າເດີມ ໃນນີ້ ປີ່ນປົວຫາຍດີແລ້ວ 8 ຄົນ ແລະ ຍັງສືບຕໍ່ປີ່ນປົວ 11 ຄົນ ຢູ່ໂຮງໝໍມິດຕະພາບ ນະຄອນຫຼວງວຽງຈັນ.
ຂ່າວ: ວຽງຈັນທາຍ (ແຫຼ່ງຂ່າວ ໜັງສືພິມຈໍາປາໃໝ່)
ພາບ: ທູນທອງໃຈ
