ກົມຄຸ້ມຄອງແຮງງານ, ກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ການໃຊ້ແຮງງານເດັກຢູ່ ສປປ ລາວ ອາດຈະເພີ່ມຂຶ້ນ ຍ້ອນວ່າພໍ່ແມ່ຂອງພວກເຂົາໄດ້ມີການຢຸດງານເນື່ອງຈາກການແຜ່ລະບາດຂອງພະຍາດໂຄວິດ-19 ເຊີ່ງບາງຄັ້ງເດັກອາດເຮັດວຽກເກີນເວລາ ຫຼື ເຮັດວຽກໜັກເກີນໄປຈົນເຂົ້າຂ່າຍເປັນ ການໃຊ້ແຮງງານເດັກໂດຍສະເພາະເຮັດວຽກຢູ່ໃນຂົງເຂດທີ່ເປັນອັນຕະລາຍຕໍ່ເດັກ ໂດຍສະເພາະຂົງ ເຂດການກໍ່ສ້າງ ແລະ ຂົງເຂດບໍ່ແຮ່ ໃນນີ້ເດັກຢູ່ເຂດຊົນນະບົດແມ່ນໜ້າເປັນຫ່ວງຫຼາຍກວ່າເດັກຢູ່ຕົວເມືອງ ຍ້ອນຄວາມຫຍຸ້ງຍາກທາງດ້ານເສດຖະກິດຄອບຄົວ.
ກົມຄຸ້ມຄອງແຮງງານໃຫ້ຮູ້ຕື່ມອີກວ່າ: ຜ່ານການຕິດຕາມກວດກາຈາກຂະແໜງຄຸ້ມຄອງແຮງງານ ເຫັນວ່າ ການໃຊ້ແຮງ ງານຢູ່ລາວຍັງມີລັກສະນະເຂົ້າຂ່າຍເປັນການໃຊ້ແຮງງານເດັກແຕ່ບໍ່ຮຸນແຮງຄືຫຼາຍປະເທດ ແລະ ເປັນເລື່ອງຍາກທີ່ຈະກຳນົດໄດ້ວ່າຈໍານວນທີ່ເຂົ້າຂ່າຍເປັນການໃຊ້ແຮງງານເດັກໃນແຕ່ລະປີມີຫຼາຍປານໃດ ຍ້ອນບັນດາຜູ້ໃຊ້ແຮງງານບໍ່ໃຫ້ການຮ່ວມມືສະໜອງຂໍ້ມູນດີເທົ່າທີ່ຄວນ ເຖີງວ່າຂະແໜງຄຸ້ມຄອງແຮງງານ ຕ້ອງການຂໍ້ມູນເພື່ອຊ່ວຍປັບປຸງໃຫ້ການໃຊ້ແຮງງານເດັກຂອງຜູ້ໃຊ້ແຮງງານຢູ່ລາວເຂົ້າສູ່ລະບົບຢ່າງຖືກຕ້ອງຕາມລະບຽບການທີ່ກໍານົດໄວ້ກໍ່ຕາມ. ການສໍາຫຼວດກ່ຽວກັບການໃຊ້ແຮງງານເດັກຢູ່ ສປປ ລາວ ເກີດ ຂຶ້ນຫຼ້າສຸດ ໃນປີ 2010, ໃນເວລານັ້ນ ມີເດັກປະມານ 265.000 ຄົນ ທີ່ເປັນເດັກເຮັດວຽກເສດຖະກິດ, ໃນນີ້ ມີປະມານ 170.000 ຄົນ ທີ່ເຮັດວຽກເຂົ້າຂ່າຍເປັນການໃຊ້ແຮງງານເດັກ ເຊີ່ງ 90% ແມ່ນເຮັດວຽກເກີນ ເວລາໃນຂະແໜງກະສິກໍາ.
ຂໍ້ມູນ: ມົດແດງນ້ອຍ
