ກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດ ກະຊວງປ້ອງກັນຄວາມສະຫງົບ ອອກແຈ້ງການມື້ວັນທີ 11 ຕຸລາທີ່ຜ່ານມາເຖິງຫົວໜ້າກົມຕໍາຫຼວດກວດຄົນເຂົ້າ-ອອກ ເມືອງ, ກົມໃຫ່ຍສັນຕິບານໃນຂອບເຂດທົ່ວປະເທດໃຫ້ຊ່ວຍສະກັດກັ້ນ ແລະ ຈັບກຸມບຸກຄົນທີ່ພົວພັນກັບການທໍາອະນາຈານເດັກ ທີ່ໄດ້ມີການປ່ອຍວິດີໂອລາມົກອະນາຈານ ອອກຕາມສື່ສັງຄົມອອນລາຍຕ່າງໆໃນໄລຍະ 2-3 ວັນທີ່ຜ່ານມາ ທີ່ເປັນຄົນຈີນ ຊື່ທ້າວ Run An Xiao Baiyun Distrit ເມືອງກວາງໂຈ ມົນທົນກວາງຕຸ້ງ ສປ ຈີນ ແລະ ນາງດວງຕາ ເບີກໄຊຍະພູມ ອາຍຸ 25 ປີ, ສັນຊາດລາວ ຢູ່ບ້ານ ດອນສາງໄຜ່ ເມືອງປາກງື່ມ ນະຄອນຫລວງວຽງຈັນ.
ການແຈ້ງການຈັບກຸມບຸກຄົນດັ່ງກ່າວນີ້ຍ້ອນວ່າ ທັງສອງຄົນມີການຮ່ວມມືໃນການທໍາອະນາຈານເດັກ ຊຶ່ງລະເມີດກົດໝາຍ, ລະບຽບການ ແລະ ຮິດຄອງປະເພນີຂອງລາວ. ເມື່ອຈັບພວກກ່ຽວແລ້ວໃຫ້ແຈ້ງມາຍັງກົມຕໍາຫຼວດສະກັດກັ້ນ ແລະ ຕ້ານການຄ້າມະນຸດເພື່ອຈະດໍາເນີນການສືບສວນ-ສອບສວນຕາມຂັ້ນຕອນຂອງກົດໜາຍ.
ຂ່າວ: ວຽງຈັນທາຍ
