Vientiane Times Lao
ຂຸນເຫຼັກ ນ໋ອກນັກມວຍໄທຍົກ 3 ລາຍການເສິກນະຄອນຫຼວງ-ກໍກຽດແດນຈຳປາ 

ຂຸນເຫຼັກ ນ໋ອກນັກມວຍໄທຍົກ 3 ລາຍການເສິກນະຄອນຫຼວງ-ກໍກຽດແດນຈຳປາ 

ແຊ໋ມສາຍແອວຫົວໜ້າພະແນກສຶກສາທິ ການ ແລະ ກິລາ ນະຄອນຫຼວງວຽງຈັນ (ນວ) ຮຸ່ນນໍ້າໜັກ 55 ກິໂລກຣາມ, ຂຸນເຫຼັກ ຂວັນໃຈຄ້າຍມວຍເຈົ້າຖິ່ນ ສະໂມສອນ ຄໍາເສັງ (ມຸມສີແດງ) ໄລ່ຟັນສອກໃສ່ ເພັດໂພໄຊ ສໍສີຣີນທາ ນັກມວຍຈາກຄ້າຍ ມວຍດັງແຂວງໜອງຄາຍ ປະເທດໄທ ຫຼົ້ມລຸກຂຸຄາມ ຖືກກຳມະການກາງເວ ທີນັບເຖິງ 2 ຄັ້ງ ໃນຍົກ 2 ແລະ ຍົກ 3 ກ່ອນຈະຖືກໝັດເຂົ້າເຕັມໆໜ້າຫຼັບກາງ ເວທີ ໃນການແຂ່ງຂັນມວຍຄູ່ເອກ ຮຸ່ນນໍ້າ ໜັກ 59 ກິໂລກຣາມ ລາຍການເສີກ ນະຄອນຫຼວງ-ກໍກຽດແດນຈຳປາ ປະຈຳປີ 2020. 

ການແຂ່ງຂັນມວຍດັ່ງກ່າວ ໂດຍຄ້າຍມວຍ ດັງ ສໍສີຣິນທາ ຈາກແຂວງໜອງຄາຍ ຍົກທັງຄ້າຍມວຍ ຂ້າມແມ່ນໍ້າຂອງປະທະກັບ ນັກຊົກນະຄອນຫຼວງວຽງຈັນ ທັງໝົດ 6 ຄູ່ ໃນຄັ້ງນີ້ ມີຂຶ້ນໃນວັນທີ 11 ມັງກອນ ຜ່ານມາ ທີ່ສັງວຽນມວຍ ສະຫະພັນມວຍລາວ ນະຄອນຫຼວງວຽງຈັນ ບ້ານບຶງຂະຫຍອງ ເມືອງສີສັດຕະນາກ, ໃນຈຳນວນ 6 ຄູ່ ມີການນ໋ອກກັນເຖິງ 5 ຄູ່ ໂດຍສະເພາະມວຍຄູ່ເອກ ລະຫວ່າງ ຂຸນເຫຼັກ ສະໂມສອນ ຄຳເສັງ ເຈົ້າຂອງແຊ໋ມສາຍແອວຫົວໜ້າພະແນກສຶກສາທິການ ແລະ ກິລາ ນວ ພົບກັບ ເພັດໂພໄຊ ສໍສີຣີນທາ ຮຸ່ນນໍ້າໜັກ 59 ກິໂລກຣາມ ຄູ່ດັ່ງກ່າວ ຂຸນເຫຼັກ ມີການຕໍ່ນໍ້າໜັກ 1 ກິໂລກຣາມ.

ຜ່ານການແຂ່ງຂັນຜົນປະກົດວ່າ ນັກ ກິລາທັງສອງຊາດໄດ້ອອກອາວຸດໃສ່ກັນແບບເຈັບໆ ຍ່າງເຂົ້າຫາກັນເຕະທັກທ່າຍກັນຢ່າງ ໜັກໜ່ວງ ແລະ ເຂົ້າ ປະທະໃສ່ກັນຢ່າງດຸ ເດືອດ ໄດ້ໃຈກອງເຊຍໃນສະໜາມເຊຍກັນ ສຽງດັງຢ່າງສະນັ່ນຫວັ່ນໄຫວ ໂດຍສະເພາະ ລູກເຕະຂອງ ເພັດໂພໄຊ ສາດເຂົ້າລຳຕົວ ຂອງ ຂຸນເຫຼັກ ສຽງດັງຟັງຊັດ ຢ່າງເຈັບປວດ ແຕ່ກໍບໍ່ສະທ້ານຫົວໃຈຂອງ ຂຸນເຫຼັກ  ແຖມຂຸນເຫຼັກ ຍ່າງເຂົ້າຫາໃຊ້ປະສົບການ ປະທະຢ່າງສຸດມັນ ສົມເປັນແຊ໋ມ ສາຍແອວຫົວໜ້າພະແນກສຶກສາທິການ ແລະ ກິລາ ນວ ຮຸ່ນນໍ້າໜັກ 55 ກິໂລກຣາມ.

ຍົກທີ 2 ທັງສອງກໍ່ໄດ້ມີການແກ້ທາງມວຍ ມາດີ ໂດຍສະເພາະທາງ ເພັດໂພໄຊ ໃຊ້ແຄ່ງ ຕາມດ້ວຍໝັດແຖມເຖິງ ສອງສາມຄັ້ງ ຫຼິ້ນເອົາ ຂຸນເຫຼັກຫງາຍໜ້າຕ້ອງຖອຍຫຼັງຕັ້ງ ຫຼັກກ່ອນ ແຕ່ບໍ່ພໍເທົ່າໃດນາທີ ຂຸນເຫຼັກ ກໍ່ມາເອົາຄືນຈັ່ງຫວະເຂົ້າຕີວົງໃນ ອາໃສໃຊ້ ສອກປັກເຂົ້າກົກຫູຂອງ ເພັດໂພໄຊ ລົ້ມລົງ ໄປນອນກອງກັບພື້ນ ໃຫ້ກຳມະການນັບ 1 ຮອດ 8 ແຕ່ ເພັດໂພໄຊ ຊ້ອມມາດີຟື້ນຕົວ ທັນ ບີບເອົາຫົວໃຈອ້າຍລ້ຽງຈາກໄທນັ່ງ ກົ້ນບໍ່ຕິດຕັ່ງ ຕ້ອງໄດ້ເລັ່ງແກ້ທາງມວຍ ຊ່ວຍທັນທີ ກ່ອນເພັດໂພໄຊ ຈະເລືອດຂຶ້ນ ໜ້າຍ່າງເຂົ້າຫາປະທະອາວຸດຢ່າງຄົບເຄື່ອງ ກັບ ຂຸນເຫຼັກ ຢ່າງດຸເດືອດ ກ່ອນທີ່ລະຄັງ ຈະດັງກ່ອນ ເຮັດໃຫ້ທັງສອງຕ້ອງມາດວນ ກັນຕໍ່ໃນຍົກທີ 3 ພໍແຕ່ລະຄັງດັງຂຶ້ນຄວາມ ແຄ້ນຝັງໃຈ ເພັດໂພໄຊ ໃຊ້ແຄ່ງ ແລະ ໝັດກະໜໍ່າສາດໃສ່ ຂຸນເຫຼັກຢ່າງຕໍ່ເນື່ອງ ໂດຍທີ່ບໍ່ໄດ້ລະວັງຕົວ ເຊິ່ງຂຸນເຫຼັກ ຫຼ່ຽມ ມວຍດີສັງເກດເຫັນ ເພັດໂພໄຊ ເປີດໜ້າກໍ່ ໃຊ້ສອກສັບເຂົ້າເຕັມຄາງນອນກອງລົງກັບ ພື້ນໃຫ້ກຳມະການນັບຮອດ 8 ອີກຄັ້ງໜຶ່ງ  ແລະ ຟື້ນຕົວຂຶ້ນມາອີກຕື່ມ. ທັງສອງຍັງຍ່າງເຂົ້າຫາກັນ ແລະ ກໍ່ເປັນ ຝ່າຍຂຸນເຫຼັກ ທີ່ເຫັນຈຸດອ່ອນ ໄລ່ຟັນສອກ ຊ້າຍ-ສອກຂວາ ຫຼາຍຄັ້ງເຮັດໃຫ້ກອງເຊຍ ໄດ້ເຊຍກັນຢ່າງມ່ວນຊື່ນ ສ່ວນເພັດໂພໄຊ ໄດ້ແຕ່ໃຊ້ສອງມືອຸບໜ້າກັນໄວ້ກ່ອນ ແຕ່ສຸດ ທ້າຍກໍ່ຕ້ານທານຄວາມແຂງແກ່ນຂອງ ຂຸນເຫຼັກບໍ່ໄຫວ ມາຖືກໝັດ ຂຸນເຫຼັກເຕັມໆ ໃນປາຍຍົກ ໃຫ້ກຳມະການໄດ້ນັບ 10 ບໍ່ລຸກ ສົ່ງຜົນໃຫ້ ຂຸນເຫຼັກ ສະໂມສອນ ຄຳເສັງ ເປັນຝ່າຍເອົາຊະນະນ໋ອກໄປ. 

ສ່ວນຜົນການແຂ່ງຂັນມວຍອີກ 5 ຄູ່ ໃນ ລາຍການ ປະກອບມີ ຄູ່ທີ 1 ຮຸ່ນນໍ້າໜັກ 55 ກິໂລກຣາມ ໄຊມ້ອນ ປກສ ຖືກ ມຸງຄຸນເຫູັກ ສໍສີຣິນທາ ນ໋ອກໃນຍົກທີ 3, ຄູ່ທີ 2 ຮຸ່ນນໍ້າ ໜັກ 54 ກິໂລກຣາມ ຊົນຊາດ ສິດໂຕ້ ພາລຸ້ງ ຊະນະນ໋ອກ ເພັດໜອງຄາຍ ສໍສີຣິນທາ ໃນຍົກທີ 2, ຄູ່ທີ 3 ຮຸ່ນນໍ້າໜັກ 57 ກິໂລກຣາມ ເກົ້າແສນ ຂວັນໃຈສີໂຄດ ຖືກ ເພັດຈະເລີນ ສໍສີຣິນທາ ນ໋ອກໃນຍົກທີ 2, ຄູ່ທີ 5 ຮຸ່ນນໍ້າໜັກ 62 ກິໂລກຣາມ  ເຜົາຂະມຸ ສິດໂຕ້ພາລຸ້ງ ຊະນະນ໋ອກ ໂລ້ເງິນ ສິດຈານເພັງ ໃນຍົກທີ 2 ແລະ ຄູ່ທີ 6 ຮຸ່ນນໍ້າໜັກ 51 ກິໂລກຣາມ ກະລຽງ ສິດຂຸນພົນ ເສຍຄະແນນ ເພັດມະນຸດ.   

ຂ່າວ-ພາບ: ສົງການ

Related Articles

Leave a Reply