Vientiane Times Lao
ຂ່າວດີ! ພືດເປັນຢາ 3 ຊະນິດຂອງລາວ ມີສັບພະຄຸນປິ່ນປົວພະຍາດໂຄວິດ-19 ໄດ້ແທ້

ຂ່າວດີ! ພືດເປັນຢາ 3 ຊະນິດຂອງລາວ ມີສັບພະຄຸນປິ່ນປົວພະຍາດໂຄວິດ-19 ໄດ້ແທ້

ຖືວ່າເປັນຂ່າວດີສໍາລັບວົງການແພດຢາພື້ນເມືອງລາວ ພາຍຫຼັງທີ່ຄົ້ນພົບພືດເປັນຢາ 3 ຊະນິດຂອງປະເທດລາວປະກອບມີ: ລາຊາບີ, ຜັກຄາວທອງ ແລະ ກະຊາຍຂາວ ໄດ້ນໍາໃຊ້ເຂົ້າໃນການປິ່ນປົວຜູ້ຕິດເຊື້ອພະຍາດໂຄວິດ-19 ຫາຍດີເຖິງ 86-100 %.

ທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ໄດ້ລາຍງານຕໍ່ສະມາຊິກສະພາແຫ່ງຊາດ ທີ່ ກອງປະ ຊຸມສະໄໝສາມັນເທື່ອທີ 2 ຂອງສະພາ ແຫ່ງຊາດຊຸດທີ IX ເມື່ອວັນທີ 4 ພະຈິກ 2021 ທີ່ຜ່ານມາກ່ຽວກັບການນໍາໃຊ້ພືດເປັນຢາ 3 ຊະນິດດັ່ງກ່າວໃນການນໍາໃຊ້ປິ່ນປົວຜູ້ຕິດເຊື້ອພະຍາດໂຄວິດ-19 ວ່າ: ພາຍຫຼັງທີ່ພົບການແຜ່ລະບາດຂອງພະຍາດໂຄວິດ-19 ໃນລາວ, ກະຊວງສາທາລະນະສຸກ ໄດ້ສົ່ງເສີມການຄົ້ນຄວ້າພືດເປັນຢາ ຫຼື ຢາພື້ນເມືອງ 3 ຊະນິດດັ່ງກ່າວເພື່ອສົມທົບກັບຢາຫຼວງ ໃນການປ້ອງກັນ ແລະ ປິ່ນປົວຜູ້ຕິດເຊື້ອໂຄວິດ-19 ໂດຍໄດ້ມີການ ຄົ້ນຄວ້າຢູ່ຫ້ອງທົດລອງກວດຫາສານເຄມີໃນພືດແຕ່ລະຊະນິດ ເພື່ອກວດກາປະສິດທິພາບ ແລະ ຄວາມປອດໄພ ແລະ ໄດ້ພົບວ່າພືດ 3 ຊະນິດດັ່ງກ່າວມີຄຸນປະໂຫຍດ ຊ່ວຍເສີມສ້າງພູມຄຸ້ມກັນຂອງຮ່າງກາຍ ແລະ ຊ່ວຍຫຼຸດຜ່ອນອາການໄອ, ໄຂ້ຫວັດໃຫຍ່, ແກ້ໄອ, ເຈັບຄໍ, ເຈັບອາມິດານ ແລະ ຊ່ວຍກະຕຸ້ນເຮັດໃຫ້ກິນເຂົ້າແຊບ.

ທ່ານ ດຣ ບຸນແຝງ ໄດ້ລາຍງານຕື່ມວ່າ: ການນໍາຢາພື້ນເມືອງ ຫຼື ຜະລິດຕະພັນພືດ 3 ຊະນິດດັ່ງກ່າວເຂົ້າໃນການປິ່ນປົວຜູ້ຕິດເຊື້ອພະຍາດໂຄວິດ-19 ຢູ່ແຂວງສະຫວັນນະເຂດ, ສາລະວັນ ແລະ ຈໍາປາສັກ ໃນສູນຈໍາກັດບໍລິເວນຈໍານວນ 425 ກໍລະນີ ທີ່ຕິດເຊື້ອກໍລະນີເບົາບາງ ແລະ ປານກາງພົບວ່າຜູ້ຕິດເຊື້ອແມ່ນມີອາການດີຂຶ້ນເຖິງ 86-100%. ສະເພາະການທົດລອງປິ່ນປົວຜູ້ຕິດເຊື້ອຢູ່ນະຄອນຫຼວງວຽງຈັນໃນຈໍານວນ 450 ກໍລະນີ ຍັງຢູ່ໃນຂັ້ນຕອນເກັບກໍາຂໍ້ມູນ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ