Vientiane Times Lao
ຄະນະກໍາມະການປ້ອງກັນແລະຄວບຄຸມໄພພິບັດແຫ່ງຊາດຂຸ້ນຂ້ຽວ ຊ່ວຍເຫຼືອ, ແກ້ໄຂ ແລະ ຟື້ນຟູ ໄພພິບັດນ້ຳຖ້ວມ

ຄະນະກໍາມະການປ້ອງກັນແລະຄວບຄຸມໄພພິບັດແຫ່ງຊາດຂຸ້ນຂ້ຽວ ຊ່ວຍເຫຼືອ, ແກ້ໄຂ ແລະ ຟື້ນຟູ ໄພພິບັດນ້ຳຖ້ວມ

ຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ກຳລັງຈັດຕັ້ງປະຕິບັດຫຼາຍໜ້າວຽກທີ່ສຳຄັນເພື່ອຊ່ວຍເຫຼືອ, ແກ້ໄຂ ແລະ ຟື້ນຟູຫຼັງໄພພິບັດນ້ຳຖ້ວມໃນຄັ້ງນີ້ຢູ່ຫຼາຍແຂວງທີ່ຖືກນຳ້ຖ້ວມ.
ທ່ານ ດຣ ຄໍາແພງ ໄຊສົມແພງ, ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ທັງເປັນປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ໃຫ້ສຳພາດຕໍ່ສື່ມວນຊົນໃນມື້ເຊົ້ານີ້ 10/09/2019 ວ່າ ທາງຄະນະກຳມະການຈະສືບຕໍ່ຕິດຕາມພະຍາກອນ ແລະ ແຈ້ງເຕືອນໄພລ່ວງໜ້າ ໃຫ້ທັນເວລາ, ປະສານ ການຊ່ວຍເຫຼືອສຸກເສີນ ແລະ ຟື້ນຟູຮີບດ່ວນ ລວມທັງ ການສົ່ງທີມປະເມີນສຸກເສີນ ເພື່ອປະເມີນຄວາມເສຍຫາຍ ແລະ ຄວາມຕ້ອງການ ເພື່ອສ້າງແຜນຊ່ວຍເຫຼືອ ແລະ ຟື້ນຟູຄືນຫຼັງໄພພິບັດ, ເລັ່ງສືບຕໍ່ສ້ອມແປງສິ່ງອໍານວຍຄວາມສະດວກ ແລະ ສະຖານທີ່ບໍລິການ ເປັນຕົ້ນ​ – ເສັ້ນທາງ, ຂົວ, ໄຟຟ້າ, ນໍາປະປາ, ແຫຼ່ງນໍ້າກິນນໍ້າໃຊ້, ໂຮງຮຽນ, ໂຮງໝໍ, ສຸກສາລາ ແລະ ອື່ນໆ, ຮັບປະກັນໃຫ້ຜູ້ປະສົບໄພພິບັດ ທີ່ອາໄສຢູ່ສູນພັກເຊົາ ໄດ້ເຂົ້າເຖິງອາຫານ, ນໍ້າດື່ມ, ການຢູ່ກິນທີ່ປອດໄພ, ສຸຂະອະນາໄມ, ສຸຂະພາບ, ສືບຕໍ່ນໍາໃຊ້ກໍາລັງແຮງ ຂອງ ກອງທັບ, ຕໍາຫຼວດ, ຊ່າວໜຸ່ມ, ແມ່ຍິງ, ກາແດງ, ອາສາສະໝັກ ແລະ ອື່ນໆ ໃນການຊ່ວຍເຫຼືອສຸກເສີນ ແລະ ຟື້ນຟູຫຼັງໄພພິບັດ ແລະ ຂໍນໍາໃຊ້ເຂົ້າສານໃນຂອບໂຄງການ ອາຊຽນບວກສາມ, ລວມທັງ ເຂົ້າໃນຄັງສະສົມ ຂອງ ກະຊວງການເງິນ.
ບັນດາໜ້າທີ່ ທີ່ໄດ້ກ່າວມານັ້ນ ທາງກະຊວງແຮງງານຈະໄດ້ມີການຈັດຕັ້ງຕັ້ງປະຕິບັດໃນມໍ່ໆນີ້ ເພື່ອຊ່ວຍເຫຼືອຜູ້ປະສົບໄພໃຫ້ທັນການ ພ້ອມທັງມີແຜນການທີ່ຈະຟື້ນຟູທຸກບ່ອນທີ່ໄດ້ຮັບຜົນກະທົບຈາກໄພພິບັດໃນຄັ້ງນີ້.
ທ່ານ ດຣ ຄໍາແພງ ຍັງໄດ້ອະທິບາຍວ່າ ຕໍ່ກັບຜົນກະທົບຈາກອິດທິພົນຂອງລົມພະຍຸໜຸນເຂດຮ້ອນໂພດູ ແລະ ລົມພະຍຸດີເປຣຊັນ ທີ່ພັດຜ່ານເຂົ້າມາ ສປປ ລາວ ໃນທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ເຮັດໃຫ້ມີຝົນຕົກໜັກ ແລະ ເກີດນໍ້າຖ້ວມ ຢູ່ 6 ແຂວງ ຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນ 458.017 ຄົນ ຖືກກະທົບ, ເສຍຊີວິດ 13 ຄົນ, ສູນຫາຍ 1 ຄົນ ໃນ 47 ເມືອງ, 1,643 ບ້ານ, 150,415 ຄອບຄົວ.
ປະຊາຊົນຍົກຍ້າຍ 14.328 ກວ່າຄອບຄົວ, 102.416 ກວ່າຄົນ, ເປັນຍິງ 15.205 ຄົນ; ສົ່ງຜົນກະທົບ ແລະ ເສຍຫາຍ ຕໍ່ຂະແໜງການສັງຄົມ, ເສດຖະກິດ, ສິ່ງແວດລ້ອມ ແລະ ໂຄງລ່າງພື້ນຖານທີ່ສໍາຄັນ ເປັນຕົ້ນ – ທີ່ຢູ່ອາໄສ ແລະ ບ້ານເຮືອນຂອງປະຊາຊົນ, ເສັ້ນທາງ, ຂົວ, ຫ້ອງການຂອງລັດ, ໂຮງຮຽນ, ໂຮງໝໍ, ສຸກສາລາ, ແຫຼ່ງນໍ້າກິນ ນໍ້າໃຊ້, ພື້ນທີ່ການຜະລິດ,​ ສັດລ້ຽງ, ຊົນລະປະທານ, ແລະ ອື່ນໆ. ຄວາມຕ້ອງການຮີບດ່ວນ ລວມມີ: ເຕັ້ນພັກຊົ່ວຄາວ, ເຄື່ອງອຸປະໂພກ-ບໍລິໂພກ ເປັນຕົ້ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ ແລະ ງົບປະມານຮັບໃຊ້, ອື່ນໆ.
ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນໃນຄັ້ງນີ້, ອໍານາດການປົກຄອງ ແລະ ຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີ ໂດຍໄດ້ນໍາໃຊ້ກໍາລັງແຮງຂອງພະນັກງານ, ທະຫານ, ຕໍາຫຼວດ, ແລະ ປະຊາຊົນພາຍໃນບ້ານ ປະຕິບັດການຍົກຍ້າຍ ທັງຄົນ ແລະ ສັບສິນ ໄປບ່ອນທີ່ປອດໄພ, ຈັດສັນສະຖານທີ່ພັກເຊົາຊົ່ວຄາວ ແລະ ສະໜອງບັນເທົາທຸກສຸກເສີນຂັ້ນພື້ນຖານ ດ້ານເຄື່ອງອຸປະໂພກ-ບໍລິໂພກ ເປັນຕົ້ນ – ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ຢາປົວພະຍາດ, ອື່ນໆ.
ຈາກນັ້ນ, ລັດຖະບານກໍ່ໄດ້ຈັດກອງປະຊຸມສຸກເສີນຂຶ້ນ ໂດຍການເປັນປະທານ ຂອງ ທ່ານ ນາຍົກລັດຖະມົນຕີ ແລະ ມີບັນດາຄະນະນໍາຈາກບັນດາກະຊວງໃນຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດເຂົ້າຮ່ວມ, ຊຶ່ງໄດ້ຊີ້ນໍາໃຫ້ບັນດາຂະແໜງການທີ່ກ່ຽວຂ້ອງ ຮີບຮ້ອນລົງໄປຊ່ວຍເຫຼືອຕາມພາລະບົດບາດໜ້າທີ່ຂອງຕົນ. ພ້ອມກັນນີ້ ຄະນະພັກ ຄະນະນໍາ ຂັ້ນສູນກາງ ກໍ່ໄດ້ລົງໄປພື້ນທີ່ພາກສະໜາມຢູ່ບັນດາແຂວງທີ່ຖືກກະທົບ ເພື່ອຕິດຕາມ, ຊຸກຍູ້ແກ້ໄຂສຸກເສີນ ແລະ ໃຫ້ກໍາລັງໃຈ, ຄວາມອົບອຸ່ນແກ່ປະຊາຊົນຜູ້ທີ່ໄດ້ຮັບຜົນກະທົບ ແລະ ພະນັກງານ, ນາຍ ແລະ ພົນທະຫານ, ຕໍາຫຼວດ ແລະ ພາກສ່ວນຕ່າງໆ ທີ່ປະຕິບັດໜ້າທີ່ກູ້ໄພ ແລະ ແກ້ໄຂສຸກເສີນ.
ສະເພາະການຊ່ວຍເຫຼືອ ຂອງ ຄະນະກໍາມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ ໃນນາມ ເປັນປະທານ ກໍ່ໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກກະທົບຈາກໄພພິບັດ ພ້ອມທັງໄດ້ປະຕິບັດໃຫ້ການຊ່ວຍເຫຼືອບັນເທົາທຸກສຸກເສີນ ເປັນຕົ້ນ – ໄດ້ສົມທົບກັບກອງທັບ ນໍາໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງດັ່ງກ່າວ. ນອກຈາກນີ້ຍັງໄດ້ນໍາໃຊ້ເງິນທີ່ລັດຖະບານຈັດສັນໃຫ້ຈໍານວນ 5 ຕື້ກີບ ນໍາໄປຊ່ວຍເຫຼືອ ແລະ ມອບໃຫ້ບັນດາແຂວງທີ່ຖືກກະທົບ ລວມທັງ ໄດ້ມອບເງິນໃນຮ່ວງກອງທຶນແຮນໍ້າມັນສຸກເສີນ ໃຫ້ແຂວງລະ 50 ລ້ານກີບ ເພື່ອນໍາໃຊ້ເຂົ້າໃນການບໍລິຫານ ຂົນສົ່ງເຄື່ອງຊ່ວຍເຫຼືອບັນເທົາທຸກໄປໃຫ້ຜູ້ປະສົບໄພພິບັດ.
ກະຊວງແຮງງານ ແລະ ສະຫວັດດີການສັງຄົມ ກໍ່ຍັງໄດ້ອອກແຈ້ງການລະດົມບໍລິຈາກນໍາສັງຄົມຜ່ານສື່ມວນຊົນ ຊຶ່ງໄດ້ເລີ່ມປະຕິບັດແຕ່ວັນທີ 7 ກັນຍາ 2019 ເປັນຕົ້ນມາ. ມາຮອດປະຈຸບັນ ກໍ່ໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອ ທັງເປັນເງິນ ແລະ ເຄື່ອງອຸປະໂພກ-ບໍລິໂພກ, ປະຈຸບັນ ໄດ້ຂົນສົ່ງເຄື່ອງອຸປະໂພກ-ບໍລິໂພກ ທີ່ໄດ້ຮັບບໍລິຈາກ ເປັນຕົ້ນ ເຂົ້າກິນ, ນໍ້າດື່ມ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງ ໃຊ້ຄົວເຮືອນ, ອື່ນໆ ມູນຄ່າ 1 ຕື້ກີບ ນໍາໄປຊ່ວຍເຫຼືອຜູ້ປະສົບໄພພິບັດ ໃນບັນດາແຂວງຢູ່ພາກໃຕ້ແລ້ວ.
ພິເສດໃນ ມື້ອື່ນ 11/09/2019 ກໍ່ຈະມີເຄື່ອງຊ່ວຍເຫຼືອບັນເທົາທຸກສຸກເສີນ ຈາກສູນປະສານງານຊ່ວຍເຫຼືອດ້ານມະນຸດສະທໍາອາຊຽນ ຫຼື ສູນອາຮາ ຈະຂົນສົ່ງເຄື່ອງມາດ້ວຍຍົນ ລົງສະໜາມບິນສາກົນປາກເຊ ເພື່ອນໍາເອົາເຄື່ອງຊ່ວຍເຫຼືອດັ່ງກ່າວ ຊ່ວຍເຫຼືອຜູ້ປະສົບໄພພິບັດ ຢູ່ ບັນດາແຂວງທີ່ຖືກກະທົບຈາກໄພນໍ້າຖ້ວມ.
ນອກຈາກນີ້, ກະຊວງ ແຮງງານ ແລະ ສະຫວັດດີການສັງຄົມ ຍັງໄດ້ຈັດຕັ້ງສູນປະສານງານສຸກເສີນຂຶ້ນ ຢູ່ກົມສັງຄົມສົງເຄາະ ພ້ອມທັງໄດ້ອອກແຈ້ງການເຖິງບັນດາແຂວງ ເພື່ອຈັດຕັ້ງສູນປະສານງານຊ່ວຍເຫຼືອສຸກເສີນຢູ່ຂັ້ນແຂວງ ແລະ ເມືອງ ເພື່ອປະຕິບັດໃຫ້ການຊ່ວຍເຫຼືອສຸກເສີນ. ທັງນີ້ ກໍ່ເພື່ອຮັບປະກັນໃຫ້ໄດ້ທາງດ້ານປະສິດທິພາບ ແລະ ປະສິດທິຜົນ ໃນການປະສານງານລວມສູນ ການຊ່ວຍເຫຼືອທັງໄລຍະສຸກເສີນ ແລະ ຟື້ນຟູຄືນຫຼັງໄພພິບັດ.
ບົດ: ວຽງຈັນທາຍ
ພາບ: ຄຳພັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ