ກອງປະຊຸມຮ່ວມ ລະຫວ່າງ ຄະນະລັດຖະບານ ແລະ ຄະນະປະຈຳສະພາແຫ່ງຊາດ ຄັ້ງທີ II ປະຈໍາປີ 2024 ໄດ້ຈັດຂຶ້ນເມື່ອມໍ່ໆມານີ້ ທີ່ຫໍປະຊຸມແຫ່ງຊາດ ໂດຍການເປັນປະທານຮ່ວມ ຂອງທ່ານ ສອນໄຊ ສີພັນດອນ ນາຍົກ ລັດຖະມົນຕີ ແລະ ທ່ານ ໄຊສົມພອນ ພົມວິຫານ ປະທານຄະນະປະຈຳສະພາແຫ່ງຊາດ ຊື່ງ 2 ຄະນະໄດ້ ປຶກສາ ຫາລື ແລະ ເປັນເອກະພາບວິທີການແກ້ໄຂບັນຫາຫຍຸ້ງຍາກຕ່າງໆທີ່ສ່ອງແສງເຖິງຄວາມຮັບຜິດ.
ກອງປະຊຸມຄັ້ງນີ້ ເພືີ່ອພ້ອມກັນທົບທວນຄືນ ການປະຕິບັດຜົນກອງປະຊຸມຮ່ວມ ລະຫວ່າງ ຄະນະລັດຖະບານ ກັບຄະນະປະຈຳສະພາແຫ່ງຊາດ ຄັັ້ງທີ I ປີ 2024 ທີ່ຜ່ານມາ, ທັງປຶກສາ ແລະ ແລກປ່ຽນຄຳເຫັນ ເພື່ອສ້າງຄວາມເປັນເອກະພາບ ຕໍ່ບັນດານະໂຍບາຍຈໍານວນໜຶ່ງ ເພື່ອຈັດຕັ້ງປະຕິບັດບັນດາວຽກງານຈຸດສຸມ, ແຜນພັດທະນາເສດຖະກິດ-ສັງຄົມ ປະຈໍາປີ 2025 ໃຫ້ສໍາເລັດຕາມຄາດໝາຍທີ່ກໍານົດໄວ້ ກໍຄືຮັບປະກັນປະສິດທິພາບ ແລະ ປະສິດທິຜົນ. ພ້ອມນີ້, ເພືີ່ອກວດກາຊຸກຍູ້ການກະກຽມຄວາມພ້ອມບັນດາຮ່າງກົດໝາຍ ກ່ອນທີີ່ຈະນໍາເຂົ້າພິຈາລະນາໃນກອງປະຊຸມສະພາແຫ່ງຊາດ ໃນປີ 2025.
ສໍາລັບເນື້ອໃນທີ່ນຳມາປຶກສາຫາລື ໃນກອງປະຊຸມຄັ້ງນີ້ ບັນດາຜູ້ເຂົ້າຮ່ວມໄດ້ພ້ອມກັນສຸມໃສ່ປຶກສາຫາລື, ຄົ້ນຄວ້າ ແລະ ເປັນເອກະພາບ ຕໍ່ບັນຫາທີ່ສໍາຄັນເປັນຕົ້ນ ຕີລາຄາການປະຕິບັດ ຜົນຂອງກອງປະຊຸມຮ່ວມ ລະຫວ່າງ ຄະນະປະຈໍາສະພາແຫ່ງຊາດ ກັບ ຄະນະລັດຖະບານ ຄັັ້ງຜ່ານມາ ລວມທັງ ກົນໄກປະສານງານໃນໄລຍະຜ່ານມາ; ບັນດາຫົວຂໍໍ້ກົດໝາຍ ທີີ່ຈະນໍາເຂົ້າພິຈາລະນາ ໃນກອງປະຊຸມສະໄໝວິສາມັນ ແລະ ສະໄໝສາມັນ ເທືີ່ອທີ 9 ຂອງສະພາແຫ່ງຊາດ ຊຸດທີ IX, ການສ້າງ, ປັບປຸງ ແລະ ການໂຄສະນາເຜີຍແຜ່ກົດໝາຍ ແຕ່ປີ 2021-2024 ແລະ ທິດທາງໃນຕໍ່ໜ້າ; ການປຶກສາຫາລືດ້ານຫຼັກການກ່ຽວກັບພາລະບົດບາດຂອງສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ ໃນການພິຈາລະນາການຍົກເວັ້ນ ການປະຕິບັດບາງມາດຕາຂອງກົດໝາຍ, ການປ່ຽນແປງບາງມາດຕາຂອງກົດໝາຍ; ການປຶກສາຫາລືດ້ານຫຼັກການ ກ່ຽວກັບນະໂຍບາຍ ແລະ ເງືີ່ອນໄຂສໍາລັບການກໍ່ສ້າງເສັ້ນທາງ, ນິຄົມອຸດສາຫະກໍາ, ການພັດທະນາແຮ່ທາດ ແລະ ການພັດທະນາໂຄງການພະລັງງານໄຟຟ້າ.
ຜ່ານການຄົ້ນຄວ້າ, ປຶກສາຫາລື ແລະ ປະກອບຄຳເຫັນ, ກອງປະຊຸມ ເຫັນດີດ້ານຫຼັກການ ຕໍ່ການຕີລາຄາບັນດາວຽກງານ ເປັນຕົ້ນ ການພັດທະນາ ແລະ ຄຸ້ມຄອງແຮ່ທາດ ແລະ ໂຄງການແຮ່ຫາຍາກ; ແຜນການລົງທຶນຂອງລັດ ໃນປີ 2025; ການແກ້ ຂຜົນການກວດສອບຜ່ານມາ, ທິດທາງ ແລະ ມາດຕະການແກ້ໄຂຜົນຂອງການກວດສອບໃນຕໍ່ໜ້າ; ການກະກຽມຮ່າງແຜນງົບປະມານ ປີ 2025; ກ່ຽວກັບມາດຕະການໃນການນໍາເຂົ້ານໍ້າມັນເຊື້ອໄຟ ແລະ ການສົ່ງເສີມການຜະລິດ-ປຸງແຕ່ງພາຍໃນ ແລະ ດັດສົມລາຄານໍ້າມັນເຊື້ອ; ກ່ຽວກັບມາດຕະການໃນການສົ່ງເສີມການຜະລິດພາຍໃນ, ການຄຸ້ມຄອງລາຄາສິນຄ້າ, ການນໍາເຂົ້າ, ການຈໍາກັດສິນຄ້າຟຸມເຟືອຍ, ສິນຄ້າທີ່ພາຍໃນຜະລິດໄດ້ ແລະ ຄຸຸ້ມຄອງການສົ່ງອອກສິນຄ້າ; ການຈັດຕັັ້ງປະຕິບັດແຜນການສ້າງ ແລະ ປັບປຸງກົດໝາຍ, ການໂຄສະນາເຜີຍແຜ່ກົດໝາຍ; ຕີລາຄາກົນໄກປະສານງານ ລະຫວ່າງ ສະພາແຫ່ງຊາດ ແລະ ລັດຖະບານ. ພ້ອມກັນນີ້, ກອງປະຊຸມໄດ້ຊີ້ນໍາໃຫ້ກະຊວງຍຸຕິທຳ ເປັນໃຈກາງສົມທົບກັບບັນດາກະຊວງ ແລະ ກຳມາທິການກ່ຽວຂ້ອງ ສືບຕໍ່ກະກຽມຄວາມພ້ອມບັນດາຮ່າງກົດໝາຍສ້າງໃໝ່ ແລະ ປັບປຸງ ທີ່ຈະນຳເຂົ້າພິຈາລະນາໃນກອງປະຊຸມສະໄໝວິສາມັນ ເທື່ອທີ 2 ແລະ ສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ໃຫ້ດີ, ຮັບປະກັນທາງດ້ານເນື້ອໃນ ແລະ ໃຫ້ທັນຕາມກໍານົດເວລາ; ໃຫ້ບັນດາກະຊວງ ສືບຕໍ່ສົມທົບກັບກະຊວງຍຸຕິທຳ ແລະ ກຳມາທິການກ່ຽວຂ້ອງຂອງສະພາແຫ່ງຊາດ ຄົ້ນຄວ້າ, ທົບທວນຄືນກົດໝາຍທີ່ຢູ່ໃນຄວາມຮັບຜິດຊອບຂອງຕົນ ເພື່ອສະເໜີປັບປຸງມາດຕາທີ່ບໍ່ສອດຄ່ອງກັບສະພາບຕົວຈິງ. ພ້ອມນີ້, ໃຫ້ກະຊວງຍຸຕິທຳ ສືບຕໍ່ສົມທົບກັບພາກສ່ວນກ່ຽວຂ້ອງ ເພີ່ມທະວີການໂຄສະນາເຜີຍແຜ່ກົດໝາຍ ໃຫ້ແຂງແຮງ ກວ່າເກົ່າ ໂດຍນຳໃຊ້ຫລາຍຮູບແບບ, ຫລາຍຊ່ອງທາງ ແລະ ຕໍ່ເນື່ອງ, ດ້ານເນື້ອໃນການໂຄສະນາ ປັບປຸງໃຫ້ກະທັດຮັດ, ຈະແຈ້ງ ແລະ ເຂົ້າໃຈງ່າຍ; ໃຫ້ກະຊວງແຜນການ ແລະ ການລົງທຶນ, ກະຊວງການເງິນ, ກະຊວງໂຍທາທິການ ແລະ ຂົນສົ່ງ, ກະຊວງພະລັງງານ ແລະ ບໍ່ແຮ່, ກະຊວງອຸດສາຫະກໍາ ແລະ ການຄ້າ ສົົມທົບກັບພາກສ່ວນທີ່ກ່ຽວຂ້ອງ ສືບຕໍ່ຄົ້ນຄວ້າກຳນົດ, ປັບປຸງນະໂຍບາຍ ແລະ ນິຕິກຳທີ່ກ່ຽວຂ້ອງ ໃຫ້ສອດຄ່ອງ ແລະ ແທດຕົວຈິງ ເພື່ອແກ້ໄຂບັນດາຂໍ້ຄົງຄ້າງ ແລະ ບໍ່ທັນໂລ່ງລ່ຽນ ທີ່ຕິດພັນກັບຂະແໜງການຂອງຕົນ ພ້ອມທັງ ສ້າງ ແລະ ປັບປຸງກົນໄກການຕິດຕາມຊຸກຍູ້, ການຄຸ້ມຄອງ, ການເກັບລາຍຮັບ, ການອຳນວຍຄວາມສະດວກດ້ານຕ່າງໆ ເຮັດໃຫ້ການພັດທະນາດ້ານຄົມມະນາຄົມຂົນສົ່ງ, ນິຄົມອຸດສາຫະກຳ, ການພັດທະນາແຮ່ທາດ ແລະ ໂຄງການພະລັງງານໄຟຟ້າ ສອດຄ່ອງກັບນະໂຍບາຍການພັດທະນາສີຂຽວ, ຍືນຍົງ ແລະ ນໍາເອົາຜົນປະໂຫຍດສູງສຸດມາສູ່ປະເທດຊາດ ແລະ ປະຊາຊົນ ແລະ ອື່ນໆ.
ແຫຼ່ງຂໍ້ມູນຂ່າວ-ພາບ: ກົມປະຊາສໍາພັນ, ຫສນຍ
