ໂດຍຕອບສະໜອງຕາມການເຊີນ ຂອງ ສະມາຄົມປະຊາຊົນຈີນ ເພື່ອສັນຕິພາບ ແລະ ຫຼຸດຜ່ອນອາວຸດ, ຄະນະຜູ້ແທນຄະນະສັນຕິພາບ ແລະ ສາມັກຄີ ຂອງ ສປປ ລາວ ນຳໂດຍ ທ່ານ ສົມມາດ ພົນເສນາ ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງ ສປປ ລາວ ເຂົ້າຮ່ວມພິທີເປີດກອງປະຊຸມສາກົນເພື່ອສະເຫຼີມສະຫຼອງວັນສັນຕິພາບສາກົນ 21 ກັນຍາ, ໂດຍໃຫ້ກຽດເຂົ້າຮ່ວມ ແລະ ມີຄໍາເຫັນກ່າວເປີດຂອງທ່ານ Han Zheng ຮອງປະທານປະເທດ ສປ ຈີນ, ນອກນັ້ນ ຍັງມີບັນດາທ່ານອະດີດປະທານາທິບໍດີ, ລັດຖະມົນຕີ, ຮອງລັດຖະມົນຕີ ຈາກ 80 ປະເທດ ແລະ ອົງການຈັດຕັ້ງສາກົນເຂົ້າຮ່ວມ 150 ທ່ານ.
ໃນກອງປະຊຸມ, ຄະນະຜູ້ແທນຈາກບັນດາປະເທດຕ່າງໆ ທີ່ຮັກຫອມສັນຕິພາບ ແລະ ຄວາມເປັນທຳ ໄດ້ແລກປ່ຽນຄວາມຄິດເຫັນ ແລະ ແບ່ງປັນບົດຮຽນການເຄື່ອນໄຫວວຽກງານສັນຕິພາບ ເພື່ອປະກອບສ່ວນເຂົ້າໃນການເສີມສ້າງສັນຕິພາບ ແລະ ຄວາມໝັ້ນຄົງສາກົນ ຖືເປັນກົນໄກແຫ່ງການ ຮ່ວມມືພາຄີທີ່ທຸກຝ່າຍໄດ້ຮັບຜົນປະໂຫຍດຢ່າງແທ້ຈິງ, ທັງເປີດກວ້າງພັດທະນາເສດຖະກິດໂລກໃນທຸກດ້ານ ໂດຍຢຶດຖືເອົາຄວາມຜາສຸກ ຂອງປະຊາ ຊົນ ໃນທົ່ວໂລກເປັນບຸລິມະສິດອັນດັບໜຶ່ງ.
ໃນໂອກາດດັ່ງກ່າວ, ທ່ານ ສົມມາດ ພົນເສນາ ກໍໄດ້ຂຶ້ນກ່າວ ຊຶ່ງທ່ານ ໄດ້ຕີລາຄາສະພາບການພາກພື້ນ ແລະ ສາກົນ ທີ່ເຫັນວ່າຍັງສືບຕໍ່ຜັນແປໄປຢ່າງໄວວາ, ສັບສົນ, ບັນຫາສະພາບອາກາດ, ໄພພິບັດທໍາມະຊາດ ແລະ ການປະທະກັນ ດ້ວຍກໍາລັງອາວຸດຍັງສືບຕໍ່ເກີດຂຶ້ນຢູ່ຫຼາຍຂົງເຂດ ຂອງໂລກ ແລະ ແຜ່ລາມເປັນວົງກວ້າງ, ບັນຫາເຫຼົ່ານັ້ນ ໄດ້ເປັນໄພຂົ່ມຂູ່ຕໍ່ສັນຕິພາບ, ຄວາມໝັ້ນຄົງສາກົນ ແລະ ການພັດທະນາ ຂອງບັນດາປະເທດໃນໂລກ. ພ້ອມນັ້ນ, ກໍໄດ້ຊົມເຊີຍ ແລະ ຕີລາຄາສູງຕໍ່ການປະກອບສ່ວນຢ່າງເອົາໃຈໃສ່ ຂອງ ສປ ຈີນ ໃນຄວາມພະຍາຍາມສ້າງສັນຕິພາບ, ຄວາມໝັ້ນຄົງ ແລະ ການພັດທະນາ ຂອງໂລກ ໂດຍສະເພາະແມ່ນການລິເລີ່ມແນວຄວາມຄິດ “5 ຫຼັກການຢູ່ຮ່ວມກັນໂດຍສັນຕິ”. ສໍາລັບ ປະຊາຊົນລາວ ຮູ້ດີເຖິງຄຸນຄ່າຂອງສັນຕິພາບ ແລະ ຜົນຮ້າຍຂອງສົງຄາມ ແລະ ພ້ອມທີ່ຈະຮ່ວມກັບປະຊາຊາດ ຜູ້ຮັກຫອມສັນຕິພາບໃນໂລກ ໃນການສະໜັບສະໜູນ ແລະ ຕໍ່ສູ້ເພື່ອສັນຕິພາບ ເພື່ອເຮັດໃຫ້ໂລກ ຂອງພວກເຮົາມີຄວາມສະຫງົບ, ມີຄວາມຍຸຕິທໍາ ເພື່ອໃຫ້ຄົນຮຸ່ນໃໝ່ ຂອງພວກເຮົາໄດ້ດໍາລົງຊີວິດຢ່າງມີຄວາມສຸກ.
ນອກຈາກເຂົ້າຮ່ວມກອງປະຊຸມ, ຄະນະຜູ້ແທນລາວ ຍັງໄດ້ພົບປະສອງຝ່າຍກັບການນຳ ແຂວງຊານຕົ່ງ ສປ ຈີນ. ຝ່າຍ ຈີນ ໄດ້ແຈ້ງຂໍ້ມູນ ແລະ ສະພາບການພົ້ນເດັ່ນ ຂອງການພັດທະນາເສດຖະກິດ-ສັງຄົມ ຂອງ ແຂວງຊານຕົ່ງ ໃຫ້ຊາບ ເຊິ່ງແຂວງຊານຕົງ ເປັນແຂວງ ທີ່ມີປະຫວັດສາດຍາວນານ, ເປັນບ້ານເກີດ ຂອງ ທ່ານ ຂົງຈຶ້, ມີບົດ ບາດສໍາຄັນດ້ານວັດທະນະທໍາ ແລະ ເປັນແຂວງທີ່ນໍາໜ້າດ້ານການສຶກສາ, ການຄົ້ນຄວ້າ ແລະ ມີການຂະຫຍາຍຕົວທາງດ້ານເສດຖະກິດ ອັນດັບ 3 ຂອງປະເທດຈີນ. ສ່ວນຝ່າຍ ລາວ ກໍໄດ້ແຈ້ງສະພາບອັນພົ້ນເດັ່ນ ເປັນຕົ້ນແມ່ນປັດຈຸບັນ, ພັກ ແລະ ລັດຖະບານລາວ ພວມສຸມໃສ່ການຈັດຕັ້ງປະຕິບັດມະຕິຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງລັດຖະບານ. ໃນເດືອນພຶດສະພາຜ່ານມາ, ສູນກາງພັກ ໄດ້ດໍາເນີນກອງປະຊຸມຄົບຄະນະເທື່ອທີ 8 ສະໄໝທີ XI ໂດຍໄດ້ຕີລາຄາຄືນ ແລະ ໃຫ້ທິດຊີ້ນໍາຕໍ່ການແກ້ໄຂບັນຫາຫຍຸ້ງຍາກທາງດ້ານເສດຖະກິດ, ການເງິນ ແລະ ແກ້ໄຂສະພາບການເປັນຢູ່ ຂອງປະຊາຊົນ.
ສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານຕາມ ທິດ 4 ດີ ແລະ ຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ທີ່ນັບມື້ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນໂຫຍດຕົວຈິງມາສູ່ປະຊາຊົນສອງຊາດ.
