Vientiane Times Lao
ຄູຝຶກທີມຊາດລາວຈະເລີ່ມຄັດເລືອກນັກກິລາບານເຕະຕົ້ນປີໜ້າ

ຄູຝຶກທີມຊາດລາວຈະເລີ່ມຄັດເລືອກນັກກິລາບານເຕະຕົ້ນປີໜ້າ

ຫົວຫນ້າຄູຝຶກທີມຊາດລາວຊຸດໃຫຍ່ ທ່ານ Sundram Moorthy ແລະ ຜູ້ຊ່ວຍຈາກປະເທດສິງກະໂປ ຈະເລີ່ມຄັດເລືອກນັກກິລາບານເຕະຊາຍ ຮຸ່ນອາຍຸບໍ່ເກີນ 16 ປີ ແລະ 19 ປີ ທີ່ແຂວງຫຼວງພະບາງ ເພື່ອເຂົ້າຮ່ວມທີມຊາດລາວແຂ່ງຂັນລະດັບນາໆຊາດຫຼາຍລາຍການ.

ສະຫະພັນບານເຕະແຫ່ງຊາດລາວ (ສຕລ) ໄດ້ລາຍງານໃນມື້ນີ້ ວັນທີ 25 ທັນວາ 2019 ວ່າ ການຄັດເລືອກດັ່ງກ່າວຈະແມ່ນຄູຝຶກສິງກະໂປຄົນນີ້ກັບຜູ້ຊ່ວຍ ເປັນຄົນຄັດເລືອກເອງ ໃນລະຫວ່າງ ວັນທີ 11-12 ມັງກອນ 2020 ທີ່ສະໜາມກິລາແຂວງຫຼວງພະບາງ. ຈຸດປະສົງກໍ່ເພື່ອຢາກຍົກລະດັບມາດຕະຖານໃນການຄັດເລືອກນັກກິລາດັ່ງກ່າວເຂົ້າມາເປັນທີມຊາດເພື່ອຈະພັດທະນາໃຫ້ມີຄວາມສາມາດໃນການແຂ່ງຂັນຢູ່ທັງພາຍໃນ ແລະ ຕ່າງປະເທດ.

ໂດຍອີງຕາມແຜນການເຄື່ອນໄຫວຂອງສະຫະພັນ ປະຈຳປີ 2020, ສຕລ ມີແຜນທີ່ຈະປະກາດຄັດເລືອກນັກກິລາທີມບານເຕະຊາຍ ຮຸ່ນອາຍຸບໍ່ເກີນ 16 ປີ ແລະ 19 ປີ ທີ່ມີພອນສະຫວັນ ແລະ ທັກສະ ເພື່ອກະກຽມທີມບານເຕະຊາຍ ເປັນທີມຊາດລາວໃນຮຸ່ນດັ່ງກ່າວ ເພື່ອເຂົ້າຮ່ວມການແຂ່ງຂັນບານເຕະຊາຍລະດັບນາໆຊາດຫຼາຍລາຍການໃນປີ 2020.

ພາຍຫຼັງທີ່ມີກອງປະຊຸມສະຫຼຸບວຽກງານທີ່ຜ່ານມາ ແລະ ແຜນພັດທະນາບານເຕະໃນ ສປປລາວ ຂອງ ສຕລ ຮ່ວມກັບ ສະຫະພັນບານເຕະອາຊີ ຫວ່າງບໍ່ດົນມານີ້, ສະຫະພັນດັ່ງກ່າວໄດ້ມີຫຼາຍວຽກທີ່ຕ້ອງໄດ້ປະຕິບັດໃນປີ 2020, ສະນັ້ນ ການຄັດເລືອກນັກກິລາດັ່ງກ່າວ ເປັນວຽກທຳອິດທີ່ຈະມີຂຶ້ນໃນຕົ້ນເດືອນມັງກອນທີ່ຈະມາຮອດນີ້ ແລະ ຄາດວ່າຈະສາມາດພັດທະນາບານເຕະຂອງລາວໃຫ້ກ້າວໄປສູ່ລະດັບສາກົນໃນອານາຄົດອັນໃກ້ນີ້.

ການຄັດເລືອກຈະໄດ້ຈັດຂຶ້ນ 2 ມື້ຄື ວັນທີ 11 ມັງກອນ 2020 ເວລາ 14:00 17:00 ແລະ ວັນທີ 12 ມັງກອນ 2020 ເວລາ 09:00 11:00, ເວລາ 14:00 17:00 ຢູ່ທີ່ສະຫນາມກິລານະຄອນຫຼວງພະບາງ.

ທັງນີ້, ໂຕນັກກິລາເອງທີ່ຈະເຂົ້າຮ່ວມຄັດເລືອກຕ້ອງກຽມຮ່າງກາຍໃຫ້ພ້ອມຕະຫຼອດເວລາໃນການຄັດເລືອກ. ນອກຈາກນັ້ນ, ນັກກິລາຈາກຕ່າງແຂວງ ຫຼື ແຂວງໃກ້ຄຽງ ສາມາດເຂົ້າມາຮ່ວມໃນການຄັດເລືອກໄດ້, ສາມາດຕິດຕໍ່ສອບຖາມຂໍ້ມູນເພີ່ມເຕີ້ມໄດ້ທີ່ເບີ: 020 549 183 22.

ຂ່າວ: ວຽງຈັນທາຍ

ພາບ: ສຕລ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ