ງານວາງສະແດງຜະລິດຕະພັນລາວ 2022 (Made in Laos 2022 ) ຈັດຂຶ້ນເພື່ອກະຕຸ້ນເສດຖະກິດພາຍໃນ ທີ່ໄດ້ຮັບຜົນກະທົບຈາກພະຍາດໂຄວິດ-19 ຊຶ່ງງານດັ່ງກ່າວຈະຈັດຂຶ້ນ ໃນລະຫວ່າງວັນທີ 19-28 ກຸມພາ ທີ່ຈະມາເຖິງນີ້ ຢູ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ແລະ ມາຮອດປະຈຸບັນ ນີ້ມີຫຼາຍກວ່າ 100 ບໍລິສັດໃນທົ່ວທຸກແຂວງ ໄດ້ເຂົ້າມາຈັບຈອງຫ້ອງຂາຍແລ້ວ ແລະ ພາຍໃນງານມີຫ້ອງວາງສະແດງຂາຍເກືອບ 200 ກວ່າຫ້ອງ ເພື່ອວາງຂາຍສິນຄ້າປະເພດຕ່າງໆບໍ່ວ່າຈະເປັນສິນຄ້າຈາກຂະະແໜງອຸດສາຫະກຳ, ຂະແໜງອຸດສາຫະກຳປຸງແຕ່ງ, ຂະແໜງ ຫັດຖະກໍາຜ້າໃໝ, ຂະແໜງເຟີນີເຈີ, ຂະແໜງ ຫັດຖະກໍາຈັກສານ ແລະ ອື່ນໆ.
ທ່ານນາງ ຈັນທະຈອນ ວົງໄຊ, ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ກ່າວໃນງານຖະແຫຼງຂ່າວງານຜະລິດຕະພັນລາວ ທີ່ໄດ້ຈັດຂຶ້ນເມື່ອບໍ່ດົນມານີ້ວ່າ: ງານວາງສະແດງສິນຄ້າໃນຄັ້ງນີ້ ຈະໄດ້ເຕົ້າໂຮມເອົາຜະລິດຕະພັນຂອງຄົນລາວ ທີ່ເປັນເອກະລັກ ແລະ ຜະລິດຕະພັນໃໝ່ໆຫຼາຍປະເພດມາລວມໄວ້ໃນບ່ອນດຽວ ເພື່ອເປັນການຊ່ວຍຟື້ນຟູເສດຖະກິດພາຍຫຼັງທີ່ຜູ້ປະກອບການໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ພ້ອມທັງ ສົ່ງເສີມເສດຖະກິດໃນຍຸກໃໝ່ໃນຮູບແບບ “ວິຖີຊີວິດໃໝ່” ໃຫ້ເກີດຄວາມຍືນຍົງ.
ນອນຈານນັ້ນ, ພາຍໃນງານ ຍັງຈະມີການສຳມະນາ ໃຫ້ຄວາມຮູ້ແກ່ຜູ້ປະກອບການທາງດ້ານການຄ້າ, ການເຂົ້າຫາແຫຼ່ງທຶນ, ທັງເປັນການສ້າງເວທີໂຄສະນາ ສົ່ງເສີມຜະລິດຕະພັນລາວ ເພື່ອສົ່ງເສີມສ້າງຈິດສຳນຶກ ໃຫ້ໃຫ້ຄົນລາວຫັນມາຊົມໃຊ້ຜະລິດຕະພັນລາວ ໜຶ່ງເມືອງໜຶ່ງຜະລິດຕະພັນ (ODOP) ແລະ ອື່ນໆ.
ທ່ານນາງ ຈັນທະຈອນ ວົງໄຊ ໄດ້ກ່າວຕື່ມອີກວ່າ: ພິເສດ ປີນີ້, ສະພາການຄ້າ ແລະ ອຸດສາຫະກຳ ແຂວງຫຼວງພະບາງ ເປັນເຈົ້າພາບຮ່ວມ ແລະ ເປັນປູຊະນີຍະສະຖານໃຫຍ່ໃນງານຄັ້ງນີ້ ເພື່ອມາສະແດງໃຫ້ເຫັນວິຖີຊີວິດ, ຮີດຄອງປະເພນີ, ວັດທະນະທໍາທີ່ສວຍງາມ ແລະ ບັນດາແຫຼ່ງທ່ອງທ່ຽວຕ່າງໆ ທີ່ຕິດພັນກັບການດໍາລົງຊີວິດ ຂອງຊາວເມືອງຫຼວງພະບາງ.ສໍາລັບ ງານວາງສະແດງຜະລິດຕະພັນລາວໃນຄັ້ງນີ້ ຈັດໂດຍ ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ, ສະພາການຄ້າ ແລະ ອຸດສາຫະກຳ ແຂວງ ແລະ ພາກສ່ວນທິ່ກ່ຽວຂ້ອງ, ຊຶ່ງງານດັ່ງນີ້ແມ່ນຄຽງຄູ່ກັບການປະຕິບັດຕາມຂໍ້ແນະນຳກ່ຽວກັບມາດຕະການປ້ອງກັນໂຄວິດ-19.
