Vientiane Times Lao
ງານວາງສະແດງເຟີນີເຈີໄມ້ ລາວ ຈະມີຜະລິດຕະພັນໃໝ່ທີ່ສວຍ ງາມ ແລະ ຫຼາກຫຼາຍກວ່າຄັ້ງຜ່ານມາ

ງານວາງສະແດງເຟີນີເຈີໄມ້ ລາວ ຈະມີຜະລິດຕະພັນໃໝ່ທີ່ສວຍ ງາມ ແລະ ຫຼາກຫຼາຍກວ່າຄັ້ງຜ່ານມາ

ສະມາຄົມເຟີນີເຈີ ລາວ ໄດ້ແຈ້ງໃຫ້ ຮູ້ວ່າ: ງານວາງສະແດງເຟີນີເຈີໄມ້ ລາວຄັ້ງທີ 6 ສຳລັບປີ 2020 ຈະມີ ຫຼາຍຜະລິດຕະພັນເຟີນີເຈີທີ່ສວຍງາມ ແລະ ຫຼາກຫຼາຍໃຫ້ຜູ້ເລືອກຊື້ ໂດຍຈະ ມີເຄື່ອງຕົບແຕ່ງເຮືອນທີ່ຜະລິດຈາກ ໄມ້, ຈາກໄມ້ໄຜ່-ໄມ້ປ່ອງ, ຈາກ ຫວາຍ ແລະ ອື່ນໆ ຊຶ່ງຈະມີພິທີເປີດ ງານວາງສະແດງດັ່ງກ່າວຢ່າງເປັນທາງການໃນຕອນບ່າຍຂອງມື້ວັນທີ 13 ມັງກອນ 2020 ນີ້ຢູ່ສູນການຄ້າລາວ ໄອ-ເຕັກ ນະຄອນຫຼວງວຽງຈັນ ຫຼັງຈາກທີ່ມີການວາງສະແດງສິນຄ້າ ແດ່ແລ້ວ ມາແຕ່ວັນເສົາທີ່ຜ່ານມາ ໂດຍ ມີຫຼາຍກວ່າ 60 ຫົວໜ່ວຍທຸລະກິດເຟີນີເຈີໄມ້  ທີ່ມາຈາກນະຄອນຫຼວງວຽງຈັນ ແລະ ຈາກ 11 ແຂວງເຂົ້າຮ່ວມ ລວມມີຫຼາຍ ກວ່າ 170 ຫ້ອງວາງສະແດງ. ນອກນັ້ນຍັງມີຫ້ອງວາງສະແດງສິນຄ້າໜຶ່ງເມືອງໜຶ່ງຜະລິດຕະພັນອີກ 26 ຫ້ອງ.

ທ່ານ ກອງມາລາ ພົມມາໄລ ຮອງປະ ທານເຟີນີເຈີລາວ ທັງເປັນຜູ້ຊີ້ນຳງານ ວາງສະແດງຄັ້ງນີ້ໄດ້ກ່າວໃນບໍ່ດົນມານີ້ວ່າ: ງານວາງສະແດງຄັ້ງນີ້ ຫຼື ຫຼາຍໆ ຄັ້ງທີ່ຜ່ານມາ ແມ່ນມີຈຸດປະສົງດຽວ ກັນ ເພື່ອສົ່ງເສີມ ຜະລິດຕະພັນ ເຟີນີ ເຈີໄມ້ລາວ ທີ່ຜະລິດຈາກສີມືຄົນລາວ ແລະ ລວດລາຍທີ່ເປັນເອກະລັກ ສ່ອງແສງເຖິງຮີດຄອງປະເພນີອັນດີ ງາມຂອງປະເທດລາວ ໃຫ້ເຂົ້າເຖິງຕະຫຼາດທັງພາຍໃນ ແລະ ກ້າວໄປສູ່ການວາງຂາຍສິນຄ້າຢູ່ພາກ ພື້ນ ແລະ ສາກົນເທື່ອລະກ້າວ ທັງເປັນການປະຕິບັດຕາມຄໍາສັ່ງ ເລກທີ 15/ນຍ.

ທ່ານ ກອງມາລາ ໄດ້ກ່າວຕື່ມວ່າ: ພາຍ ໃນງານນອກຈາກຈະມີການວາງສະ ແດງ ແລະ ຊື້-ຂາຍຜະລິດຕະພັນເຟີນີ່ ເຈີແລ້ວ ຍັງມີການສາທິດວິທີຜະລິດ  ເຟີນີເຈີໄມ້, ແກະສະຫຼັກໄມ້, ການສະແດງ ສີລະປະດົນຕີ, ການຈົກສະຫຼາກຮັບລາງວັນ ແລະ ກິດຈະກຳອື່ນໆໃນທຸກຄຳຄືນຕະຫຼອດງານຄາດວ່າງານວາງສະແດງໃນຄັ້ງນີ້ ຈະມີຜູ້ທ່ຽວຊົມ ແລະ ຊື້ສິນຄ້າເຟີນີເຈີ ບໍ່ໜ້ອຍກວ່າ 200,000 ຄົນ.

ຂ່າວ-ພາບ : ສົມພາວັນ 

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ