ສະຫະພັນມວຍສາກົນແຫ່ງຊາດລາວ ຈະຈັດການແຂ່ງຂັນກິລາມວຍສາກົນ ຊີງແຊ໋ມປະເທດລາວ ປະຈຳປີ 2025 ໃນລະຫວ່າງວັນທີ 7-9 ພຶດສະພາ 2025 ນີ້ ທີ່ເວທີມວຍສະຖາບັນກິລາ-ກາຍະກຳ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ.
ທ່ານ ສົມພອນ ມະນີຄຳ ເລຂາທິການສະຫະພັນມວຍສາກົນແຫ່ງຊາດລາວ ແຈ້ງໃຫ້ຮູ້ວ່າ: ການແຂ່ງຂັນໃນຄັ້ງນີ້ ເນັ້ນໃສ່ຄັດເລືອກນັກກິລາມວຍສາກົນສະໝັກຫຼິ້ນຜູ້ທີ່ມີພອນສະຫວັນດີເດັ່ນ ເພື່ອກຽມເຂົ້າຮ່ວມແຂ່ງຂັນງານກິລາມະຫາກຳກິລາຊີເກມ ຄັ້ງທີ 33 ທີ່ປະເທດໄທ ໃນທ້າຍປີ 2025 ນີ້, ສະນັ້ນ ຂໍໃຫ້ບັນດາສະໂມສອນມວຍຕ່າງໆ ພາຍໃນປະເທດ ຈົ່ງສົ່ງນັກກິລາເຂົ້າຮ່ວມແຂ່ງຂັນໃນຄັ້ງນີ້ ເພື່ອໃຫ້ສາມາດເລືອກໄດ້ນັກກິລາດີເດັ່ນ ກຽມສ້າງຜົນງານໃຫ້ແກ່ປະເທດຊາດ.
ສຳລັບ ການແຂ່ງຂັນລາຍການນີ້ ປະກອບມີ ຍິງ 4 ຮຸ່ນ: ຮຸ່ນນໍ້າໜັກ 48 ກິໂລກຣາມ, ຮຸ່ນນໍ້າໜັກ 50 ກິໂລກຣາມ, ຮຸ່ນນໍ້າໜັກ 54-57 ກິໂລກຣາມ ແລະ ຮຸ່ນນໍ້າໜັກ 60 ກິໂລກຣາມ. ສ່ວນຊາຍ 9 ຮຸ່ນ: ຮຸ່ນນໍ້າໜັກ 48 ກິໂລກຣາມ, ຮຸ່ນນໍ້າໜັກ 51 ກິໂລກຣາມ, ຮຸ່ນນໍ້າໜັກ 54 ກິໂລກຣາມ, ຮຸ່ນນໍ້າໜັກ 57 ກິໂລກຣາມ, ຮຸ່ນນໍ້າໜັກ 60 ກິໂລກຣາມ, ຮຸ່ນນໍ້າໜັກ 63,5 ກິໂລກຣາມ, ຮຸ່ນນໍ້າໜັກ 69 ກິໂລກຣາມ, ຮຸ່ນນໍ້າໜັກ 75 ກິໂລກຣາມ ແລະ ຮຸ່ນນໍ້າໜັກ 81 ກິໂລກຣາມ.
