Vientiane Times Lao
ຈະນໍາໃຊ້ເຈົ້າໜ້າທີ່ຫຼາຍກວ່າ 800 ຄົນເພື່ອປ້ອງກັນຄວາມສະຫງົບໃນງານບຸນຊ່ວງເຮືອທີ່ທ່າວັດຈັນ

ຈະນໍາໃຊ້ເຈົ້າໜ້າທີ່ຫຼາຍກວ່າ 800 ຄົນເພື່ອປ້ອງກັນຄວາມສະຫງົບໃນງານບຸນຊ່ວງເຮືອທີ່ທ່າວັດຈັນ

ອໍານາດການປົກຄອງເມືອງຈັນທະບູລີ ນະຄອນຫຼວງ ວຽງຈັນ ກຽມພ້ອມກໍາລັງປ້ອງກັນຄວາມສະຫງົບ ທັງໝົດ 800 ກວ່າຄົນ, ໃນນີ້ ກໍາລັງຊາວໜຸ່ມ 300 ກວ່າຄົນ ພ້ອມທັງກໍາລັງເຈົ້າໜ້າທີ່ ປ້ອງກັນຄວາມສະຫງົບ ແລະ ປ້ອງກັນຊາດ ເມືອງຈັນທະບູລີ, ກໍາລັງປ້ອງກັນຄວາມສະຫງົບ ບ້ານ 30 ບ້ານ ແລະ ອື່ນໆ ເຂົ້າຮ່ວມປ້ອງກັນຄວາມປອດໄພ, ຄວາມເປັນລະບຽບຮຽບຮ້ອຍ ໃນງານບຸນຊ່ວງເຮືອ ທີ່ທ່າວັດຈັນ ເນື່ອງໃນໂອກາດບຸນອອກພັນສາ ປະວໍລະນາ ປະຈໍາປີ 2020 ຈະຈັດຂຶ້ນລະຫວ່າງວັນທີ 1-3 ຕຸລາ 2020 ທີ່ຈະມາເຖິງນີ້.
ສໍາລັບກິດຈະກໍາປ້ອງກັນຄວາມປອດໄພ ໃນງານຄັ້ງນີ້ ແມ່ນໄດ້ມີການຈັດຕັ້ງປະຕິບັດປ້ອງກັນເວນຍາມ ຕະຫຼອດ 24 ຊົ່ວໂມງ ຢູ່ຕາມບ້ານ ສໍານັກງານ ອົງການຈັດຕັ້ງຕ່າງໆ ທົ່ວເມືອງ ໃຫ້ມີຄວາມສະງົບເປັນລະບຽບຮຽຮ້ອຍ 100%, ພ້ອມນີ້ ຍັງກໍານົດຈຸດປ້ອງກັນ 38 ຈຸດໃນງານບູນດັ່ງກ່າວ, ປ້ອມແຈ້ງເຫດ ( 1191) 2 ຈຸດ, ມີສູນກ້ອງວົງຈອນ ເພື່ອຕິດຕາມ ຢູ່ຫ້ອງການສວນເຈົ້າອະນຸວົງ ແລະ ຈຸດປ້ອງກັນ ອື່ນໆ ໃນຂອບເຂດງານບູນດັ່ງກ່າວ.
ແຕ່ລະປີ ງານບຸນຊ່ວງເຮືອ ເນື່ອງໃນໂອກາດບຸນອອກພັນສາ ແມ່ນເພື່ອເປັນການຮັກສາ ແລະ ເສີມຂະຫຍາຍງານບຸນປະເພນີ ທີ່ເຄີຍສືບທອດກັນມາແຕ່ບູຮານນະການ ໃຫ້ດໍາລົງຄົງຢູ່ນໍາຊາວລາວຕະຫຼອດໄປ, ພ້ອມນີ້ ຍັງເປັນການສົ່ງເສີມໂຄສະນາ ວາງສະແດງ ຈໍາໜ່າຍສິນຄ້າ ເພື່ອເຮັດໃຫ້ຜະລິດຕະພັນສິນຄ້າພາຍໃນ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງກວ້າງຂວາງ ແລະ ມີໂອກາດເສີມຂະຫຍາຍທ່າແຮງບົ່ມຊ້ອນຂອງສິນຄ້າດັ່ງກ່າວ ເພື່ອໃຫ້ປະຊາຊົນລາວບັນດາເຜົ່າ ທີ່ມາທ່ຽວງານບຸນໄດ້ຊື້ ໄດ້ຂາຍໄດ້ແລກປ່ຽນຜະລິດຕະພັນພາຍໃນ ແລະ ທັງເປັນການສົ່ງເສີມການທ່ອງທ່ຽວພາຍໃນ ຫຼື ລາວທ່ຽວລາວ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ