Visit BigblueAgency
ຈະ​ຂຸດຄົ້ນຫີນປູນ-ດິນໜຽວ ຢູ່ເມືອງເຟືອງເພື່ອປ້ອນໂຮງງານຊີມັງ

ຈະ​ຂຸດຄົ້ນຫີນປູນ-ດິນໜຽວ ຢູ່ເມືອງເຟືອງເພື່ອປ້ອນໂຮງງານຊີມັງ

ລັດຖະບານລາວ ໄດ້ຮ່ວມມືກັບບໍລິສັດ ວຽງຈັນຄອນຊີມັງ ຈຳກັດ (Conch Internetional Holding Co.,Ltd) ແລະ ບໍລິສັດ ກຣິດຕະພົງ ກຣຸບ ຈຳກັດ ເພື່ອຂຸດຄົ້ນ ແລະ ປຸງແຕ່ງຫີນປູນ-ດິນໜຽວຢູ່ເມືອງເຟືອງ ແຂວງວຽງຈັນ ເພື່ອສະໜອງໃຫ້​ໂຮງ​ງານ​ຜະ​ລິດ​ຊີ​ມັງ ກຣິນເກີ (Clinker) ຈຳນວນ 5.000 ໂຕນຕໍ່ວັນ ໂດຍຈະມີການຂຸດຄົ້ນຫີນປູນ-ດິນໜຽວຢູ່ 5 ບ້ານຊຶ່ງປະກອບມີ ບ້ານໂພນໄຊ, ບ້ານພູພຽງ, ບ້ານນາທູນ, ບ້ານໜອງປໍ ແລະ ບ້ານນໍ້າ​ປຸ່ງ.
ພິທີເຊັນສັນຍາຂຸດຄົ້ນດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ ​ໂດຍຕາງໜ້າລັດຖະບານລາວເຊັນໂດຍ ທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນ​ການ ແລະ ການ​ລົງ​ທຶນ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ເຕັ່ງເມັ່ງ ຢ່າງລືໄຊ ວ່າການຫົວໜ້າພະແນກ​ແຜນ​ການ ແລະ ການ​ລົງ​ທຶນແຂວງວຽງຈັນ ແລະ ຕາງໜ້າບໍລິສັດ ເຊັນໂດຍທ່ານ ເຈີ້ງ ຫຼິນ ໄຫ່ (Zheng Lin Hai) ຜູ້ຊ່ວຍອໍານວຍການ ບໍລິສັດ ວຽງຈັນຄອນຊີມັງຈໍາກັດ ແລະ ທ່ານ ນາງ ອໍລະໄທ ສັນຕິຄົງຄາ ຜູ້ອຳນວຍ ການໃຫຍ່ ບໍລິສັດ ກຣິດຕະພົງ ກຣຸບ ຈຳກັດ.
ນາງ ອໍລະໄທ ສັນຕິຄົງຄາ ຜູ້ອຳນວຍ ການໃຫຍ່ ບໍລິສັດ ກຣິດຕະພົງ ກຣຸບ ຈຳກັດໄດ້ກ່າວໃນພິທີວ່າ: ການຮ່ວມມືຂອງ 2 ບໍລິສັດ ກັບລັດຖະບານລາວໃນຄັ້ງນີ້ ແມ່ນເປັນການຕອບສະໜອງຂໍ້ລິເລີ່ມໜຶ່ງແລວໜຶ່ງເສັ້ນທາງ ຂອງ ສປ ຈີນ ຊຶ່ງ ເປັນສິ່ງສໍາຄັນໃນການຊຸກຍູ້ຍຸດທະສາດການພັດທະນາໃນລະດັບສາກົນ ທັງເປັນການຫຼຸດຜ່ອນການນໍາເຂົ້າຊີມັງຈາກຕ່າງປະເທດ ແນໃສ່ຕອບສະໜອງໄດ້ຕາມຄວາມຮຽກຮ້ອງຕ້ອງ ການຂອງຕະຫຼາດ ຊຶ່ງໄດ້ມີແຜນສ້າງສອງສາຍການຜະລິດຊີມັງ-ກຣິນເກີ້ ໃນຈຳນວນ 5.000 ໂຕນຕໍ່ວັນ, ລະບົບບົດເປັນຝຸ່ນຊີມັງ 2.200.000 ໂຕນ ແລະ ອື່ນໆ. ການຂຸດຄົ້ນຈະນໍາໃຊ້ເຕັກໂນໂລຊີທີ່ທັນສະໄໝ ເນັ້ນຮັກສາສະພາບແວດລ້ອມໃນຊຸມຊົນ, ປະຕິບັດຕາມມາດ ຕະຖານຄຸນນະພາບຜະລິດຕະພັນຊີມັງ ASTM150-2017 ແລະ ISO9001 ເພື່ອສະໜອງຜະລິດ ຕະພັນຊີມັງທີ່ດີທີ່ສຸດໃຫ້ປະເທດລາວ.

ຂ່າວ-ພາບ:ສຸກສະຫວັນ

Related Articles

Leave a Reply