Vientiane Times Lao
ຈຳນວນຜູ້ປ່ວຍໄຂ້ຍຸງລາຍເພີ່ມຂຶ້ນແຕ່ບໍ່ມີຜູ້ເສຍຊີວິດເພີ່ມ

ຈຳນວນຜູ້ປ່ວຍໄຂ້ຍຸງລາຍເພີ່ມຂຶ້ນແຕ່ບໍ່ມີຜູ້ເສຍຊີວິດເພີ່ມ

ເປັນໄລຍະເວລາ 37 ວັນແລ້ວທີ່ ສປປ ລາວບໍ່ພົບຜູ້ເສຍຊິວິດເພີ່ມຂື້ນຍ້ອນໄຂ້ຍຸງ ລາຍ, ນັບແຕ່ວັນທີ 22 ກັນຍາ ຫາ ວັນທີ 28 ຕຸລາ 2020 ຜ່ານມາ, ແຕ່ຈຳນວນຜູ້ປ່ວຍໄຂ້ຍຸງລາຍຍັງສືບຕໍ່ເພີ່ມຂຶ້ນ ຊຶ່ງ ນັບແຕ່ເດືອນມັງກອນ ປີ 2020 ມາຮອດປັດຈຸບັນມີທັງໝົດ 7.512 ກໍລະນີ.
ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃຫ້ຮູ້ ວ່າ: ປະຈຸບັນ, ນະຄອນຫຼວງວຽງຈັນ ເປັນອັນດັບໜຶ່ງທີ່ມີຜູ້ຕິດເຊື້ອພະຍາດໄຂ້ຍຸງລາຍ 1.713 ຄົນ, ຖັດລົງມາແມ່ນ ແຂວງບໍລິຄຳໄຊ 876 ຄົນ, ບໍ່ແກ້ວ 706 ຄົນ, ສະຫວັນນະເຂດ 697 ຄົນ, ວຽງຈັນ 695 ຄົນ ແລະ ແຂວງ ອື່ນໆ, ໃນນັ້ນ ເສຍຊີວິດລວມແລ້ວ 12 ຄົນ (ນະຄອນຫຼວງວຽງຈັນ 4 ຄົນ, ແຂວງ ບໍລິຄໍາໄຊ 2 ຄົນ, ຄຳມ່ວນ 02ຄົນ, ໄຊຍະບູລີ 01 ຄົນ,ຊຽງຂວາງ 01 ຄົນ, ສະຫວັນນະເຂດ 01 ຄົນ ແລະ ຜົ້ງສາລີ 01 ຄົນ ).
ເພື່ອຕອບໂຕ້ກັບ ການລະບາດຂອງພະຍາດ ໄຂ້ຍຸງລາຍ ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຮຽກຮ້ອງໃຫ້ປະຊາຊົນລາວ ພ້ອມກັນກຳຈັດ ແລະ ທຳລາຍແຫຼ່ງເພາະພັນ ໜອນນ້ຳຍຸງລາຍ ທີ່ເປັນພາຫະນຳເຊື້ອ, ຊຶ່່ງໄຂ້ຍຸງລາຍເປັນວຽກງານ ໜຶ່ງທີ່ສຳຄັນ ທີ່ຈະຕ້ອງ ໄດ້ຈັດຕັ້ງປະຕິບັດ ໃຫ້ເປັນປະຈຳ ທຸກອາທິດ ແນໃສ່ເຮັດໃຫ້ການລະບາດ ຂອງໄຂ້ຍຸງລາຍ ຫຼຸດລົງເທື່ອລະກ້າວ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ