Vientiane Times Lao
ຈຳປາສັກຄາດວ່ານັກທ່ອງທ່ຽວຈະບໍ່ໄດ້ຕາມແຜນ

ຈຳປາສັກຄາດວ່ານັກທ່ອງທ່ຽວຈະບໍ່ໄດ້ຕາມແຜນ

ພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ແຂວງຈຳປາສັກລາຍງານໃຫ້ຮູ້ວ່າ: ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເຂົ້າມາທ່ຽວຊົມແຫຼ່ງທ່ອງທ່ຽວພາຍໃນແຂວງຈຳປາສັກ ໃນໄລຍະ 9 ເດືອນຜ່ານມາມີທ່າອ່ຽງຫຼຸດລົງ ເນື່ອງຈາກຫຼາຍສາເຫດເປັນຕົ້ນ ແຂວງຈຳປາສັກຖືກນ້ຳຖ້ວມ ແຕ່ທ້າຍເດືອນ ສິງຫາ ຫາ ຕົ້ນເດືອນກັນຍາຜ່ານມາ ເຮັດໃຫ້ເສັ້ນທາງເຂົ້າຫາແຫຼ່ງທ່ອງທ່ຽວຫຼາຍແຫ່ງຖືກຕັດຂາດ ແລະ ເຮັດໃຫ້ມີຫຼາຍກິດຈະກຳທີ່ຕິດພັນກັບປີທ່ອງທ່ຽວລາ-ຈີນ 2019 ພາຍໃນແຂວງ ຖືກຍົກເລີກ.
ທ່ານ ນາງ ມາລາ ຈັນທະລາມ ຫົວໜ້າພະແນກ ຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ແຂວງຈຳປາສັກໄດ້ໃຫ້ສຳພາດຕໍ່ສື່ມວນຊົນວ່າ: ຄວາມຫວັງທີ່ຈະໃຫ້ນັກທ່ອງທ່ຽວເຂົ້າມາທ່ຽວຊົມແຫຼ່ງທ່ອງທ່ຽວພາຍໃນແຂວງ ຄົງຈະເບີ່ງໃນ 3 ເດືອນທ້າຍປີ ສ່ວນທາງພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວຈະສຸມໃສ່ສຸດຄວາມສາມາດເພື່ອດຶງນັກທ່ອງທ່ຽວເຂົ້າມາໃຫ້ ໄດ້ຕາມແຜນທີ່ວາງໄວ້. ສຳລັບນັກທ່ອງທ່ຽວທີ່ຈະມາທ່ຽວແຂວງຈຳປາ ສັກປີນີ້ຫຼາຍກວ່າໝູ່ແມ່ນນັກທ່ອງທ່ຽວທີ່ມາຈາກປະເທດເພື່ອນບ້ານຄື: ນັກທ່ອງທ່ຽວຈາກປະເທດໄທ, ກຳປູເຈຍ ແລະ ຫວຽດນາມ. ນອກຈາກນີ້ ແມ່ນນັກທ່ອງທ່ຽວ ມາຈາກບັນດາປະເທດຢູ່ເອີຣົບ, ສ່ວນຜົນກະທົບຈາກ ໄພນ້ຳຖ້ວມຢູ່ແຂວງຈຳປາສັກສ່ວນໃຫ່ຍແມ່ນເສັ້ນທາງໄປຫາແຫຼ່ງ ທ່ອງທ່ຽວຖືກຕັດຂາດ ແຕ່ສະຖານທີ່ທ່ອງທ່ຽວແມ່ນໄດ້ຮັບຜົນກະທົບບໍ່ຫຼາຍ.
ຂ່າວ : ສົມພາວັນ

Related Articles

Leave a Reply