Vientiane Times Lao
ຈີນຊ່ວຍເຫຼືອດ້ານອຸປະກອນການແພດແກ່ລາວໃນການປ້ອງກັນ ໂຄວິດ-19

ຈີນຊ່ວຍເຫຼືອດ້ານອຸປະກອນການແພດແກ່ລາວໃນການປ້ອງກັນ ໂຄວິດ-19

ສະຖານທູດ ສປ ຈີນ ປະຈຳ ສປປ ລາວ ໄດ້ແຈ້ງໃຫ້ຮູ້ໃນວັນທີ 26 ມີນາ 2020 ນີ້ ພັກ ແລະ ລັດຖະບານຈີນ ໄດ້ໃຫ້ຄວາມເອົາໃຈໃສ່ຢ່າງສູງຕໍ່ການຮ່ວມມືກັບຝ່າຍລາວ ໃນການປ້ອງກັນ ແລະ ຄວບຄຸມພະຍາດ ໂຄວິດ-19.

ນັບມາຮອດປະຈຸບັນ, ລັດຖະບານຈີນໄດ້ສະໜອງຢາກວດເຊື້ອໄວຣັດຈຳນວນ 2,016 ຊຸດ ໃຫແກ່ລາວແລ້ວ, ນອກນັ້ນ ຊຸດປ້ອງກັນ 5,000 ຊຸດ, ຜ້າປິດປາກລຸ້ນ N95 ແລະ ຜ້າປິດປາກການແພດທຳມະດາຈຳນວນ 4 ແສນອັນ ພ້ອມກັບຢາກວດເຊື້ອໄວຣັດ 2 ໝື່ນຊຸດ ທີ່ບໍລິຈາກໂດຍມູນນິທິແຈ໋ກມາ ກຳລັງສົ່ງໄປໃຫ້ລາວ.

ໃນຕໍ່ໜ້າ ລັດຖະບານຈີນ ຍັງຈະອີງຕາມຄວາມຕ້ອງການຕົວຈິງຂອງລາວໃນການປ້ອງກັນ ແລະ ຄວບຄຸມພະຍາດ ແລ້ວໃຫ້ການຊ່ວຍເຫຼືອທີ່ສົມຄູ່ກັນ.

ໃນຂະນະດຽວກັນນີ້, ອົງການປົກຄອງທ້ອງຖີ່ນຕ່າງໆຂອງຈີນເຊັ່ນ ແຂວງຢຸນນານ, ຫູໜານ, ນະຄອນສຸງສິງ, ແຂວງຊານຕົງ ແລະ ນະຄອນຊຽງໄຮ້ ເປັນຕົ້ນພ້ອມກັບສະມາຄົມພັດທະນາເສດຖະກິດອາຊີຈີນ, ສະຫະພັນນັກວິສາຫະກິດຈີນ ແລະ ຕ່າງປະເທດ, ທະນາຄານ ICBC ສາຂານະຄອນຫຼວງວຽງຈັນ ກໍ່ຄືອົງການຈັດຕັ້ງຕ່າງໆ, ພ້ອມກັບຊາວຈີນທີ່ຢູ່ລາວກໍ່ຄື ຄະນະຊາວຈີນຕ່າງດ້າວກໍ່ໄດ້ຕັ້ງໜ້າໃຫ້ການຊ່ວຍເຫຼືອ ແລະ ບໍລິຈາກ, ເຊິ່ງອຸປະກອນເຫຼົ່ານີ້ ມີສ່ວນໜຶ່ງໄດ້ຖືກສົ່ງໄປຮອດລາວແລ້ວ, ທີ່ເຫຼືອນັ້ນກໍ່ພວມຫ້າງຫາກະກຽມຢູ່.

ໃນນາມເປັນຄູ່ຮ່ວມຊາຕາກຳ, ພັກລັດ ກໍ່ຄືປະຊາຊົນຈີນ ມີຄວາມເຫັນອົກເຫັນໃຈຕໍ່ລາວທີ່ກຳລັງປະສົບການກະທົບຈາກພະຍາດໂຄວິດ-19, ແລະ ຍິນດີຮ່ວມໃຈຮ່ວມແຮງກັບກັບຝ່າຍລາວຜ່ານຜ່າຄວາມຫຍຸ້ງຍາກໃນປະຈຸບັນ.

ຂ່າວ: ວຽງຈັນທາຍ (ແຫຼ່ງຂໍ້ມູນສະຖານທູດ ສປ ຈີນ ປະຈຳ ສປປ ລາວ)

Related Articles

Leave a Reply