ໃນສະພາບການປ່ຽນແປງຂອງດິນຟ້າອາກາດ ແລະ ກ້າວເຂົ້າສູ່ລະດູໜາວ ຊຶ່ງເປັນໄລຍະທີ່ເໝາະສົມແກ່ການຂະຫຍາຍຕົວ ແລະ ການລະບາດຂອງພະຍາດ ຕາມລະດູການເຊັ່ນ: ພະຍາດໄຂ້ຫວັດ, ເຈັບຄໍ, ພະຍາດອັກເສບລະບົບຫາຍໃຈ ແລະ ພະຍາດອື່ນໆ.
ຕໍ່ສະພາບອາກາດໜາວນີ້, ໃຫ້ທຸກຄົນເອົາໃຈໃສ່ເບິ່ງແຍງສຸຂະພາບຕົນເອງໃຫ້ດີ ເຊັ່ນ: ນຸ່ງຫົ່ມໃຫ້ຮ່າງກາຍອົບອຸ່ນຢູ່ສະເໝີ, ຫາກມີອາການບໍ່ສະບາຍ ໃຫ້ໄປປິ່ນປົວນໍາແພດທີ່ໂຮງໝໍໃກ້ບ້ານຂອງຂອງທ່ານ, ສິ່ງສໍາຄັນບໍ່ຄວນຊຶ້ຢາມາກິນເອງ.
ພະຍາກອນອາກາດ ປະຈໍາວັນທີ 29 ພະຈິກ 2024: ມວນອາກາດໜາວເຢັນທີ່ປະເທດຈີນ ຍັງຈະສືບຕໍ່ແຜ່ລົງມາປົກຄຸມ ຢູ່ທົ່ວທຸກພາກຂອງປະເທດລາວ ດ້ວຍກໍາລັງປານກາງ ຫາ ແຮງ ສົມທົບກັບກະແສລົມຕາເວັນອອກສ່ຽງເໜືອ ຍັງພັດປົກຄຸມດ້ວຍກໍາລັງແຮງ, ຊຶ່ງຈະເຮັດໃຫ້ອາກາດຈະໜາວເຢັນລົງຕື່ມອີກ ໂດຍສະເພາະຢູ່ແຂວງພາກເໜືອດ້ານຕາເວັນອອກ, ແຂວງໄຊສົມບູນ ແລະ ເຂດພູພຽງບໍລະເວນ ພ້ອມຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນ ແລະ ຈະມີລົມພັດແຮງ ຢູ່ແຂວງພາກກາງ ແລະ ພາກໃຕ້.
