Vientiane Times Lao
ຈໍານວນຜູ້ຕິດເຊື້ອພະຍາດໂຄວິດ-19 ໃນທົ່ວໂລກຍັງມີທ່າອ່ຽງເພີ່ມຂຶ້ນ

ຈໍານວນຜູ້ຕິດເຊື້ອພະຍາດໂຄວິດ-19 ໃນທົ່ວໂລກຍັງມີທ່າອ່ຽງເພີ່ມຂຶ້ນ

ປະຈຸບັນ ສະພາບການລະບາດ​ຂອງ​ພະ​ຍາດ ໂຄວິດ-19 ໃນບັນ​ດາປະເທດໃກ້ຄຽງ ແລະ ໃນໂລກ ຍັງສຶບຕໍ່ເພີ່ມຂຶ້ນເລື້ອຍໆ, ຊຶ່ງມາຮອດວັນທີ 16 ຕຸລາ 2020, ທົ່ວໂລກມີການລະບາດ ທັງໝົດ 214 (ປະເທດ/ເຂດ), ມີການຢັ້ງຢືນຜູ້ຕິດເຊື້ອພະຍາດ COVID-19 ຈຳນວນ 39.129.732 ຄົນ, ເສຍຊິວິດ 1.102.073 ຄົນ ເຊິ່ງກວມເອົາ 2,81 % ຂອງຜູ້ຕິດເຊື້ອທັງໝົດ ແລະ  ປີ່ນປົວຫາຍດີ 29.342.135 ຄົນ ເຊິ່ງກວມເອົາ 74,9 % ຂອງຜູ້ຕິດເຊື້ອທັງໝົດ, ໃນນັ້ນ ປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ ແມ່ນ ສະຫະລັດອາເມຣິກາ, ຊຶ່ງມີຜູ້ຕິດເຊື້ອສະສົມ 8.211.417 ຄົນ, ເສຍຊີວິດສະສົມ 222.682 ຄົນ.

ສໍາລັບຢູ່ຂົງເຂດອາຊີ ກໍ່ແມ່ນປະເທດ ອິນເດຍ ທີ່ມີທ່າອ່ຽງ ໃນການຕິດເຊື້ອ ໂຄວິດ-19 ເພິ່ມຂຶ້ນ, ມີຜູ້ຕິດເຊື້ອສະສົມ 7.365.435 ຄົນ ແລະ ຜູ້ຕິດເຊື້ອມື້ດຽວສູງເຖິງ 60.365 ຄົນ, ໂດຍສະເພາະ ໃນບັນດາກຸ່ມປະເທດອາຊຽນ ມີການຢັ້ງຢືນ ຜູ້ຕິດເຊື້ອພະຍາດ ໂຄວິດ-19 ແມ່ນ 811.472  ຄົນ ແລະ ເສຍຊີວິດ 19.825 ຄົນ.

ຮອງຫົວໜ້າກົມຄວບຄຸມພະຍາດຕິດຕໍ່, ​ກະຊວງສາທາລະນະສຸກ, ຕາງໜ້າໃຫ້ກອງເລຂາຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດ ໂຄວິດ-19,​ ດຣ. ລັດສະໝີ ວົງຄຳຊາວ ໄດ້ຖະແຫຼງຂ່າວຕອນເຊົ້າວັນທີ 16 ຕຸລາ 2020 ວ່າ: ສໍາລັບການເຝົ້າລະວັງໂຄວິດ-19 ຢູ່ ສປປ ລາວ ຂອງວັນທີ 15 ຕຸລາ 2020, ທົ່ວປະເທດມີຜູ້ເດີນທາງເຂົ້າມາ ທັງໝົດ 1,870 ຄົນ: ໃນນັ້ນຈຸດຜ່ານດ່ານ ລາວ-ໄທ 1.052 ຄົນ (ແຮງງານລາວກັບມາແຕ່ໄທ 71 ຄົນ); ຈຸດຜ່ານດ່ານ ລາວ-ຈີນ 186 ຄົນ, ໃນນັ້ນ ແຮງງານລາວ 27 ຄົນ ຜ່ານດ່ານບໍ່ເຕັນ, ແຂວງຫຼວງນ້ຳທາ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ; ຈຸດຜ່ານດ່ານ ລາວ-ຫວຽດນາມ 632 ຄົນ ເຊິ່ງເຂົ້າມາໂດຍໄດ້ຮັບອະນຸຍາດ ຈາກຄະນະສະເພາະກິດ (ໃນນັ້ນ ມີນັກສຶກສາ 08 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ ເຊິ່ງສ່ວນຫຼາຍ ແມ່ນເຂົ້າມາປ່ຽນຖ່າຍສິນຄ້າ ແລະ ປ່ຽນຜູ້ຂັບລົດຢູ່ດ່ານ); ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກ​ໆຄົນມາກວດ (ຍົກ​ເວັ້ນແຕ່​ຜູ້​ຂັບ​ລົດ​ຂົນ​ສົ່ງ ​ແລະ ​ຜູ້​ຕິດ​ຕາມ​) ແລ້ວຈຶ່ງນຳສົ່ງໄປ​ຫາສະຖານ ທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ພອ້ມນັ້ນ ໄດ້ເກັບຕົວຢ່າງມາກວດວິເຄາະທັງໝົດ 254 ຄົນ, ໃນນັ້ນ ມີແຮງງານລາວມາແຕ່ໄທ 180 ຕົວຢ່າງ, ແຮງງານຫວຽດນາມ 42 ຄົນ, ບຸກຄົນທົ່ວໄປທີ່ບໍ່ມີອາການ 31 ຕົວຢ່າງ ແລະ ບຸກຄົນທົ່ວໄປທີ່ມີອາການ 01 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອ, ໝາຍຄວາມວ່າໃນວັນທີ 15 ຕຸລາ 2020 ບໍ່ມີຜູ້ຕິດເຊື້ອໃໝ່; ສັງລວມການກວດວິເຄາະ ແຕ່ເດືອນມັງກອນ ຮອດວັນທີ 15 ຕຸລາ 2020 ໄດ້ເກັບຕົວຢ່າງມາກວດທັງໝົດ 59.448 ຕົວຢ່າງ, ກວດພົບເຊື້ອສະສົມ 23 ຄົນ.

ສໍາລັບ ການຕິດຕາມປີ່ນປົວຄົນເຈັບຢູ່ໂຮງໝໍ, ປະຈຸບັນ ຄົນເຈັບຕິດເຊື້ອພະຍາດ ໂຄວິດ-19 ນ້ຳເບີ 23 ແມ່ນຍັງສືບຕໍ່ປີ່ນປົວ ຢູ່ໂຮງໝໍມິດຕະພາບ ແລະ ບໍ່ມີອາການຜິດປົກກະຕິຫຍັງ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ