Vientiane Times Lao
ຍິງໂຫດ! ດັບຄາທີ່ສອງຄົນຢູ່ເຂດຖະໜົນ 450 ປີ, ເຈົ້າໜ້າທີ່ຂຸ້ນຂ້ຽວສືບຫາຄົນຮ້າຍ

ຍິງໂຫດ! ດັບຄາທີ່ສອງຄົນຢູ່ເຂດຖະໜົນ 450 ປີ, ເຈົ້າໜ້າທີ່ຂຸ້ນຂ້ຽວສືບຫາຄົນຮ້າຍ

ເຈົ້າໜ້າທີ່ປ້ອງກັນຄວາມສະຫງົບນະຄອນຫຼວງ ວຽງຈັນກຳລັງຂຸ້ນຂ້ຽວຫາໂຕຜູ້ກໍ່ເຫດຍິງກັນຢູ່ ໃກ້ຖະໜົນ 450 ປີ ໃນມື້ວານນີ້ 21 ມັງກອນ 2020 ເຮັດໃຫ້ມີຜູ້ເສຍຊີວິດ ສອງຄົນ ເປັນ ຜູ້ຊາຍ.

ໃນເວລາກາງເດິກ ຂອງເຊົ້າ ມື້ນີ້ 22 ມັງກອນ 2020 ໜ່ວຍຊ່ວຍເຫຼືອກູ້ໄພໄດ້ຮັບແຈ້ງວ່າ ມີຄົນພົບເຫັນ ຄົນຖືກຍິງເສຍຊີວິດສອງ ຄົນເປັນຜູ່ຊາຍຢູ່ໃນລົດເກງຮຸນໄດເອັກເຊັນ Hyundai Accent ສີປອນເງິນທະບຽນ ກດ 7437 ປ້າຍສີຂາວ ຢູ່ເຂດດິນຫວ່າງເປົ່າ ໃກ້ກັບເສັ້ນທາງ 450 ປີ, ບ້ານນາຄວາຍ.

ຜ່ານການກວດກາສືບສວນສອບສວນຂອງເຈົ້າໜ້າທີ່ ໄດ້ຮູ້ວ່າ ຜູ່ເສຍຊີວິດ ແມ່ນ ທ້າວ ສອນສຸລີຍາ ຫຼື ບອຍ ອາຍຸ 32 ປີ ຢູ່ ບ້ານໂພນເຄັງ ເມືອງໄຊເຊດຖາ ເປັນຄົນຂັບລົດ ແລະ ຖືກຍິງຈາກເບື້ອງນອກແວ່ນລົດຟາກຄົນ ຂັບຊອດແວ່ນຖືກຜູ່ກ່ຽວ ແຕ່ຍັງບໍ່ທັນຮູ້ວ່າຖືກ ຈັກລູກ, ເຫັນຮອຍລູກປືນຖືກແວ່ນລົດປະມານ 10 ລູກ.

ຜູ້ທີສອງທີ່ນັ່ງລົດມານຳກັນຢູ່ເບາະໜ້າເບື້ອງ ຂວາ ແມ່ນ ທ້າວ ພິດສະນິກອນ 25 ປີ ຢູ່ບ້ານ ໜອງໜ່ຽງ ເມືອງ ໄຊເຊດຖາ ກໍ່ຖືກຍິງເສຍຊີ ວິດຄາປະຕູລົດຫົວຕົກລົງພື້ນດິນຂາຍັງຄ້າງຢູ່ລົດ ແລະ ມີຮ່ອງຮ່ອຍການຖືກຍິງປະມານ 6-7 ລູກ ທັງສອງເສຍຊິວິດຄາທີ່.

ຕາມການສອບຖາມຂໍ້ມູນເບື້ອງຕົ້ນ ກັບນາງ ພູມອນ 28 ປີ ເປັນແຟນຂອງ ທ້າວ ສອນສຸລິຍາ ຂອງເຈົ້າໜ້າທີ່ ພົບວ່າ ຜູ້ເຄາະຮ້າຍທັງສອງ ອາດຖືກຄາດຕະກຳ ໃນເວລາປະມານ 18-19 ໂມງ ຂອງມື້ວານນີ້ ເພາະວ່າ ຊ່ວງເວລາ 18 ໂມງປາຍ ກໍ່ຍັງຕິດຕໍ່ກັນໄດ້ຢູ່, ຈາກນັ້ນ ກໍ່ບໍ່ສາມາດຕິດຕໍ່ໄດ້ ຈຶ່ງໄດ້ຂີ່ລົດຊອກຫາ. ປະມານ 22 ໂມງ ຈຶ່ງເຫັນໄຟຕາລົດຮຸ່ງຢູ່ບ່ອນ ເກີດເຫດຈຶ່ງຊວນໝູ່ມາເບິ່ງ ແລະ ກໍ່ຮູ້ວ່າເປັນ ແຟນຂອງໂຕເອງ ຈື່ງແຈ້ງໜ່ວຍກູ້ໄພ ແລະ ເຈົ້າໜ້າທີ່ ປກສ ເມືອງຫາດຊາຍຟອງ.

ເຈົ້າໜ້າທີ່ ປກສ ນະຄອນຫຼວງໄດ້ກ່າວໃນຕອນ ບ່າຍທີ່ຜ່ານມາວ່າ ທາງເຈົ້າໜ້າທີ່ກຳລັງລະດົມ ກຳລັງສືບສວນສອບສວນຫາສາເຫດທີ່ພາໃຫ້ ເກີດເຫດການດັ່ງກ່າວ.

ຂ່າວ: ວຽງຈັນທາຍ

ພາບ: ປກສ ນະຄອນຫຼວງ

Related Articles

Leave a Reply