Vientiane Times Lao
<strong>ຍີ່ປຸ່ນ ມອບຫຼຽນກຽດຕິຄຸນ ອາທິດອຸໄທ ຊັ້ນ 1 ໃຫ້ຮອງປະທານປະເທດ ແຫ່ງ ສປປ ລາວ</strong>

ຍີ່ປຸ່ນ ມອບຫຼຽນກຽດຕິຄຸນ ອາທິດອຸໄທ ຊັ້ນ 1 ໃຫ້ຮອງປະທານປະເທດ ແຫ່ງ ສປປ ລາວ

ລັດຖະບານຍີ່ປຸ່ນ ຕາງໜ້າໂດຍ ທ່ານ ໂຄບະຢະຊິ ເຄນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ມອບຫຼຽນກຽດຕິຄຸນ​ ອາທິດອຸໄທ ຊັ້ນ 1 ໃຫ້ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ຊຶ່ງພິທີມອບຫຼຽນດັ່ງກ່າວ ໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ.

ຫຼຽນກຽດຕິຄຸນ​ ອາທິດອຸໄທ ຊັ້ນ 1 ເປັນລາງວັນກຽດຕິຍົດສູງສຸດ ຂອງພົນລະເຮືອນຍີ່ປຸ່ນ ແມ່ນການປະກອບສ່ວນຢ່າງພົ້ນເດັ່ນ ໃນການຊຸກຍູ້, ເສີມຂະຫຍາຍສາຍພົວພັນສອງຝ່າຍ ແລະ ສົ່ງເສີມມິດຕະພາບລະຫວ່າງ ຍີ່ປຸ່ນ ແລະ ສປປ ລາວ ຕະຫຼອດມາ.

ໃນໂອກາດນີ້, ທ່ານ ໂຄບະຢະຊິ ເຄນອິຈິ ໄດ້ກ່າວວ່າ: ໃນໄລຍະທີ່ດຳລົງຕໍາແໜ່ງ ຂອງທ່ານ ນາງ ປານີ ຢາທໍ່ຕູ້ ເປັນປະທານສະພາແຫ່ງຊາດ (2010-2021) ໄດ້ມີສ່ວນຮ່ວມສໍາຄັນໃນການພັດທະນາສາຍພົວພັນສອງຝ່າຍ ຊຶ່ງຜ່ານການຮ່ວມມືຢ່າງຮອບດ້ານ ກັບປະເທດຍີ່ປຸ່ນ ໃນໄລຍະດັ່ງກ່າວ, ທ່ານໄດ້ໄປຢ້ຽມຢາມປະເທດຍີ່ປຸ່ນເຖິງ 3 ຄັ້ງ ແລະ ຍັງໄດ້ເປັນເຈົ້າພາບຕ້ອນຮັບຄະນະລັດຖະສະພາຂອງຍີ່ປຸ່ນ ທີ່ມາຢ້ຽມຢາມ ສປປ ລາວ ເພື່ອສົ່ງເສີມການແລກປ່ຽນ ລະຫວ່າງ ສະພາຂອງສອງປະເທດ.

ນອກຈາກນັ້ນ, ທ່ານ ຍັງໄດ້ນຳພາ ແລະ ສົ່ງເສີມຫຼາຍໂຄງການການຮ່ວມມື ລະຫວ່າງ ຍີ່ປຸ່ນ ແລະ ສປປ ລາວ ໃນຫຼາຍຂະແໜງການ,ໂດຍສະເພາະໃນປີ 2012 ຂໍ້ຕົກລົງເພື່ອລິເລີ່ມການຮ່ວມມືດ້ານປະມວນກົດໝາຍແພ່ງຂອງລາວ ກໍໄດ້ຮັບການລົງນາມໂດຍ ທ່ານ ນາງ ປານີ ຢາທໍ່ຕູ້ ແລະ ທ່ານ ທາກິ ລັດຖະມົນຕີກະຊວງຍຸດຕິທໍາຍີ່ປຸ່ນ ໃນລະຫວ່າງການມາຢ້ຽມຢາມ ສປປ ລາວ, ການປະມວນກົດໝາຍແພ່ງຂອງລາວສະບັບດັ່ງກ່າວ ຖືວ່າເປັນການຮ່ວມມືຂັ້ນສູງສຸດທາງດ້ານນິຕິກຳ ລະຫວ່າງສອງປະເທດ ຊຶ່ງກົດໝາຍແພ່ງຂອງລາວ ສະບັບປີ 2018 ກໍໄດ້ຮັບການອະນຸມັດໂດຍ ທ່ານ ນາງ ປານີ ຢາທໍ່ຕູ້ ໃນຖານະທີ່ເປັນປະທານສະພາແຫ່ງຊາດ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ