Vientiane Times Lao
ຍີ່ປຸ່ນ ສືບຕໍ່ຊ່ວຍເຫຼືອຫຼາຍກ່ວາ 123 ຕື້ກີບ ເພື່ອຄວບຄຸມພະຍາດໂຄວິດ-19

ຍີ່ປຸ່ນ ສືບຕໍ່ຊ່ວຍເຫຼືອຫຼາຍກ່ວາ 123 ຕື້ກີບ ເພື່ອຄວບຄຸມພະຍາດໂຄວິດ-19

ຍີ່ປຸ່ນ ໃຫ້ການຊ່ວຍເຫຼືອ 1,5 ຕື້ເຢນ ຫຼື 123 ຕື້ກວ່າກີບ ເພື່ອສະໜອງອຸປະກອນການແພດ, ພາຫະນະ ແລະ ລົດຜະລິດນໍ້າສະອາດ ເພື່ອນໍາໄປຈັດຕັ້ງປະຕິບັດເຂົ້າໃນວຽກງານສາທາລະນະສຸກ ກໍ່ຄືການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ.

ພິທີລົງນາມໃນເອກະສານແລກປ່ຽນໂຄງການຊ່ວຍເຫຼືອລ້າດັ່ງກ່າວ ຈາກລັດຖະບານຍີ່ປຸ່ນ ໄດ້ຈັດຂຶ້ນທີ່ກະຊວງການຕ່າງປະເທດ ໃນວັນທີ 5 ມິຖຸນາ 2020, ຊຶ່ງຕາງໜ້າຝ່າຍລາວ ຮ່ວມລົງນາມໃນເອກະສານ ແລະ ກ່າວຮັບໂຄງການ ໂດຍ ທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງ ການຕ່າງປະເທດ ແຫ່ງ ສປປ ລາວ ແລະ ຕາງໜ້າຝ່າຍຍີ່ປຸ່ນ ຮ່ວມລົງນາມໃນເອກະສານ ແລະ ກ່າວມອບໂດຍ ທ່ານ ທາເກວາກະ ເຄໂຊ (Takewaka Keizo) ເອກ​ອັກຄະລັດຖະທູດ ຍີ່ປຸ່ນ ປະຈໍາ ສປປ ລາວ, ໂດຍການເຂົ້າຮ່ວມເປັນສັກຂີພິຍານຂອງບັນດາພະນັກງານກ່ຽວຂ້ອງທັງສອງຝ່າຍ ລາວ ແລະ ຍີ່ປຸ່ນ.

ໂຄງການຊ່ວຍເຫຼືອຄັ້ງນີ້ ເປັນໂຄງການຊ່ວຍເຫຼືອລ້ານອກໂຄງການ (Non-Project) ເຊິ່ງ ຍີ່ປຸ່ນ ໄດ້ເປັນປະເທດອັນດັບຕົ້ນ ທີ່ໃຫ້ການຊ່ວຍເຫຼືອ ສປປ ລາວ ເພື່ອຕ້ານການແຜ່ລະບາດຂອງເຊື້ອພະຍາດໂຄວິດ-19 ຢ່າງທັນການ, ໂດຍສະເພາະການຊ່ວຍເຫຼືອຊຸດປ້ອງກັນການຕິດເຊື້ອ (Personal Protective Equipment–PPEs). ມາຮອດປະຈຸບັນ, ລັດຖະບານຍີ່ປຸ່ນ ໄດ້ໃຫ້ການຊ່ວຍເຫຼືອ ສປປ ລາວ, ມູນຄ່າຫຼາຍກວ່າ 18 ລ້ານ ໂດລາສະຫະລັດ.

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຕີລາຄາສູງຕໍ່ລັດຖະບານ ແລະ ປະຊາຊົນຍີ່ປຸ່ນ ທີ່ຍາມໃດກໍ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ເປັນຢ່າງດີຕະຫຼອດມາ, ພ້ອມທັງໃຫ້ຄໍາໝັ້ນສັນຍາວ່າ ຈະນໍາໃຊ້ໂຄງການຊ່ວຍເຫຼືອຄັ້ງນີ້ ໃຫ້ເກີດປະໂຫຍດສູງສຸດ ເພື່ອພັດທະນາຂະແໜງສາທາລະນະສຸກຂອງ ສປປ ລາວ ກໍ່ຄືປະເທດລາວ ໃຫ້ນັບມື້ໄດ້ຮັບການພັດທະນາ ແລະ ຈະເລີນກ້າວໜ້າຂຶ້ນໄປເລື້ອຍໆ, ອວຍພອນໃຫ້ສາຍພົວພັນມິດຕະພາບ ແລະ ການເປັນຄູ່ຮ່ວມຍຸດທະສາດ ລະຫວ່າງ ສ​ປ​ປ ລາວ ແລະ ຍີ່ປຸ່ນ ໄດ້ຮັບການພັດທະນາຢ່າງບໍ່ຢຸດຢັ້ງ.

ຂ່າວ: ພ້ອມພົງ

ພາບ: ພ້ອມພົງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ