ພິທີເຊັນບົດບັນທຶກຍົກເລີກສັນຍາສໍາປະທານ ແລະ ຍົກເລີກການເກັບຄ່າຜ່ານທາງ 14A ບ້ານຫ້ວຍເພັກ ເມືອງໂພນທອງ ຫາ ບ້ານພະພີນ ເມືອງຈໍາປາສັກ ແຂວງຈໍາປາສັກ ຢ່າງຖາວອນ ນັບແຕ່ວັນທີ 1 ສິງຫາ 2024 ເປັນຕົ້ນໄປ, ໄດ້ຈັດຂຶ້ນໃນວັນທີ 31 ກໍລະກົດ 2024 ຢູ່ສໍານັກງານປົກຄອງແຂວງຈໍາປາສັກ ຊຶ່ງຕາງໜ້າອົງການປົກຄອງແຂວງຈໍາປາສັກ ລົງນາມໂດຍ ທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນ ແຂວງຈໍາປາສັກ ແລະ ຕາງໜ້າ ບໍລິສັດ ດວງດີກໍ່ສ້າງຂົວ-ທາງ ຈໍາກັດຜູ້ດຽວ ລົງນາມໂດຍທ່ານ ອຸດອນ ແກ້ວດວງດີ ປະທານບໍລິສັດ ດວງດີກໍ່ສ້າງຂົວ-ທາງ ຈໍາກັດຜູ້ດຽວ, ໂດຍການໃຫ້ກຽດເຂົ້າຮ່ວມຂອງ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ເສັ້ນທາງ 14A ເປັນເສັ້ນທາງໃໝ່ ທີ່ທາງບໍລິສັດ ດວງດີກໍ່ສ້າງຂົວ-ທາງ ຈໍາກັດຜູ້ດຽວ ໄດ້ສະເໜີສຶກສາສໍາຫຼວດ ໃນຄັ້ງວັນທີ 13 ມີນາ 2008, ວັນທີ 11 ພຶດສະພາ 2008 ໄດ້ເລີ່ມລົງມືສຳຫຼວດ-ເກັບກຳຂໍ້ມູນພາກສະໜາມ ແລ້ວດຳເນີນການອອກແບບ ຊຶ່ງມີຄວາມຍາວ 25 ກິໂລແມັດ, ໜ້າທາງກວ້າງ 9 ແມັດ, ທາງລົດແລ່ນ ກວ້າງ 7 ແມັດ (ບ່າທາງກວ້າງ ເບື້ອງລະ 1 ແມັດ ແລະ ກໍ່ສ້າງຂົວເບຕົງເສີມເຫຼັກ ຂາງອັດແຮງ ຈໍານວນ 9 ແຫ່ງ ຍາວ 254 ແມັດ).
ຈາກນັ້ນ ໄດ້ເຊັນສັນຍາຮັບເໝົາກໍ່ສ້າງ ໃນວັນທີ 31 ຕຸລາ 2008 ພ້ອມທັງ ເລີ່ມວຽກກໍ່ສ້າງ ແລະ ສຳເລັດວຽກກໍ່ສ້າງ ພ້ອມເປີດນຳໃຊ້ເປັນທາງການ ໃນເດືອນ 12 ປີ 2011 ເປັນຕົ້ນມາ ອາຍຸສັນຍາຮອດປີ 2032, ແຕ່ອີງໃສ່ຄວາມຫຍຸ້ງຍາກທາງດ້ານເສດຖະກິດ-ການເງິນຂອງແຂວງ ກໍຄືຂອງປະເທດ ທີ່ກໍາລັງປະເຊີນຢູ່ ເພື່ອເປັນການຫຼູດຜ່ອນພາລະໃຊ້ຈ່າຍ ໃຫ້ແກ່ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ລວມເຖິງນັກທ່ອງທ່ຽວ ທີ່ນໍາໃຊ້ເສັ້ນທາງດັ່ງກ່າວ, ອົງການປົກຄອງແຂວງຈໍາປາສັກ ຈຶ່ງໄດ້ປຶກສາຫາລື ແລະ ເອກະພາບກັບບໍລິສັດ ດວງດີກໍ່ສ້າງຂົວ-ທາງ ຈໍາກັດຜູ້ດຽວ ເພື່ອຍົກເລີກສັນຍາສໍາປະທານ ແລະ ຍົກເລີກການເກັບຄ່າຜ່ານທາງເສັ້ນດັ່ງກ່າວຢ່າງຖາວອນ ນັບແຕ່ວັນທີ 1 ສິງຫາ 2024 ເປັນຕົ້ນໄປ.
ທີ່ມາ: ພະແນກການເງິນແຂວງຈຳປາສັກ
