Vientiane Times Lao
ຕະຫຼາດຈີນຍັງເເມ່ນຕະຫຼາດທີ່ລາວສົ່ງອອກສິນຄ້າຫຼາຍ, ສ່ວນນໍາເຂົ້າຍັງແມ່ນປະເທດໄທ

ຕະຫຼາດຈີນຍັງເເມ່ນຕະຫຼາດທີ່ລາວສົ່ງອອກສິນຄ້າຫຼາຍ, ສ່ວນນໍາເຂົ້າຍັງແມ່ນປະເທດໄທ

ກະຊວງອຸດສາຫະກໍາ ແລະ ການຄ້າແຈ້ງໃຫ້ຮູ້ວ່າ: ສິນຄ້າຂອງລາວມີການສົ່ງອອກໄປຫຼາຍປະເທດໃນໂລກ, ສິນຄ້າສ່ວນຫຼາຍທີ່ສົ່ງອອກແມ່ນແຮ່ທອງ, ທອງແດງ, ເຄື່ອງທີ່ເຮັດດ້ວຍທອງ, ພືດກະສິກໍາ, ເຫຍື້ອໄມ້ ແລະ ເສດເຈ້ຍ, ໂຄງຮ່າງ ແລະ ຊິ້ນສ່ວນກ້ອງບັນທຶກພາບ, ຄໍາປະສົມ, ຄໍາແທ່ງ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ ແລະ ອຸປະກອນເຄື່ອງໃຊ້ໄຟຟ້າ, ກາເຟ ແລະ ອື່ນໆ ຊຶ່ງປະເທດທີ່ຮອງຮັບສິນຄ້າລາວອັນດັບຕົ້ນໆຍັງແມ່ນ ສປ ຈີນ, ສສ ຫວຽດນາມ, ໄທ.

ສ່ວນສິນຄ້ານໍາເຂົ້າ ຍັງແມ່ນພາຫະນະ (ລົດຈັກ, ລົດໃຫ່ຍ), ເຄື່ອງໄຟຟ້າ ແລະ ອຸປະກອນໄຟຟ້າ, ນໍ້າມັນກາຊວນ ແລະ ແອັດຊັງ, ອຸປະກອນກົນຈັກ, ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ, ຊິ້ນສ່ວນອາໄລ່ລົດ, ເຄື່ອງໃຊ້ທີ່ເຮັດດ້ວຍພລາສຕິກ, ປຸຍ ແລະ ອື່ນໆ ໂດຍນໍາເຂົ້າມາຈາກປະເທດໄທເປັນສ່ວນໃຫ່ຍ, ຮອງລົງມາແມ່ນມາຈາກ ສປ ຈີນ, ສສ ຫວຽດນາມ, ຍີ່ປຸ່ນ ແລະ ສະຫະລັດອາເມລິກາຕາມລໍາດັບ.

ກະຊວງອຸດສາຫະກໍາ ແລະ ການຄ້າແຈ້ງໃຫ້ຮູ້ຕື່ມອີກວ່າ: ສະເພາະການນໍາເຂົ້າ ແລະ ສົ່ງອອກສິນຄ້າປະຈໍາເດືອນສິງຫາທີ່ຜ່ານມາ ມີມູນຄ່າທັງໝົດ 762 ລ້ານໂດລາ, ໃນນັ້ນມູນຄ່າສົ່ງອອກ ແມ່ນ 377 ລ້ານໂດລາ ແລະ ນຳເຂົ້າ ແມ່ນ 385 ລ້ານໂດລາ ໝາຍຄວາມວ່າ ໃນເດືອນສິງຫານີ້ ລາວຂາດດຸນການຄ້າ ຫຼື ມູນຄ່ານໍາເຂົ້າຫຼາຍກວ່າການສົ່ງອອກສິນຄ້າ ຢູ່ 8 ລ້ານໂດລາ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ