ບໍລິສັດ ນານາຊິນ ຈໍາກັດຜູ້ດຽວ ແລະ ບໍລິສັດໂລໂກສ ຈໍາກັດຜູ້ດຽວ ຊຶ່ງເປັນບໍລິສັດເອກະຊົນລາວໄດ້ຮ່ວມມືກັນໃນການສຶກສາຄວາມເປັນໄປໄດ້ໃນການລົງທຶນພັດທະນາແຫຼ່ງທ່ອງທ່ຽວທໍາມະຊາດ ຕາດທອນ ແບບອະນຸລັກທໍາມະຊາດ ໂດຍປະຊາຊົນມີສ່ວນຮ່ວມ ຢູ່ ເຂດບ້ານນາພົງ ເມືອງປາກກະດິງ ແຂວງບໍລິຄໍາໄຊໃຫ້ເປັນແຫຼ່ງທ່ອງທ່ຽວທີ່ສວຍງາມ ຕິດພັນກັບທໍາມະຊາດ ພ້ອມດ້ວຍສິ່ງອໍານວຍຄວາມສະດວກຕ່າງໆ ຊຶ່ງການສໍາຫຼວດແຫຼ່ງທ່ອງທ່ຽວດັ່ງກ່າວທັງສອງບໍລິສັດໄດ້ຮັບອະນຸຍາດຈາກອໍານາດການປົກຄອງແຂວງບໍລິຄໍາໄຊເມື່ອມໍ່ໆມານີ້ ຊຶ່ງຈະໃຊ້ເວລາໃນການສໍາຫຼວດ 180 ວັນ ຫຼື 6 ເດືອນ ນັບແຕ່ນີ້ເປັນຕົ້ນໄປ.
ພິທີເຊັນສັນຍາການຮ່ວມມືສຶກສາຄວາມເປັນໄປໄດ້ກ່ຽວກັບແຫຼ່ງທ່ອງທ່ຽວດັ່ງກ່າວໄດ້ຈັດຂຶ້ນເມື່ອວັນທີ 7 ເມສາ 2022 ທີ່ຜ່ານມາ ຢູ່ພະແນກແຜນການ ແລະ ການລົງທຶນແຂວງບໍລິຄໍາໄຊ ລະຫວ່າງ ທ່ານນາງ ນັນທະໄລ ໄຊເສນາ ປະທານບໍລິສັດ ນານາຊິນ ຈໍາກັດຜູ້ດຽວ ແລະ ທ່ານພັດສອນ ຈັນທິວົງ ປະທານບໍລິສັດໂລໂກສ ຈໍາກັດຜູ້ດຽວ ໂດຍເຂົ້າຮ່ວມເປັນສັກຂີພິຍານຂອງທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ.
ທ່ານນາງ ນັນທະໄລ ໄຊເສນາ ໄດ້ກ່າວກ່ຽວກັບໂຄງການດັ່ງກ່າວວ່າ: ຍ້ອນເຫັນຄວາມສໍາຄັນຂອງແຫຼ່ງທ່ອງທ່ຽວທໍາມະຊາດທີ່ຍັງອຸດົມສົມບູນຢູ່ບໍລິເວນຕາດທອນ, ນອກນັ້ນເມືອງປາກກະດິງມີສາຍານາມວ່າເປັນເມືອງບັ້ງໄຟພະຍານາກ ລວມທັງແຂວງບໍລິຄໍາໄຊກໍາລັງກໍ່ສ້າງຂົວຂ້າມນໍ້າຂອງມິດຕະພາບລາວ-ໄທ ແຫ່ງທີ 5 ດັ່ງນັ້ນຈຶ່ງມີຄວາມຄິດຢາກລົງທຶນພັດທະນາແຫຼ່ງທ່ອງທ່ຽວດັ່ງກ່າວໃຫ້ສວຍງາມຕິດພັນກັບທໍາມະຊາດ ແລະ ສິ່ງອໍານວຍຄວາມສະດວກຕ່າງໆໄວ້ຄອຍບໍລິການນັກທ່ອງທ່ຽວ.ທໍາມະຊາດຢູ່ເຂດດັ່ງກ່າວກໍສວຍງາມຢູ່ແລ້ວມີແຕ່ຈະມາເສີມແຕ່ງ ແລະ ປັບປຸງເພື່ອໃຫ້ມັນງາມກວ່າເກົ່າ ໃຫ້ສາມາດດຶງດູດນັກທ່ອງທ່ຽວໄດ້, ບໍ່ໃຫ້ແຂວງບໍລິຄໍາໄຊເປັນພຽງແຂວງທາງຜ່ານຂອງນັກທ່ອງທ່ຽວໄປທ່ຽວຢູ່ແຂວງອື່ນໆ. ການພັດທະນາຕາດທອນນີ້ຈະເກີດຂຶ້ນແນ່ນອນ ຊຶ່ງໃນແງ່ການລົງທຶນແມ່ນ ບໍລິສັດ ນານາຊິນ ຈໍາກັດຜູ້ດຽວ ຈະລົງທຶນປະມານ 70% ແລະ ບໍລິສັດໂລໂກສ ຈະລົງທຶນ 30%, ແຕ່ມູນຄ່າການລົງທຶນທັງໝົດເທົ່າໃດນັ້ນແມ່ນຕ້ອງໄດ້ລໍຖ້າການປະເມີນ ຫຼື ການກໍ່ສ້າງຕົວຈິງ ໂດຍຈະມີການລົງທຶນກໍ່ສ້າງທີ່ພັກເຊົາ, ໂຮງແຮມ, ສະປາ, ສະຖານທີ່ຈອດລົດ ແລະ ອື່ນໆ ແລະ ການກໍ່ສ້າງຈະບໍ່ແຕະຕ້ອງທໍາມະຊາດອ້ອມຂ້າງ ແລະ ຈະບໍ່ສົ່ງຜົນກະທົບຕໍ່ສິ່ງແວດລ້ອມ.
ທ່ານນາງ ນັນທະໄລ ໄດ້ກ່າວຕື່ມວ່າ: ສ່ວນວ່າປະຊາຊົນມີສ່ວນຮ່ວມນັ້ນ ແນ່ນອນວ່າຖ້າໂຄງການໄດ້ມີການພັດທະນາ, ປະຊາຊົນອ້ອມຂ້າງກໍຈະມີວຽກເຮັດງານທໍາ ພ້ອມທັງປະຊາຊົນຈະໄດ້ຂາຍສິນຄ້າໂດຍສະເພາະສິນຄ້າກະສິກໍາ ຂອງເຂົາເຈົ້າໃຫ້ນັກທ່ອງທ່ຽວ ລວມທັງຂາຍໃຫ້ພວກເຮົາເຊັ່ນກັນເພື່ອປຸງແຕ່ງອາຫານໃຫ້ນັກທ່ອງທ່ຽວ. ແຫຼ່ງທ່ອງທ່ຽວທໍາມະຊາດ ຕາດທອນນີ້ ເມື່ອພັດທະນາສໍາເລັດ ເຊື່ອວ່າຈະເປັນໃບໜ້າໃບຕາໃຫ້ແຂວງບໍລິຄໍາໄຊ ລວມທັງສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໄດ້.
