ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງໄຊສົມບູນຈະຈັດງານສະເຫຼີມສະຫຼອງປີທ່ອງທ່ຽວລາວ 2024 ຕິດພັນກັບການສະເຫຼີມສະຫຼອງຫໍຫຼັກເມືອງ ແລະ ພຸດທະພິເສກຮູບປັ້ນຫຼໍ່ເຈົ້າອະນຸວົງ ໃນລະຫວ່າງວັນທີ 28 ພະຈິກ ຫາ ວັນທີ 3 ທັນວາ 2024 ນີ້.
ກິດຈະກໍາໃນງານດັ່ງກ່າວຈະມີການສະແດງສິລະປະ-ວັນນະຄະດີຈາກກະຊວງປ້ອງກັນປະເທດ, ການສະແດງກາຍະສິນຂອງກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ, ງານຕະຫຼາດກາງຄືນ, ການວາງສະແດງສິນຄ້າຫັດຖະກຳ, ກະສິກຳ, ເທສະການອາຫານ, ກິດຈະກໍາງົວຊົນງົວ, ຕັ້ງກອງບຸນ ແລະ ຄົບງັນຫາເຈົ້າອະນຸວົງຕາມຮີດຄອງປະເພນີທີ່ສວນສາທາລະນະກໍ້າເຈົ້າອະນຸວົງ, ໃສ່ບາດຖວາຍສັງຄະທານແດ່ພະສົງ 31 ອົງ, ພິທີທາງສາສະໜາສູດປະຣິຕະມຸງຄຸນທີ່ຫໍຫຼັກເມືອງປີທີ 3. ນອກຈາກນີ້ ຍັງມີກິດຈະກໍາທ່ອງທ່ຽວເຊັ່ນ: ທ່ຽວຊົມແຫຼ່ງທ່ອງທ່ຽວທຳມະຊາດພູຫົວໂລ້ນ, ຖໍ້າເຈົ້າອະນຸວົງ, ວັງນໍ້າຂຽວ ແລະ ຂຶ້ນຊົມທິວທັດທຳມະຊາດພູເບ້ຍ ແລະ ອື່ນໆ.
ທົ່ວແຂວງໄຊສົມບູນມີແຫຼ່ງທ່ອງທ່ຽວທັງໝົດ 75 ແຫ່ງ, ສະເພາະປີນີ້, ນັບແຕ່ຕົ້ນປີມາຮອດປັດຈຸບັນມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ຽວຊົມ ພາຍໃນແຂວງແລ້ວ 24.202 ເທື່ອຄົນ.
ແຫຼ່ງຂໍ້ມູນ: ຂປລ
