ທະນາຄານຮ່ວມພັດທະນາ (JDB) ແລະ ວິທະຍາໄລຄູດົງຄຳຊ້າງ ນະຄອນຫຼວງວຽງຈັນ ເຊັນສັນຍາຮ່ວມມືກ່ຽວກັບໂຄງການເງີນກູ້ ເພື່ອການສຶກສາ ແລະ ອອກບັດ ATM Healthy ເພື່ອຄຸ້ມຄອງອຸບັດເຫດ ໄດ້ຈັດຂື້ນເມື່ອບໍ່ດົນມານີ້ ທີ່ວິທະຍາໄລຄູດົງຄຳຊ້າງ ຊຶ່ງຮ່ວມລົງນາມ ໂດຍ ທ່ານ ວິໄລ ສີພະພອນ ຜູ້ອຳນວຍການໃຫຍ່ທະນາຄານຮ່ວມພັດທະນາ ແລະ ທ່ານ ນາງ ວິລາ ແສງສະຫວ່າງ ຜູ້ອຳນວຍການໃຫຍ່ ວິທະຍາໄລຄູດົງຄຳຊ້າງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງໂຄງການດັ່ງກ່າວ ແມ່ນເພື່ອອໍານວຍຄວາມສະດວກໃຫ້ແກ່ນັກສຶກສາຜູ້ທີ່ຂາດເຂີນທຶນຮອນ ທີ່ຢາກສຶກສາຮໍ່າຮຽນໃນ ວິທະຍາໄລຄູດົງຄຳຊ້າງ ແລະ ເພື່ອສ້າງຄວາມສະດວກສະບາຍໃຫ້ນັກສຶກສາ ໄດ້ເຂົ້າເຖິງການບໍລິການທີ່ທັນສະໄໝ ວ່ອງໄວ ໃນການເຮັດທຸລະກໍາທາງດ້ານການເງິນ ລວມທັງ ອອກບັດ ATM Healthy ໃຫ້ນັກສຶກສາ ສາມາດນໍາໃຊ້ໃນການຖອນເງິນຈາກຕູ້ ATM ເປັນບັດປະກັນໄພອຸບັດເຫດຢູ່ໃນໃບດຽວກັນ, ສາມາດຄຸ້ມຄອງອຸບັດເຫດໄດ້ຕະຫຼອດ 24 ຊົ່ວໂມງ ໃນທົ່ວປະເທດ ໂດຍການຄຸ້ມຄອງອຸບັດເຫດ ເຊັ່ນ: ຖ້າເສຍຊິວິດ ຫຼື ພິການຖາວອນ ຈະໄດ້ຮັບ 6 ລ້ານກີບ ແລະ ຄ່າປິ່ນປົວຈາກອຸບັດເຫດ ສູງສຸດ 500.000ກີບຕໍ່ຄັ້ງ.
ຂ່າວ: ວຽງຈັນທາຍ
