Visit BigblueAgency
ທັບນັກເຕະ U 23 ລາວ ກຽມລົງສະໜາມນັດທຳອິດ ພົບ ອົດສະຕຣາລີ ລາຍການ ຊີງແຊ້ມອາຊີ 2024 ຮອບຄັດເລືອກ

ທັບນັກເຕະ U 23 ລາວ ກຽມລົງສະໜາມນັດທຳອິດ ພົບ ອົດສະຕຣາລີ ລາຍການ ຊີງແຊ້ມອາຊີ 2024 ຮອບຄັດເລືອກ

ນັກກິລາເຕະບານທີມຊາດລາວ ຮຸ່ນອາຍຸບໍ່ເກີນ 23 ປີ ຫຼື ຢູ-23 ໄດ້ເດີນທາງເຖິງປະເທດທາຈີກິດສະຖານ  ແລະ ໄດ້ກຽມຄວາມພ້ອມຢ່າງເຕັມທີ່ ເພື່ອປະເດີມສະໜາມນັດທຳອິດ ພົບກັບ ທີມຊາດອົດສະຕຣາລີ ໃນຕອນຄໍ່າວັນທີ 6 ກັນຍາ ຫຼື ຄໍ່າມື້ນີ້ ເວລາ 22:30 ໂມງເປັນຕົ້ນໄປ ແລະ ນັດທີ 2 ຈະພົບກັບ ເຈົ້າພາບ ທີມຊາດທາຈິກິດສະຖານ ໃນວັນທີ 9 ກັນຍາ 2023 ໃນການແຂ່ງຂັນເຕະບານ ຊີງແຊ໋ມອາຊີ 2024 ຮອບຄັດເລືອກ.  

ພາຍຫຼັງທີ່ຂຸນພົນນັກເຕະບານທີມຊາດລາວ ຮຸ່ນອາຍຸບໍ່ເກີນ 23 ປີ ຫຼື ຢູ-23 ໄດ້ເດີນທາງເຖິງປະເທດທາຈິກິດສະຖານ ເມື່ອວັນທີ 2 ກັນຍາ ຜ່ານມາ ນຳທັບໂດຍທ່ານ ອາເຣຍນາ ກູເລຍໂນ ຄູຝຶກທີມຊາດລາວ ຊາວອີຕາລີ ໄດ້ນຳພາຝຶກຊ້ອມທາງດ້ານລະບົບການຫຼິ້ນ ທີ່ວາງໄວ້ໃນນັດທຳອິດພົບກັບ ທີມຊາດອົດສະຕຣາລີ ເພື່ອໃຫ້ນັກກິລາເຂົ້າໃຈ ວິທີການເຄື່ອນບານ, ການສົ່ງບານ ແລະ ການຍິງປະຕູ ໃນແຕ່ລະຕຳແໜ່ງ ໃຫ້ມີປະສິດທິພາບ ແລະ ປະສິດທິຜົນ ສາມາດຍາດໄຊຊະນະຈາກນັດດັ່ງກ່າວ.

ສຳລັບນັກກິລາໃນຊຸດດັ່ງກ່າວ ແມ່ນສາມາດຄັດເລືອກໄດ້ຈາກບັນດາສະໂມສອນ ທີ່ແຂ່ງຂັນໃນ ລາຍການ ເປບຊີ ລາວລີກ 1 ແລະ ລາຍການ ລາວລີກ 2 ແລະ ໄດ້ນັກກິລາທີ່ໄປຄ້າແຄ່ງທີ່ຕ່າງແດນ 2 ຄົນກໍຄື ໂຣມັນ ອານຸສອນ ອັນໂກ ກອງກາງຈາກສະໂມສອນ SV OBERACHERN (ປະເທດເຢຍລະມັນ) ແລະ ຄອນສະຫວັນ ແກ້ວໜູຈັນ ຫຼື ແຈັກກີ້ ທີ່ໄດ້ໄປຮຽນຕໍ່ທີ່ປະເທດອີຕາລີ ເຊີ່ງທັງສອງໄດ້ເດີນທາງເຖິງປະເທດທາຈິກິດສະຖານ ເປັນທີ່ຮຽບຮ້ອຍແລ້ວ.

ທ່ານ ອາເຣນ່າ ກູເລຍໂມ່ ຫົວໜ້າຄູຝຶກ ຂອງທີມຊຸດນີ້ກ່າວວ່າ: “ສຳລັບການຝຶກຊ້ອມຂອງທີມຊາດລາວ ຮຸ່ນອາຍຸບໍ່ເກີນ 23 ປີ ແມ່ນໄດ້ເກັບຕົວຝຶກຊ້ອມມາຕັ້ງແຕ່ເດືອນມິຖຸນາ ເປັນທີມທີ່ສ້າງນັກກິລາໜ້າໃໝ່ຫຼາຍຄົນ ແລະ ທີມພວກເຮົາກໍ່ຍັງມີຄວາມທ້າທາຍກ່ຽວກັບນັກກິລາເພາະວ່າບາງຄົນກໍ່ບໍ່ສາມາດມາຮ່ວມຝຶກຊ້ອມນຳທີມໄດ້ ເຊີ່ງນັກກິລາສ່ວນຫຼາຍແມ່ນໄດ້ຜ່ານການແຂ່ງຂັນ AFF U23 championship 2023 ມາແລ້ວຢູ່ທີ່ ປະເທດໄທ, ແນ່ນອນສຳລັບການກຽມຄວາມພ້ອມນັດທີ່ທີມຊາດລາວຈະພົບກັບທີມຊາດອົດສະຕຣາລີ ນີ້ແມ່ນເປັນເກມທີ່ທ້າທາຍ ເນື່ອງຈາກທີມອົດສະຕຣາລີ ເປັນທີມໜຶ່ງທີ່ແຂງແກ່ນໃນອາຊີ, ນອກຈາກນີ້, ພວກເຮົາກໍ່ໄດ້ສຶກສາເກມການຫຼິ້ນຂອງທີມທາຈີກິດສະຖານ ນຳອີກດ້ວຍ, ເຖິງຢ່າງໃດກໍ່ຕາມ 2 ທີມນີ້ເປັນທີມທີ່ແຂງແກ່ນ ແຕ່ພວກເຮົາຈະ ສູ້ສຸດຄວາມສາມາດເພື່ອທີມຊາດລາວ ”

ການແຂ່ງຂັນເຕະບານຊີງແຊ້ມອາຊີ 2024 ຮອບຄັດເລືອກ ທີ່ປະເທດທາຈິກິດສະຖານ ເປັນເຈົ້າພາບ, ທີມຊາດລາວ ຖືກຈັດຢູ່ກຸ່ມ I ປະກອບມີ: ອົດສະຕຣາລີ ແລະ ທາຈິກິດສະຖານ ເຈົ້າພາບ ຊຶ່ງການແຂ່ງຂັນລາຍການດັ່ງກ່າວ ແມ່ນເພື່ອຄັດເລືອກເອົາທີມແຊ໋ມກຸ່ມ 11 ທີມ ແລະ ອັນດັບທີ 2 ທີ່ມີຄະແນນດີທີ່ສຸດ 4 ທີມ ຜ່ານເຂົ້າຮອບສຸດທ້າຍ ຮ່ວມກັບ ປະເທດກາຕາ ເຈົ້າພາບ ທີ່ໄດ້ຮັບກຽດເປັນເຈົ້າພາບ.

ການແຂ່ງຂັນຮອບຄັດເລືອກໃນຄັ້ງນີ້ ແມ່ນຈະມີຂຶ້ນລະຫວ່າງວັນທີ 6-12 ກັນຍາ 2023 ສ່ວນການແຂ່ງຂັນຮອບສຸດທ້າຍແມ່ນຈະແຂ່ງຂັນໃນເດືອນເມສາ 2024 ເພື່ອຫາຕົວແທນຂອງທະວີບອາຊີ ເຂົ້າຮ່ວມແຂ່ງຂັນໃນງານມະຫະກຳກິລາໂອແລມປິກ 2024 ທີ່ນະຄອນຫຼວງປາຣີ ປະເທດຝຣັ່ງ ເປັນເຈົ້າພາບ ສ່ວນຕາຕະລາງແຂ່ງຂັນຂອງ ທີມຊາດລາວ ນັດທຳອິດ ພົບກັບ ທີມຊາດອົດສະຕຣາລີ ໃນຕອນຄໍ່າວັນທີ 6 ກັນຍາ 2023 ເວລາ 22:30 ໂມງເປັນຕົ້ນໄປ ແລະ ນັດທີ 2 ຈະພົບກັບ ເຈົ້າພາບ ທີມຊາດທາຈິກິດສະຖານ ໃນວັນທີ 9 ກັນຍາ 2023 ເວລາດຽວກັນ ຊຶ່ງການແຂ່ງຂັນທັງສອງນັດດັ່ງກ່າວ ແມ່ນແຂ່ງຂັນທີ່ສະໜາມກິລາກາງຣີພັບລິກັນ ສະເຕດ້ຽມ (Republican Central Stadium Dushanbe).

Related Articles

Leave a Reply