Vientiane Times Lao
ທາງດ່ວນວຽງຈັນ-ວັງວຽງຈະເປີດບໍລິການຢ່າງເປັນທາງການໃນວັນທີ 2 ທັນວາ 2020 ນີ້

ທາງດ່ວນວຽງຈັນ-ວັງວຽງຈະເປີດບໍລິການຢ່າງເປັນທາງການໃນວັນທີ 2 ທັນວາ 2020 ນີ້

 ບໍລິສັດຮ່ວມທຶນພັດທະນາ ທາງດ່ວນ ລາວ-ຈີນຈໍາກັດ ແຈ້ງໃຫ້ຮູ້ວ່າ: ປັດຈຸບັນນີ້ທາງໂຄງການເລັ່ງກໍ່ສ້າງຮົ້ວກັ້ນ, ປູຢາງບາງຈຸດ, ກໍ່ສ້າງຈຸດເຊື່ອມຕໍ່ເຂົ້າອອກທີ່ມີ 7 ຈຸດຢູ່ 7 ບ້ານ, ຕິດຕັ້ງລະບົບໄຟເຍືອງທາງຕາມເສັ້ນທາງ ແລະ ໃນອຸໂມງຢູ່ເຂດພູພະ ແລະ ກວດຄືນໜ້າວຽກຕ່າງໆ ຊຶ່ງໂດຍລວມແລ້ວຮອດປັດຈຸບັນໜ້າວຽກແມ່ນສໍາເລັດຫຼາຍກວ່າ 90% ແລະ ຈະເປີດບໍລິການໃນມື້ວັນທີ 2 ທັນວາ 2020 ຢ່າງແນ່ນອນເພື່ອສະເຫຼີມສະຫຼອງວັນຊາດລາວ ຄົບຮອບ 45 ປີ.
 ທາງດ່ວນວຽງຈັນ-ວັງວຽງ ມີຄວາມຍາວ 109 ກິໂລແມັດນັບແຕ່ເມືອງນາຊາຍທອງ ນະຄອນຫລວງວຽງຈັນ ຫາ ເມືອງວັງວຽງ ຂອງແຂວງວຽງຈັນ, ກວ້າງ 23 ແມັດ, ມີ 4 ຊ່ອງທາງຈະລາຈອນ, ມີ 2 ແລວ ໄປ-ກັບ, ມີອຸໂມງ 1 ແຫ່ງຢູ່ເຂດພູພະ, ມີຂົວຂ້າມທັງໝົດ 34 ແຫ່ງ ເຊິ່ງປະກອບດ້ວຍຂົວຂ້າມທາງ ເລກທີ 13 ເໜືອ 3 ຈຸດ, ຂ້າມທາງລົດໄຟ 4 ຈຸດ ແລະ ຂ້າມທາງເຂົ້າບ້ານທົ່ວໄປ 23 ຈຸດ ແລະ ຈຸດເຊື່ອມຕໍ່ເຂົ້າອອກທີ່ມີ 7 ຈຸດ.
ຖ້າທາງດ່ວນດັ່ງກ່າວເປີດບໍລິການຈະເຮັດໃຫ້ຜູ້ສັນຈອນສາມາດຫຼຸດເວລາໃນການເດີນທາງຈາກນະຄອນຫລວງວຽງຈັນໄປຫາເມືອງວັງວຽງໄດ້ເຖິງ 2 ຊົ່ວໂມງ ຖ້າທຽບກັບການເດີນຈາກເສັ້ນທາງ 13 ເໜືອ ຊຶ່ງລາຄາບໍລິການພຽງແຕ່ 60.000 ກວ່າກີບເທົ່ານັ້ນ.
ທາງດ່ວນວຽງຈັນ-ວັງວຽງໄດ້ ເລີ່ມລົງມືກໍ່ສ້າງມາແຕ່ ວັນທີ 30 ທັນວາ 2018 ຊຶ່ງເປັນໄລຍະທໍາອິດຂອງໂຄງການ, ໄລຍະທີສອງແມ່ນຈາກວັງວຽງໄປຫາແຂວງຫຼວງພະບາງ, ໄລຍະທີສາມ ຈາກແຂວງຫຼວງພະບາງໄປຫາ ແຂວງ ອຸດົມໄຊ ແລະ ໄລຍະທີສີ່ແມ່ນຈາກແຂວງ ອຸດົມໄຊໄປຫາແຂວງຫຼວງນໍ້າທາ.

ຂ່າວ: ວຽງຈັນທາຍ

ພາບ: chinesetimes-laos

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ