ການແຂ່ງຂັນບານເຕະຊາຍ ຊີງແຊ້ມອາຊີ ຮຸ່ນອາຍຸບໍ່ເກີນ 23 ປີ ຫຼື U23 ຮອບຄັດເລືອກ ຫຼື AFC U23 Asian Cup Qatar 2024 Qualifiers ທີ່ຈະຈັດຂຶ້ນລະຫວ່າງວັນທີ 6-12 ກັນຍາ 2023 ໂດຍທີມຊາດລາວ ຮຸ່ນອາຍຸບໍ່ເກີນ 23 ປິ ຖືກຈັດຢູ່ກຸ່ມ I ຮ່ວມກັບ ອົສຕຣາລີ, ສປປ ເກົາຫຼີ ແລະ ທາຈີກິສຖານ ( ເຈົ້າພາບ ).
ອີງຕາມຂໍ້ມູນຈາກສະຫະພັນບານເຕະແຫ່ງຊາດລາວ ( ສຕລ) ໃຫ້ຮູ້ວ່າ: ຕາຕະລາງການແຂ່ງຂັນຂອງທີມຊາດລາວ ປະກອບມີ: ວັນທີ 6 ກັນຍາ 2023 ທີມຊາດລາວ ພົບກັບ ທາຈີກິສຖານ, ວັນທີ 9 ກັນຍາ 2023 ທີມຊາດລາວ ພົບກັບ ອົສຕຣາລີ ແລະ ວັນທີ 12 ກັນຍາ 2023 ທີມຊາດລາວ ພົບກັບ ສປປ ເກົາຫຼີ.
ສໍາລັບ ລາຍການແຂ່ງຂັນບານເຕະຮອບຄັດເລືອກ ດັ່ງກ່າວນີ້ ມີ 43 ທີມ ແບ່ງ 11 ກຸ່ມ ຊຶ່ງອັນດັບ 1 ຂອງແຕ່ລະກຸ່ມ ແລະ ອັນດັບ 2 ທີ່ມີຄະແນນດີທີ່ສຸດ 4 ທີມ ຜ່ານເຂົ້າຮອບສຸດທ້າຍ, ຊຶ່ງລາຍການແຂ່ງຂັນຮອບສຸດທ້າຍ ນີ້ ຈະຈັດຂຶ້ນໃນເດືອນເມສາ 2024 ທີ່ປະເທດກາຕ້າ (ເຈົ້າພາບ), ເພື່ອຫາຕົວແທນຂອງທະວີບອາຊີ ເຂົ້າຮ່ວມແຂ່ງຂັນໃນງານມະຫະກຳກິລາໂອແລມປິກ 2024 ຢູ່ທີ່ນະຄອນຫຼວງປາຣີ ປະເທດຝຣັ່ງ.
