ໂຄງການປັບປຸງ ແລະ ພັດທະນາພື້ນຖານໂຄງລ່າງສິ່ງອຳນວຍຄວາມສະດວກ ຢູ່ສະຖານທີ່ທ່ອງທ່ຽວເຂດອ່າງນ້ຳງື່ມ 1 ຈະມີພິທີມອບ-ຮັບ ແລະ ເປີດບໍລິການໃນວັນທີ 3 ທັນວາ 2024 ທີ່ຈະມາເຖິງນີ້ ຊຶ່ງພາຍໃນງານຈະມີການສະແດງສິລະປະວັນນະຄະດີ, ວາງສະແດງສິນຄ້າ, ການບໍລິການທ່ອງທ່ຽວ ແລະ ສິນຄ້າໂອດ໊ອບ ຄາດວ່າຈະມີແຂກທີ່ຖືກເຊີນນັບແຕ່ຂັ້ນສູນກາງຮອດທ້ອງຖິ່ນ ນັບທັງພາກລັດ ແລະ ພາກທຸລະກິດ ເຂົ້າຮ່ວມປະມານ 400 ກວ່າຄົນ.
ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ ໄດ້ໃຫ້ສໍາພາດຕໍ່ນັກຂ່າວແຂວງວຽງຈັນກ່ຽວກັບໂຄງການດັ່ງກ່າວວ່າ: ສຳລັບການບໍລິຫານຈັດການໃນສະເພາະໜ້າ ແລະ ຍາວນານ ການນຳແຂວງວຽງຈັນ ໄດ້ອະນຸມັດຂໍ້ຕົກລົງວ່າດ້ວຍການຄຸ້ມຄອງການທ່ອງທ່ຽວທາງນ້ຳ ຢູ່ແຂວງວຽງຈັນ ແລະ ໄດ້ສ້າງມາດຕະຖານການບໍລິການເຮືອນຳທ່ຽວ ຢູ່ເຂື້ອນນ້ຳງື່ມ 1 ພ້ອມທັງປະເມີນມາດຕະຖານ ການບໍລິການເຮືອນຳທ່ຽວຮອບທີ 1 ແລະ ຮອບທີ 2 ຄະນະຮັບຜິດຊອບໂຄງການ ໄດ້ສຸ່ມໃສ່ວາງໜ້າວຽກດັ່ງນີ້: ປະດັບປະດາອະນາໄມເສັ້ນທາງ, ອາຄານຮ້ານຄ້າ, ສະຖານທີ່ສາທາລະນະໃຫ້ສະອາດຈົບງາມ; ຈັດສັນແບ່ງໂຊນຮ້ານຄ້າຕາມແຕ່ລະປະເພດສິນຄ້າ ເຊັ່ນ: ອາຄານ A ຂາຍຜະລິດຕະພັນປາ, ອາຄານ B ຂາຍເຄື່ອງທີ່ລະນຶກ; ອາຄານ C ຮ້ານຂາຍເຄື່ອງດື່ມ, ອາຄານ D ຮ້ານອາຫານ, ອາຄານ E ຮ້ານວາງສະແດງສິນຄ້າ ແລະ ອື່ນໆ. ປັດຈຸບັນມີຜູ້ປະກອບການຮ້ານຄ້າ, ຮ້ານອາຫານ-ເຄື່ອງດື່ມ ແລະ ຮ້ານຂາຍເຄື່ອງທີ່ລະນຶກ ຈໍານວນ 32 ຫົວໜ່ວຍ. ພ້ອມນີ້ໄດ້ຝຶກອົບຮົມ ໃຫ້ແກ່ປະຊາຊົນຜູ້ປະກອບການໃນຫຼາຍຫົວຂໍ້ເຊັ່ນ: ການສ້າງແຜນດຳເນີນທຸລະກິດ; ການນຳໃຊ້ພື້ນທີ່ທຸລະກິດ ແລະ ຮ້ານຄ້າໃຫ້ເກີດປະໂຫຍດສູງສຸດ; ການນຳໃຊ້ພາຊະນະໃສ່ອາຫານ ແລະ ເຄື່ອງດື່ມທີ່ເໝາະສົມ; ການຮັກສາຫຼັກສຸຂະອະນາໄມ ແລະ ການທຳຄວາມສະອາດຮ້ານຄ້າ, ຮ້ານອາຫານ, ສະຖານທີ່ທ່ອງທ່ຽວ; ໄດ້ກວດກາ ມາດຕະຖານເຮືອນໍາທ່ຽວ, ປະກອບຖັງບັນຈຸສິ່ງປະຕິກູນໃຫ້ກັບເຮືອນຳທ່ຽວທຸກລໍາ; ຝຶກອົບຮົມພະນັກງານຂັບເຮືອ, ພະນັກງານຕ້ອນຮັບແຂກ; ຊຸກຍູ້ຜູ້ປະກອບການເຮືອ ຕ້ອງອະນາໄມທາສີຕົບແຕ່ງສ້ອມແປງເຮືອຂອງຕົນໃຫ້ມີຄວາມສະອາດ. ປັດຈຸບັນມີເຮືອນໍາທ່ຽວພ້ອມທີ່ຈະບໍລິການທັງໝົດ 35 ລໍາ, ຈັດກອງປະຊຸມປຶກສາຫາລືກັບພາກສ່ວນທີ່ກ່ຽວຂ້ອງ ເພື່ອສ້າງຄວາມເປັນເອກະພາບກ່ຽວກັບການບໍລິຫານຄຸ້ມຄອງຊົ່ວຄາວສຳລັບສະຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ 1 ໂດຍມອບໃຫ້ກຸ່ມເຮືອນໍາທ່ຽວເປັນຜູ້ບໍລິຫານຄຸ້ມຄອງ ເປັນການຊົ່ວຄາວ ຊຶ່ງຕາມແຜນແມ່ນຈະໄດ້ຈັດຫາບໍລິສັດທີ່ມີປະສົບການມາບໍລິຫານໃນຕໍ່ໜ້າ.
ໂຄງການດັ່ງກ່າວຮັບເໝົາກໍ່ສ້າງ ໂດຍບໍລິສັດຄໍາຟອງກຣຸບ ຈໍາກັດຜູ້ດຽວ ເລີ່ມລົງມືກໍ່ສ້າງມາແຕ່ວັນທີ 1 ກໍລະກົດ 2021 ລວມເປັນມູນຄ່າທັງໝົດໃນສັນຍາ 5,330,799 ໂດລາສະຫະລັດ
ແຫຼ່ງຂ່າວ: ແຂວງວຽງຈັນ
